އިންޑިއާ ސިފައިންގެ އަދަދާއި ރާޑަރުތައް ކޮންޓްރޯލްކުރާ ފަރާތްތަކުގެ މައުލޫމާތު ސަރުކާރުގެ އިދާރާތަކުން ދީފައެއްނުވޭ: ފިރުޒުލް
އިންޑިއާ ސިފައިންގެ އަދަދާއި ރާޑަރުތައް ކޮންޓްރޯލްކުރާ ފަރާތްތަކުގެ މައުލޫމާތު ސަރުކާރުގެ އިދާރާތަކުން ދީފައި ނުވާ ކަމަށް އިންތިގާލީ ތަރުޖަމާނު މުހައްމަދު ފިރުޒުލް ވިދާޅުވެއްޖެއެވެ.
މިއަދު ބޭއްވި ނޫސްވެރިންގެ ބައްދަލުވުމެއްގައި ފިރުޒުލް ވިދާޅުވީ އިންޑިއާ ސިފައިންގެ އަދަދާ ބެހޭގޮތުން އެކަށީގެންވާ މައުލޫމާތެއް އަދި ޔަގީންކުރެވޭ މިންވަރަކަށް ލިބިފައި ނުވާ ކަމަށާއި ރާޑަރުތައް ކޮންޓްރޯލްކުރާ ފަރާތްތަކުގެ މައުލޫމާތު ވެސް އަދި ލިބިފައިނުވާ ކަމަށެވެ.
ފިރުޒުލް މިފަދައިން ވިދާޅުވެފައިވާއިރު ރާއްޖޭގައި އިންޑިއާ ސިފައިން ތިބި ކަމަށް މި ސަރުކާރުން ވެސް އެއްބަސްވެފައިވާ ކަމަށާއި ނަމަވެސް ރާއްޖޭގައި ތިބި އިންޑިއާ ސިފައިންގެ ސާފު އަދަދެއް އަދި އޮޅުންފިލާފައި ނުވާ ކަމަށް ޕީއެންސީގެ ޗެއާޕާސަން އަބްދުއްރަހީމް އަބްދުﷲ (އަދުރޭ) ވެސް ދާދި ފަހުން ވަނީ ވިދާޅުވެފައެވެ.
ރާއްޖޭގައި ތިބި ކަމަށް ބުނާ އިންޑިއާ ސިފައިން ފޮނުވާލުމަކީ އިންތިހާބީ ރައީސް ޑރ. މުހައްމަދު މުއިއްޒުގެ ވައުދުފުޅެކެވެ. އެގޮތުން ވެރިކަމުގެ ފުރަތަމަ ހަފްތާތެރޭ އިންޑިއާ ސިފައިން އަނބުރާ ގައުމަށް ފޮނުވާލުމުގެ މަސައްކަތް ފަށާނެ ކަމަށް މުއިއްޒު ވިދާޅުވިއެވެ.
