އިންތިޚާބީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުވެގެންދާނީ ކެބިނެޓާއި ކުންފުނިތައް އެއްކޮށްގެން ބަލާލާއިރުގައިވެސް މިހާތަނަށް އެންމެ ގިނަ އަންހެން ބޭފުޅުން ހިމެނޭ ސަރުކާރަށްކަމަށް އެމަނިކުފާނު ވިދާޅުވެއްޖެއެވެ.
މިއަދު ފާހަގަކުރާ ޖުމްހޫރީ ދުވަހުގެ މުނާޞަބަތުގައި ޓީވީއެމްއިން ކުރިއަށްގެންދިޔަ "ދިވެހީންގެ ރާއްޖެ" ޕްރޮގްރާމްގައި ވާހަކަފުޅުދައްކަވަމުން ޑރ. މުޢިއްޒު ވިދާޅުވީ އެމަނިކުފާނުގެ ކެމްޕޭންތަކުގައި ވިދާޅުވިގޮތަށް ބޭނުންފުޅުވަނީ ވީހާވެސް ގިނަ އަންހެން ބޭފުޅުންނަށް ފުރުޞަތުދެއްވައިގެން ސަރުކާރު ހިންގަވަން ކަމަށާއި އެމަނިކުފާނުގެ ސަރުކާރު ހިންގެވުމުގައި އިސް ސަފުގައި އަންހެން ކަނބަލުން ފެނިވަޑައިގަންނަވާނެކަމަށެވެ.
އެގޮތުން، މިއަދާ ހަމައަށް އައިއިރުގައިވެސް ކެބިނެޓާއި އަދި ކުންފުނިތަކަށް ބެލިނަމަވެސް، އަންހެން ބޭފުޅުން ނިސްބަތުން ވަރަށް މަދުކަމަށް ފާހަގަކުރައްވަމުން ޑރ. މުޢިއްޒު ވިދާޅުވީ އެމަނިކުފާނުގެ ސަރުކާރުގައި އެކުލަވާލައްވާ އިސް ޓީމުގައި މިހާރުވެސް 6 އަންހެން ބޭފުޅަކު ބައިވެރިކުރައްވަން ނިންމަވާފައިވާކަމަށެވެ.
އެއީ ސަރުކާރު ހިއްޞާވާ މުހިންމު 6 ކުންފުންޏަކަށް އައްޔަންކުރެވޭ އަންހެން ބޭފުޅުންކަމަށް އިންތިޚާބީ ރައީސް ވިދާޅުވެފައިވެއެވެ. އަދި އެބޭފުޅުންނަކީ ދާއިރާއިން ފުރިހަމައަށް ތަޢުލީމާއި ތަޖުރިބާ ލިބިވަޑައިގެން ތިއްބެވި ހިންގުންތެރި ޤާބިލު ބޭފުޅުންތަކެއްކަމަށްވެސް ޑރ. މުޢިއްޒު ވިދާޅުވިއެވެ.
"ކެބިނެޓުގައިވެސް އަންހެން ބޭފުޅުން ހިމެނޭނެ، ދެން މުޅި ކެބިނެޓުގެ ނިސްބަތުން އެހާ ގިނަ ނުވިޔަސް ކެބިނެޓާއި ކުންފުނިތަކާއި އެއްކޮއްލާ އިރުގައި މިހާތަނަށް އެންމެ ގިނަ އަންހެން ބޭފުޅުން ހިމެނޭ ޓޮޕް މެނޭޖްމަންޓްކަަމށް އަޅުގަނޑަށް ޤަބޫލުކުރެވެނީ" ޑރ. މުޢިއްޒު ވިދާޅުވިއެވެ.
"މިއިން ކޮންމެ ބޭފުޅަކީ އަޅުގަނޑަށް އެބޭފުޅުންނާމެދު ފުރިހަމަ ޔަޤީންކަން އޮތް ބޭފުޅުން... އަޅުގަނޑު ބޭނުން އަޅުގަނޑުގެ ސަރުކާރަކީ ސާފު ސަރުކާރަކަށް ހަދަން. ކޮރަޕްޝަނަށް ހަމަ ހަޤީޤަތުގައިވެސް ނޫނެކޭ ބުނާނެ މި ސަރުކާރުން، ކެބިނެޓުގެ މެންބަރެއްވިޔަސް، އެމްޑީއެއްވިޔަސް ފުރުޞަތެއް ނުދެއްވާނެކަން. އަޅުގަނޑަށް ޔަޤީން އަޅުގަނޑު ނަގާފަ މިތިބަ އެއްވެސް ބޭފުޅަކު ކޮރަޕްޝަނަކަށް ފުރުޞަތެއް ނުދެއްވާނެކަން" ޑރ. މުޢިއްޒު ވިދާޅުވިއެވެ.
އެހެންކަމުން އެމަނިކުފާނުގެ ސަރުކާރު ވެގެންދާނީ، ސާފު ދެފުއް ފެންނަ ހިންގުންތެރި ސަރުކާރަކަށް ކަމަށާއި، ނަތީޖާ ނެރެދެވޭ ސަރުކާރަކަށް އެމަނިކުފާނުގެ ސަރުކާރު ވާނެކަމަށް ޑރ. މުޢިއްޒު ވިދާޅުވިއެވެ.
މީގެ އިތުރުން، ޑރ. މުޢިއްޒު ވިދާޅުވީ އެމަނިކުފާނުގެ ސަރުކާރަކީ ރައްޔިތުންނާ ގާތުން ރައްޔިތުންނަށްޓަކައި ޚިދުމަތްކުރާ ސަރުކާރަކަށް ވާނެކަމަށާއި އެމަނިކުފާނުގެ ކެބިނެޓުގައި ބަންޑާރަނައިބާ އެކު، 22 ވުޒާރާ ހުންނާނެކަމަށެވެ.
ކޮމެންޓް
މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.