ދިވެހިރާއްޖެއަކީ ބައިނަލްއަޤްވާމީ މުޖްތަމަޢުގައި އިޙްތިރާމް އަލުން އަނބުރާ ލިބިފައިވާ ޤައުމަކަށް ހަދަންޖެހޭ: ދުންޔާ

ދިވެހިރާއްޖެއަކީ ބައިނަލްއަޤްވާމީ މުޖްތަމަޢުގައި އިޙްތިރާމް އަލުން އަނބުރާ ލިބިފައިވާ ޤައުމަކަށް ހަދަންޖެހޭ ކަމަށް ކުރީގެ ފޮރިން މިނިސްޓަރު ދުންޔާ މައުމޫން ވިދާޅުވެއްޖެއެވެ.
ޖުމްހޫރީ ދުވަހުގެ މުނާޞަބަތުގައި ރާއްޖޭގެ ހުރިހާ ރައްޔިތުންނަށް ދުވަހުގެ ތަހުނިޔާ އަރިސްކުރައްވަމުން ދުންޔާ ވިދާޅުވީ، ރާއްޖޭގެ ޖުމްހޫރީ ހަޔާތުގައި ދިވެހި ރައްޔިތުންވަނީ ވަރަށް ގިނަ ގޮންޖެހުންތަކަކާ ކުރިމަތިލައި އަދި ވަރަށް ގިނަ ކާމިޔާބީ ތަކެއް ހޯދާފައިކަމަށާއި، ދިވެހިރާއްޖެއަކީ މިހާރު ތަރައްޤީގެ ރާސްތާގައި ތަރައްޤީގެ ކުރިއެރުންތަކެއް ހޯދާފައިވާ ޤައުމެއްކަމަށެވެ.
އެހެންނަމަވެސް، ދިވެހި ރައްޔިތުންނަށް ކުރިމަތިލާންޖެހިފައިވާ ގޮންޖެހުންތައް އަދިވެސް ވަރަށް ގިނަކަމަށް ފާހަގަކުރައްވަމުން ދުންޔާ ވިދާޅުވީ، އިންތިޚާބީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ދިވެހި ރައްޔިތުންގެ އުންމީދުތަކާއި ގާތަށް ދިއުމަށް ރަނގަޅަށް ގިނަ މަސައްކަތްތަކެއް ކޮށްދެއްވާނެކަމަށް އުންމީދުކުރައްވާކަމަށެވެ.
"އެގޮތުން، ދިވެހިރާއްޖޭގެ މިނިވަންކަމާއި އިސްތިޤްލާލު އަޅުގަނޑުމެން ހިމާޔަތްކުރަންޖެހޭ، ދިވެހިރާއްޖެއަކީ ބައިނަލްއަޤްވާމީ ދާއިރާގައި ބައިނަލްއަޤްވާމީ މުޖްތަމަޢުގައި އިޙްތިރާމް އަލުން އަނބުރާ ލިބިފައިވާ ޤައުމަކަށް އެބަ ހަދަންޖެހޭ. އަދި ދިވެހިރާއްޖޭގެ ކަންތައްތައް ނިންމެވުމުގައި ދިވެހި ރައްޔިތުންގެ ކަންތައްތައް ނިންމުމުގައި އަދި ރައްޔިތުންގެ ކުރިއެރުމުގައި ރައްޔިތުންގެ ބާރާއި ރައްޔިތުންގެ ބައިވެރިވުން އަޅުގަނޑުމެން އިތުރަށް ހަރުދަނާކުރަން އެބަޖެހޭ" ދުންޔާ ވިދާޅުވިއެވެ.
މީގެ އިތުރުން، ޑރ. މުޢިއްޒުވަނީ މަޖިލީހަށް ނުކުންނަވާ އަންހެން ބޭފުޅުންނަށް އިތުރަށް މަރުޙަބާ ވިދާޅުވެފައިކަމަށްވެސް ދުންޔާ ފާހަގަކުރެއްވިއެވެ.
"ޚާއްސަކޮށް އިޢުލާނުކުރައްވާފައި އެބައޮތް ވިމެން ފޯވާޑް ނުވަތަ ޕީޕީއެމް/ޕީއެންސީގެ ކޯލިޝަނުން 20 ޕަސެންޓު އަންހެން ބޭފުޅުން ނެރުއްވާނެކަމަށް. މިއީ ވަރަށް މުހިންމު ފިޔަވަޅެއް. އަލުގަނޑުގެވެސް އެދުމަކީ ވީހާވެސް ގިނަ އަންހެން ބޭފުޅުން އެ ކޯލިޝަން ތެރެއިން ނުކުމެވަޑައިގެން ކާމިޔާބީ ހޯއްދެވުން" ދުންޔާ ވިދާޅުވިއެވެ.ހަމައެއާއެކު، ރާއްޖޭގެ ކަންތައްތަކުގައި އަންހެނުން އަދި ޒުވާނުންގެ ދައުރާއި ޒުވާނުންގެ އަޑު އިތުރަށް ވަރުގަދަކުރަންޖެހޭކަމަށްވެސް ދުންޔާ ވިދާޅުވިއެވެ.






ކޮމެންޓް
މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.