މަގުޗާޓުގައި ވަނީ، ފުރަތަމަ 100 ދުވަހު ހާސިލު ކުރާނެ އެންމެ މަދު މިންވަރު: އިންތިޚާބީ ރައީސް
މިރޭ އިފްތިތާޙު ކުރި ވެރިކަމުގެ ފުރަތަމަ 100 ދުވަހުގެ ޕްލޭން "ހަފްތާ14"ގައި ވަނީ އެމަނިކުފާނުގެ ވެރިކަމުގެ ފުރަތަމަ 100 ދުވަސްތެރޭގައި އެންމެ މަދުން ކުރައްވަވާނެ ކަންކަން ކަމުގައި އިންތިޚާބީ ރައީސް ޑރ.މުޙައްމަދު މުޢިއްޒު ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ ދަރުބާރުގޭގައި ބޭއްވި ރަސްމިއްޔާތުގައި، ސަރުކާރުގެ ފުރަތަމަ 100 ދުވަހުގެ ލަނޑުދަނޑިތަކާއި ގުޅޭގޮތުން ވާހަކަފުޅު ދައްކަވަމުންނެވެ. ރައީސް މުޢިއްޒު ވިދާޅުވީ މިރޭ ލޯންޗުކުރި މަގުޗާޓުގައި ވަނީ އެމަނިކުފާނުގެ ސަރުކާރުން ހާސިލު ކުރާނެ އެންމެ މަދު މިންވަރު ކަމަށާއި، ވުޒާރާތަކާއި ކުންފުނިތަކުން އެއަށްވުރެ ގިނަ ކަންކަން ކުރާނެ ކަމަށެވެ.
އެމަނިކުފާނު އެކި ޕޯޑިއަމްތަކުގަޔާއި، މެނިފެސްޓޯގައި ހިމެނުއްވި ކޮންމެ ކަމެއް ވެސް، އެއީ އެންމެ ފުރިހަމައަށް ކުރާނެ ކަންކަން ކަމަށް ވެސް ރައީސް މުޢިއްޒު ވިދާޅުވިއެވެ.
"ދެއްކި ކޮންމެ ވާހަކައެއް، ކޮންމެ ޖުމްލައެއް އިރާދަކުރެއްވިއްޔާ، އަޅުގަނޑުމެން، މިތާގަ މިއޮތް ޓީމް، ޙާސިލު ކޮށްދޭނަން." ހުކުރު ދުވަހު ރާއްޖޭގެ ވެރިކަމާއި ޙަވާލުވެވަޑައިގަންނަވާނެ ރައީސް މުޢިއްޒު ވިދާޅުވިއެވެ.
މުޢިއްޒު މިރޭ ވެސް ނޫޫސްވެރިންނަށް ދެއްވި ޔަޤީންކަމަކީ އެއްވެސް ކަމެއް ނުފޮރުވާނެކަމުގެ ޔަޤީންކަމެވެ. އަދި އެމަނިކުފާނުގެ ސަރުކާރުގެ ދެ ފުށް ވެސް ރައްޔިތުންނަށް ފެންނާނެ ކަމަށް ވެސް ވިދާޅުވަމުން ގެންދަވާ ވާހަކަފުޅު ތަކުރާރު ކުރެއްވިއެވެ.
މިރޭ ވަނީ 172 ވަޢުދު ހިމެނޭ ހަފްތާ14 މަގުޗާޓުގެ އިތުރުން، ޕީއެންސީގެ ރިޔާސީ ޓިކެޓު ލިބިވަޑައިގެންނެވި ދުވަހުން ފެށިގެން، މުޢިއްޒު އެކި ރަށްރަށުގެ ޕޯޑިއަމްތަކާއި ނޫޫސްވެރިންގެ ބައްދަލުވުންތަކުގައި ދެއްކެވި ހުރިހައި ވާހަކަފުޅެއް ހިމެނޭ ފޮތެއް ވެސް ނެރުއްވައިފައެވެ.
