ފެސިލިޓީތަކުގައި މަސައްކަތްކުރުމަށް ރަށްރަށުން ސިއްޙީ އެހީތެރިން ގެންނަނީ
މާލެ ސަރަހައްދުގައި ހުރި ކޮވިޑް-19ގެ ބަލި މީހުންނަށް ފަރުވާދޭ ފެސިލިޓީތަކަށް އަތޮޅުތަކުން ސިއްޙީ އެހީތެރިން ގެނައުމުގެ މަސައްކަތް ކުރަމުންދާކަމަށް ހެލްތް އިމަޖެންސީ އޮޕަރޭޝަން ސެންޓަރު (އެޗްއީއޯސީ)ން ހާމަ ކޮށްފިއެވެ.
ރޭ ކުރިއަށް ދިޔަ ނޫސްވެރިންގެ ބައްދަލުވުމުގައި ޓެކްނިކަލް އެޑްވައިޒަރީ ގްރޫޕް (ޓެގް)ގެ މެމްބަރު ޑރ. އަހްމަދު ޝަހީދު ވިދާޅުވީ ބަލި މީހުން އެންމެ ބޮޑަށް އިތުރުވަމުން ދަނީ މާލޭ ސަރަޙައްދުގައިކަމުން، މި ސަރަޙައްދަށް ޑޮކްޓަރުންނާއި ނަރުހުން އިތުރުކުރަން ޖެހިފައިވާ ކަމަށެވެ.
މާލެ ސަރަޙައްދުގައި މަސައްކަތްކުރާ ގިނަ ސިއްޙީ އެހީތެރިން މިހާރުވެސް ކޮވިޑް-19ގެ ފަރުވާގެ ކަންކަމުގައި ހަރަކާތެރިވަމުން އަންނައިރު، އޭގެ ތެރެއިން ގިނަ ބަޔަކު މިހާރު ވެސް ދަނީ ފައްސިވަމުންނެވެ. ބައްޔަށް ފައްސިވާ މީހުން ގިނަވެ، މެޑިކަލް ފެސިލިޓީތަކުގައި އެޑްމިޓްކޮށްގެން ފަރުވާދޭ މީހުންގެ އަދަދު މިމަހު ދެގުނައަށް އިރުރުވެފައިވާއިރު، މިވަގުތު ދިމާވެފައިވާ އެންމެ ބޮޑު ގޮންޖެހުމަކީ އިންސާނީ ވަސީލަތް ނެތުމުގެ ދަތިކަމެވެ.
ޑރ.ޝަހީދު ވިދާޅުވީ އަތޮޅުތަކުގައި މަސައްކަތްކުރާ ސިއްޙީ އެހީތެރިންގެ އިތުރަށް ރާއްޖެއިން ބޭރުން ސިއްޙީ އެހީތެރިން ހޯދުމުގެ މަސައްކަތް ވެސް ކުރަމުންދާ ކަމަށެވެ.
"ރީޖަނަލް ފެސިލިޓީތަކުގައި މިވަގުތު ބަލި މީހުންނެ ނެތް. އެހެންވީމައި އަތޮޅުތަކުން ގްރޭޓަރ މާލެ އޭރިއާ ފެސިލިޓީތަކަށް ސިއްޙީ އެހީތެރިން އެބަ ގެނެވޭ. ދެން ރާއްޖެއިން ބޭރުން އެހީތެރިން ގެނައުމަށް ވެސް މަސައްކަތްކުރަން. ނަމަވެސް އިންޑިއާފަދަ ޤައުމުތަކުގައިވެސް ބަލީގެ ޙާލަތު ގޯސްވުމުން ލިބުން ދަތި." ޝަހީދު ވިދާޅުވިއެވެ.
ކޮވިޑް-19 ޖެހޭ މީހުންގެ އަދަދު އިތުރުވެ ބަލި ކޮންޓްރޯލް ނުވެ އިތުރުވަމުންދާނަމަ ކޮވިޑް ނޫންބަލިތަކަށް ފަރުވާދިނުމުގައި މަސައްކަތްކުރާ ޑޮކްޓަރުންނާއި ނަރުހުންވެސް، އެ ބައްޔަށް ފަރުވާދިނުމަށް ގެންނަންޖެހޭ ޙާލަތަށް ދާނެކަމަށް ޑރ. ޝަހީދު ވަނީ ވިދާޅުވެފައެވެ.
