ވިލިނގިލީގެ މޮނިޓަރިން ހާލަތު ނެގުމުން ކައުންސިލްގެ ކަންބޮޑުވުން
ގއ. ވިލިނގިލި މޮނިޓަރިންގެ ހާލަތަށް ގެންދިއުމަށްފަހު، އިއްޔެ މެންދުރު އެ ހާލަތުން ނެގުމާ ގުޅިގެން ރަށު ކައުންސިލުން ކަންބޮޑުން ފާޅުކޮށްފި އެވެ.
ވިލިނގިލި މޮނިޓަރިންގެ ހާލަތަށް ގެންދިއައީ އެރަށުގައި ހޯމް ކަރަންޓީނުގައި ހުރި މީހަކު ކޮވިޑަށް ފައްސިވުމާ ގުޅިގެންނެވެ.
ނަމަވެސް އެ ރަށުގެ މޮނިޓަރިން އުވާލިކަން އިއްޔެ 11:28 ގައި ކައުންސިލަށް ވަނީ އަންގާފައެވެ.
އެޗްޕީއޭގެ ނިންމުމާ ގުޅިގެން ރަށު ކައުންސިލުން ނެރުނު ބަޔާނެއްގައި ބުނެފައި ވަނީ ރަށުގެ މޮނިޓަރިންގެ ހާލަތު އުވާލީ ގއ. އަތޮޅު ހޮސްޕިޓަލުގެ ޕަބްލިކް ހެލްތު އޮފިސަރު އަދި ހޮސްޕިޓަލުން ކޮވިޑް19 އަށް ކަނޑައަޅާފައި ހުންނަވާ ފޯކަލް ޕޮއިންޓް އެޗްޕީއޭއަށް ދެއްވާފައިވާ ދޮގު މައުލޫމާތު ތަކެއްގެ މައްޗަށް ބިނާކޮށް ކަމަށެވެ.
ކައުންސިލުން ބުނެފައި ވަނީ ފައްސިވި މީހާ އާއި އެރަށު ބަޔަކު ޑައިރެކްޓް ކޮންޓެކްޓު ވެފައިވާ ކަމަށެވެ.
އެހެންކަމުން ފޯކަލް ޕޮއިންޓް ދޮގު މައުލޫމާތު ތަކެއް ހިއްސާކުރުމުގެ ސަބަބުން، ރަށުގެ މޮނިޓަރިންގެ ހާލަތު އުވާލުމަކީ ކައުންސިލާއި ކޮވިޑް19 ވިލިނގިލި ޓާސްކްފޯސް ކޮމެޓީން ގަބޫލުކުރާ ސައްހަ މައުލޫމާތުތަކެއް ކަމަށް ނުވާތީ، އެކަން ވަރަށް ބޮޑަށް ކުށްވެރި ކުރާ ކަމަށެވެ.
އެރަށުން ކޮވިޑް19 އަށް ފައްސިވި މީހާ އާއި ޑައިރެކްޓް ކޮންޓެކްޓުވި ފަރާތްތަކުގެ އެންމެ ފުރިހަމަ މައުލޫމާތު އެޗްޕީއޭއަށް ފޯރުކޮށްދިނުމުގެ މަސައްކަތް ކައުންސިލުން ކުރަމުން އަންނަ ކަމަށާއި، އެހެންކަމުން ކައުންސިލުން މިކަމާ ގުޅިގެން އަޅާފައިވާ ރައްކާތެރިކަމުގެ ފިޔަވަޅުތަކަށް އެންމެހާ ރައްޔިތުން ސަމާލުކަން ދިނުމަށް ވަނީ އެދިފަ އެވެ.
ކައުންސިލުން ބުނީ ފައްސިވި މީހާ އާއި ޑައިރެކްޓް ކޮންޓެކްޓުވި ފަރާތްތަކުގެ އެންމެ ފުރިހަމަ މައުލޫމާތު އެޗްޕީއޭއަށް ފޯރުކޮށް، އެފަރާތްތަކުގެ ސާމްޕަލް ނަގައިި ނިމެންދެން ވިލިނގިލި މޮނިޓަރިން ހާލަތުގައި ބޭއްވުމަށް ކުރަންޖެހޭ އެންމެހާ މަސައްކަތް ކުރަމުން އަންނަ ކަމަށެވެ.
