ޕްރައިމަރީއަކާ ނުލައި ނޫސްވެރިޔާ އަޒާންއަށް މަޖިލިސް ޓިކެޓް ކަށަވަރުވެއްޖެ

އަންނަ އަހަރު އޮންނަ ރައްޔިތުންގެ މަޖިލީހުގެ އިންތިޚާބުގެ އައްޑޫ ސިޓީގެ ހިތަދޫ މެދު ދާއިރާގެ ގޮނޑިއަށް ވާދަކުރާ ދިޔަރެސް ނޫހުގެ ކޯ ފައުންޑަރ, ނޫސްވެރިޔާ އަހްމަދު އަޒާނަށް ޕްރައިމަރީއަކާއި ނުލައި ޕީޕީއެމް ޕީއެންސީގެ ޓިކެޓް ކަށަވަރުވެއްޖެއެވެ.

Ads by MWSC

އަޒާނަށް ޕާޓީގެ ޓިކެޓް ކަށަވަރުވެފައި ވަނީ އެ ދާއިރާގެ ގޮނޑިއަށް އެ ޕާޓީން އެހެންފަރާތަކުން ޕްރައިމަރީގައި ވާދަނުކުރާތީއެވެ.

އަޒާނަކީ މެލޭޝިޔާގެ ކާޓެން ޔުނިވާސިޓީން  ފައުންޑޭޝަން އިން މީޑިޔާ ސްޓަޑީޒް ގެ ތައުލީމް ހާސިލްކުރައްވާފައިވާ ތައުލީމީ ޒުވާނެކެވެ. އަދި އަޒަރު ބައިޖާނުގެ ސަރުކާރުން ދިން ސްކޯލާޝިޕެއްގެ ދަށުން ޑިޕްލޮމެޓިކް އެކަޑަމީ އިން އިންޓަރނޭޝަނަލް ރިލޭޝަން އިން އަޒާން ވަނީ ބެޗެލާސް ޑިގްރީ ވެސް ހާސިލްކުރައްވާފައެވެ.

މަޖިލީހުގެ އެ ދާއިރާގެ ގޮނޑިއަށް ވާދަކުރަން އިއުލާން ކުރައްވަމުން އަޒާން ވިދާޅުވީ ރާއްޖެއަށް ހެޔޮ އިސްލާހީ ބަދަލުތަކެއް ގެނައުމަށް ފެށި މަސައްކަތް ކުރިއަށް ގެންދިއުމަށް އެންމެ ރަނގަޅު މަގަކީ 20 ވަނަ ރައްޔިތުންގެ މަޖިލީސް ކާމިޔާބުކުރުން ކަމަށެވެ. އެެހެންކަމުން ރައްޔިތުންގެ މަޖިލީހުގެ މެންބަރެއްގެ ގޮތުގައި މަސައްކަތްކޮށް ހެޔޮ ބަދަލުތަކެއް ގެނޭވެކަމަށް ގަބޫލުކުރައްވާ ކަމަށާއި، ޕީޕީއެމް ޕީއެންސީ ޓިކެޓުގައި މަޖިލީހުގެ އައްޑޫ ސިޓީގެ ހިތަދޫ މެދު ދާއިރާގެ ގޮނޑިޔަށް ވާދަކުރެއްވުމަށް ނިންމެވި ސަބަބަކީވެސް އެއީކަމަށް ވިދާޅުވި އެވެ.

މިދިޔަ ސަރުކާރުގައި އަޒާން ފާހަގަ ވެގެން ގޮސްފައިވަނީ ސަރުކާރަށް ފާރަވެރިވެ, ސަރުކާރު ޖަވާބުދާރީ ކުރުމުގައި ހަރަކާތްތެރިވި ނޫސްވެރިއެއްގެ ގޮތުގައެވެ.