Wednesday, 18 November 2026
Advertisement
Ooredoo — Airfibre (leaderboard)
ޚަބަރު

ލޯ ޑިގްރީ އިމްތިޙާނުތައް ހަދަން ވަކި ރަށަކަށް ދާކަށް ނުޖެހޭ: ބާ ކައުންސިލް

ލޯ ޑިގްރީގެ އިމްތިޙާނުތައް މަރުކަޒަކަށް ހާޒިރުވެގެން ހަދަން ލާޒިމުކުރި ނަމަވެސް، ދަރިވަރުން ވަކި ރަށަކަށް ދަތުރުކުރުން މަޖުބޫރު ނޫން ކަމަށް ބާ ކައުންސިލުން ބުނެފިއެވެ.

ދަރިވަރުންތަކެއް އިމްތިޙާނު ހޯލެއްގައި / ފޮޓޯ: އެމްއެމް
ދަރިވަރުންތަކެއް އިމްތިޙާނު ހޯލެއްގައި / ފޮޓޯ: އެމްއެމް

ލޯ ޑިގްރީތަކުގެ ފެންވަރު ހިފެހެއްޓުމަށް ބާ ކައުންސިލުން އެކުލަވައިލާފައިވާ "މިނިމަމް ސްޓޭންޑަޑްސް"އަށް ގެނައި ދެވަނަ އިސްލާހަށް އަމަލުކުރަން ފަށާނެ ތާރީޚު އެ ކައުންސިލުން މިހާރު ވަނީ އިއުލާންކޮށްފައެވެ.

މި އިސްލާހަށް އަމަލުކުރަން ފެށުމަށް ހަމަޖެހިފައި ވަނީ 1 ޖެނުއަރީ 2027އިން ފެށިގެންނެވެ.

މި އިސްލާހުގެ ދަށުން، ކޮލިފައިންގ ލޯ ޑިގްރީތަކުގެ އިމްތިޙާނުތައް މަރުކަޒުތަކަށް ހާޒިރުވެގެން ހަދަން ލާޒިމުކުރެއެވެ. ނަމަވެސް ބާ ކައުންސިލުން ބުނީ، މީގެ މާނައަކީ ދަރިވަރުން މާލެއަށް ނުވަތަ ވަކި ރަށަކަށް ދަތުރުކުރުން ނޫން ކަމަށެވެ. ދަރިވަރުން ތިބި ރަށެއްގެ ސްކޫލެއް ނުވަތަ ކައުންސިލް އިދާރާ ފަދަ ތަނެއް މެދުވެރިކޮށް އިމްތިޙާނު ކުރިއަށް ގެންދިއުމުގެ އިޚްތިޔާރު ކިޔަވައިދޭ މަރުކަޒުތަކަށް އޮންނާނެ ކަމަށް އެ ކައުންސިލުން ފާހަގަކުރިއެވެ.

މި ބަދަލާ އެކު ވެސް ކޯހުގެ މަންހަޖަށާއި، ކިޔަވައިދޭ މާއްދާތަކަށް އަދި މުއްދަތަކަށް އެއްވެސް ބަދަލެއް ނާންނާނެއެވެ. އަދި އޮންލައިންކޮށް ކްލާސްތައް ކުރިއަށް ގެންދިއުމަށް އެއްވެސް ހުރަހެއް ނެތް ކަމަށާއި، ދަރިވަރުން މިހާތަނަށް ހާސިލުކޮށްފައިވާ ކްރެޑިޓްތަކަށް ވެސް އުނިކަމެއް ނާންނާނެ ކަމަށް ބާ ކައުންސިލުން ބުންޏެވެ.

ބާ ކައުންސިލުން ބުނި ގޮތުގައި މި ބަދަލު ގެނައުމުގެ މައިގަނޑު މަގުސަދަކީ ރާއްޖޭގެ ގާނޫނީ ތައުލީމުގެ ފެންވަރު މަތިކުރުމާއި، މޯލްޑިވްސް ކޮލިފިކޭޝަން އޮތޯރިޓީ (އެމްކިއުއޭ)ގެ މިންގަނޑުތަކާ އެއްގޮތަށް އިމްތިޙާނުތަކުގެ ނަޒާހާތްތެރިކަން ކަށަވަރު ކުރުމެވެ. ޤާނޫނީ ދާއިރާއަކީ ރައްޔިތުންގެ ޙައްގުތަކާ ސީދާ ގުޅިފައިވާ ޒިންމާދާރު ދާއިރާއަކަށް ވުމުން، އެ ދާއިރާއަށް ނުކުންނަ ފަރާތްތަކަކީ ފެންވަރު ރަނގަޅު ތައުލީމާއި ތަމްރީނު ލިބިފައިވާ ބަޔަކަށް ހެދުން މުހިންމު ކަމަށް އެ ކައުންސިލުން ދެކެއެވެ.

ރިއެކްޝަން

Advertisement
Allied Insurance — Square (box)

ކޮމެންޓް

މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.