Wednesday, 18 November 2026
Advertisement
HDC — Share-Below (leaderboard)
ޚަބަރު

އަންނަ އަހަރު މަޝްރޫޢުތައް ނިންމައި ރައްޔިތުންނާ ހަވާލުކުރާނެ ކަމަށް ރައީސް ވިދާޅުވެއްޖެ

އަންނަ އަހަރަކީ މަޝްރޫޢުތައް ނިންމައި ރައްޔިތުންނަށް އޭގެ ފައިދާ ލިބޭނެ އަހަރު ކަމަށާއި، މިހާރު ހުރި މަޝްރޫޢުތަކުގެ 70 އިންސައްތަ އަންނަ އަހަރު ނިމޭނެ ކަމަށް ރައީސް ވިދާޅުވެއްޖެއެވެ.

ފޮޓޯ: ރައީސުލްޖުމްހޫރިއްޔާގެ އޮފީސް
ފޮޓޯ: ރައީސުލްޖުމްހޫރިއްޔާގެ އޮފީސް

އަންނަ އަހަރަކީ ރާއްޖޭގެ އެކި ކަންކޮޅުތަކުގައި ހިންގާ ތަރައްޤީގެ މަޝްރޫޢުތައް ނިންމައި، ރައްޔިތުންނަށް އޭގެ މަންފާ ލިބޭނެ އަހަރު ކަމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިޢުލާނު ކުރައްވައިފިއެވެ.

ރައީސް ވިދާޅުވީ އެމަނިކުފާނު ވެވަޑައިގެންނެވި އެއްވެސް ވަޢުދުފުޅެއް ހަނދުމަފުޅު ނުނެތޭ ކަމަށާއި، ހުރިހާ ވަޢުދުތަކެއް ފުއްދަވާނެ ކަމުގެ ޔަޤީންކަން ދެއްވާ ކަމަށެވެ.

ބައެއް ސަބަބުތަކާ ހުރެ ބައެއް މަޝްރޫޢުތައް މަޑުޖެހިފައިވީ ނަމަވެސް، އަންނަ އަހަރުގެ ބަޖެޓު ތައްޔާރުކުރީ މަޝްރޫޢުތައް ހަލުވިކަމާ އެކު ކުރިއަށް ގެންދިއުމަށް އިސްކަންދީގެން ކަމަށް ރައީސް ފާހަގަކުރެއްވިއެވެ. އެގޮތުން މަގު ހެދުމާއި، ބަނދަރު ތަރައްޤީ ކުރުމާއި، ފެނާއި ނަރުދަމާގެ އިތުރުން ގޮނޑުދޮށް ހިމާޔަތް ކުރުމާއި ކުޅިވަރުގެ މަޝްރޫޢުތައް ބާރުސްޕީޑުގައި ކުރިއަށްދާނެ ކަމަށް ވިދާޅުވިއެވެ.

ރައީސް ޔަޤީންކަން ދެއްވި ގޮތުގައި މިހާރު ފަށާފައިވާ އަދި ސޮއިކޮށްފައިވާ މަޝްރޫޢުތަކުގެ 70 އިންސައްތަ އަންނަ އަހަރު ނިންމައި ރައްޔިތުންނާ ހަވާލުކުރެވޭނެއެވެ. "މި އަހަރަކީ ލޯނު ދެއްކުމުގެ އަހަރު. މި އަންނަ އަހަރަކީ މަޝްރޫޢުތައް ނިންމާ ރައްޔިތުންނަށް ހަވާލުކުރާނެ އަހަރު،" ރައީސް ވިދާޅުވިއެވެ.

ބިން ހިއްކުމުގެ މަޝްރޫޢުތައް އަވަސް ކުރުމަށްޓަކައި އަންނަ އަހަރުގެ މާޗް މަހު ރާއްޖެއަށް ބޮޑު ޑްރެޖަރެއް ގެންނަން ނިންމާފައިވާ ކަމަށް ވެސް ރައީސް ހާމަކުރެއްވިއެވެ. މިއީ އެމްޓީސީސީގެ 'މަހާޖައްރާފު'އަށް ވުރެ ތިން ގުނަ ބޮޑު އުޅަނދެއް ކަމަށާއި، މީގެ އިތުރުން މަޝްރޫޢުތަކަށް ބޭނުންވާ ބޮޑު ހިލަ ގެނެވޭނެ އިންތިޒާމުތައް ވެސް މިހާރު ހަމަޖެހިފައިވާ ކަމަށް ވިދާޅުވިއެވެ.

މީގެ އިތުރުން، އަންނަ އަހަރުގެ ތެރޭގައި އެއް ފަހަރާ ގިނަ ރަށްތަކެއްގެ މަގު ހެދުމުގެ މަސައްކަތް ފެށިގެންދާނެ ކަމަށްވެސް ރައީސް މުޢިއްޒު ވިދާޅުވިއެވެ.

ރިއެކްޝަން

Advertisement
HDC — Sidebar (box)

ކޮމެންޓް

މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.