ސަރުކާރު ވައްޓައިލަން އުޅުމަކީ އިންތިޚާބުން ބަލިވާާން އުޅޭކަމުގެ ނިޝާނެއް: އާޒިމާ

މާލެ ސިޓީގެ މޭޔަރުކަމުގެ މަޤާމަށް ޕީޕީއެމް، ޕީއެންސީގެ ކޯލިޝަނުން ވާދަކުރައްވާ އާޒިމާ ވިދާޅުވީ އިންތިޚާބުތަކުން ބަލިވާނެކަން އެނގުނީމާ ސަރުކާރު ވައްޓާލަން އުޅުމަކީ ބަލިވާކަމުގެ ނިޝާނެއް ކަމަށެވެ. އަދި މޮޅުވުމަކީ ދަނޑުމަތީގައި މޮޅުވުންކަމަށްވެސް އާޒިމާ ވިދާޅުވިއެވެ.އާޒިމާ ވިދާޅުވީ ރައީސުލްޖުމްހޫރިއްޔާ އަދި އޭނާގެ ނާއިބު، މަޤާމުން ވަކިކުރެވޭނީ ރައްޔިތުންގެމަޖިލީހުގެ ޖުމްލަ މެންބަރުންގެ ތިންބައިކުޅަ ދެބައިގެ އަޣްލަބިއްޔަތުން އެކަނިކަމަށެވެ. އަދި ވޯޓް އޮފް ނޯ ކޮންފިޑެންސްއާއި އިމްޕީޗްމަންޓްއަކީ ތަފާތު ދެކަމެއް ކަމަށްވެސް އާޒިމާ ވިދާޅުވިއެވެ.
ކޮމިޓީން ނިންމި ނިންމުމުގައި ބުނާ ގޮތުގައި ރައީސް އާއި ނާއިބު ރައީސް އަޒުލު ކުރަން ޤަރާރެއް ހުށަހެޅޭނީ ސަބަބާއެކު މަޖިލީހުގެ ތިންބައިކުޅަ އެއްބައި މެންބަރުންގެ ސޮޔާއެކުއެވެ.
އެއަށްފަހު ލިޔުމަކުން މަޖިލީހަށް ހުށަހަޅާ ޤަރާރުގެ ނޯޓިސް ދެ ދުވަހުގެ ތެރޭގައި ރައީސް އާއި ނައިބު ރައީސްއަށް ދޭން ޖެހޭ ކަމަށް އެ ގަވާއިދުތަކަށް އިސްލާހު ގެނައުމަށް ކޮމެޓީން ފާސްކުރިއެވެ. އެ ނޯޓިސް ދޭތާ 14 ދުވަހުގެ މުއްދަތަކަށް ފަހު އެންމެ އަވަހަށް އަންނަ ރަސްމީ ބަންދު ނޫން ދުވަހަކު ބާއްވާ ޖަލްސާއަށް އެ ޤަރާރު ހުށަހަޅަން ޖެހޭއިރު އެ ޖަލްސާގައި އިތުރު އެއްވެސް މަސައްކަތެއް ކުރުމަށް އެޖެންޑާ ކޮށްގެން ނުވާނެ ކަމަށް ކޮމިޓީން ފާސްކޮށްފައި ވެއެވެ.
އާންމު ކޮމެޓީން ނިންމައިފައި ވަނީ، ރައްޔިތުންގެ މަޖިލީހުގެ ޖުމްލަ މެންބަރުންގެ އަދަދު ގުނުމުގައި އެ ވަގުތަކު މެންބަރުންގެ ގޮތުގައި ދެމި ތިބި މެންބަރުންގެ އަދަދު އެއީ ޖުމްލަ އަދަދު ކަމުގައި ބަލާ ގޮތަށެވެ.
ކުރީން އޮތް ގޮތުން މަޖިލީހުގެ ޖުމްލަ މެންބަރުންގެ އަދަދު ގުނުމުގައި އަމަލު ކުރަނީ މަޖިލީހުގެ ޖުމްލަ އަދަދަށެވެ.
މި އިސްލާޙު މަޖިލިސް ތަޅުމުން ފާސްވެއްޖެ ނަމަ، އެމްޑީޕީގައި މިހާރު އޮތް މެޖޯރިޓީން ރައީސާއި ނައިބު ރައީސް މަޤާމުން ދުރުކުރެވޭނެއެވެ.
އެ ހާލަތުގައި މައްސަލަ ފާސްކުރަން ބޭނުންވާނީ 54 މެންބަރުންގެ ވޯޓެވެ. ކުރިން ނަމަ 58 މެންބަރުންގެ ވޯޓު ބޭނުން ވާނެއެވެ. އެމްޑީީޕީގެ ޕީޖީ ގްރޫޕްގައި 56 މެމްބަރުން އެބަތިއްބެވިއެވެ.






ކޮމެންޓް
މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.