މިދިޔަ ފަސް އަހަރު 69،000 އަށް ވުރެ ގިނަ ވެހިކަލް ރަޖިސްޓަރީ ކޮށްދީފައިވޭ: އަމީން
ނިމިދިޔަ ފަސް އަހަރު މާލެއާ ރާއްޖެތެރޭގެ އެކި ރަށްރަށް ހިމެނޭހެން 69،000 އަށް ވުރެ ގިނަ ވެހިކަލް ރަޖިސްޓަރީ ކޮށްދީފައިވާ ކަމަށް ޓްރާންސްޕޯޓް މިނިސްޓަރު މުހައްމަދު އަމީން ވިދާޅުވެއްޖެއެވެ.
މިނިސްޓަރު އަމީން މިހެން ވިދާޅުވީ ޓްރާންސްޕޯޓު މިނިސްޓްރީން މިއަދު ބޭއްވި ނޫސްވެރިންގެ ބައްދަލުވުމުގައި ވާހަަކަދައްކަވަމުންނެވެ.
އެގޮތުން ނިމިދިޔަ ފަސް އަހަރުގެ ތެރޭގައި އާދަޔާ ހިލާފަށް ގިނަ އަދަދެއްގެ އުޅަނދު ރަޖިސްޓްރީ ކޮށްފައިވާ ކަން މިނިސްޓަރު ވަނީ ފާހަގަކުރައްވާފައެވެ.
އޭގެ ތެރޭގައި 69،780 އުޅަނދު އަލަށް ރަޖިސްޓަރީ ކޮށްދީފައިވާކަން ހާމަކޮށް މިނިސްޓަރު އަމީން ވިދާޅުވީ 42،000 އަށް ވުރެ ގިނަ އުޅަނދު ރަޖިސްޓަރީކުރީ މާލެ އަށް ކަމަށެވެ.
އެހެން ކަމުން މި ސްކޭލްގައި ވެހިކަލް އިތުރުވަމުންދާ ކަމަށްވާނަމަ މާލެ ސަރަހައްދު ނުހިފެއްޓިގެން ދާނެ ކަމަށް މިނިސްޓަރު އަމީން ވަނީ ވިދާޅުވެފައެވެ.
ހަމަ އެހެންމެ ޓްރެފިކް މައްސަލަތައް ހައްލު ކޮށްފައިވާ ސިންގަޕޫރު ނުވަތަ ދުބާއީ ފަދަ ގައުމަކުން ތަޖުރިބާކާރުން ރާއްޖެ ގެނެސް ދިނުމަށް ވެސް ފޮރިން މިނިސްޓަރު މޫސާ ޒަމީރަށް ދަންނަވާފައިވާ ކަމަށް މިނިސްޓަރު އަމީން ވިދާޅުވެފައި ވެއެވެ.
މީގެ އިތުރުން އަމީން ވިދާޅުވީ، ވެހިކަލްތައް މަދުކުރުމަށްޓަކައި އެކިއެކި މުއައްސަސާތަކާ ގުޅިގެން ފަންނީ މަސައްކަތްތަކެއް ކުރަމުން އަންނަ ކަމަށެވެ.
