ނައިބު ރައީސްގެ މޮންޓަނޭގްރޯގެ ދަތުރުުފުޅަށް ހޭދަވނީ ހަ ލައްކައެއްހާ ރުފިޔާ
މޮންޓެނީގްރޯގެ ތިންވަނަ ކޮންގްރެސް އޮފް ޑިމޮކްރެޓިކް މޮންޓެނީގްރޯގައި ބައިވެރިވެވަޑައިގަތުމަށްޓަކައި ރައީސުލްޖުމްހޫރިއްޔާގެ ނައިބު އަލްއުސްތާޒު ޙުސައިން މުޙައްމަދު ލަޠީފް އެ ގައުމަށް ކުރެއްވި ރަސްމީ ދަތުރުފުޅުގެ ޚަރަދުގެ ތަފުސީލު ސަރުކާރުން އިސްވެ ހާމަކޮށްފިއެވެ.
ރައީސް އޮފީހުން މިއަދު ހާމަކުރި ގޮތުގައި މިދިޔަ މަހުގެ 23 އިން 27 އަށް ނައިބު ރައީސް މޮންޓެނީގްރޯއަށް ކުރެއްވި ދަތުރުފުޅުގެ ޚަރަދަށް ހޭދަވީ ޖުމްލަ 589,736.65 ރުފިޔާއެވެ.
ނައިބު ރައީސާއި މިނިސްޓްރީ އޮފް ފޮރިން އެފެއާޒްގެ އެމްބެސެޑަރ-އެޓް-ލާރޖް މުޙައްމަދު ޙުސައިން ޝަރީފް (މުންދު) ހިމެނިވަޑައިގަންނަވާހެން ޖުމްލަ ފަސް ބޭފުޅުން މި ދަތުރުފުޅުގައި ބައިވެރިވެވަޑައިގެންނެވިއެވެ.
ޚަރަދުތަކުގެ ތަފުސީލު:
1. ބިޒްނަސް ކުލާސް ފަސް ޓިކެޓް - 492,746.10 ރުފިޔާ
2. ފަސް ބޭފުޅުންގެ ޕޮކެޓް މަނީ - 64,638 ރުފިޔާ
3. ފަސް ބޭފުޅުންގެ ފަރިއްކޮޅު ޚަރަދު (މޮންޓެނީގްރޯ) - 23,823.72 ރުފިޔާ
4. ފަސް ބޭފުޅުންގެ ފަރިއްކޮޅު ޚަރަދު (އިސްތަންބޫލް) - 7,895.07 ރުފިޔާ
5. ވިސާ ޚަރަދު 633.76 ރުފިޔާ
ރައީސާއި ނައިބު ރައީސްގެ ރަސްމީ ދަތުރުފުޅުތައް ނިމޭތާ 15 ދުވަސްތެރޭގައި އެ ދަތުރުފުޅެއްގެ ޚަރަދުތަކުގެ ތަފުސީލު އާންމުކުރުމަކީ ރައީސް ޑރ.މުޙައްމަދު މުޢިއްޒުގެ ވައުދުފުޅެކެވެ.
Ads by STO
