ތަޖުރިބާގެ އަލީގައި އާޒިމް ވިދާޅުވަނީ ފުށިދިއްގަރު ހިއްކަން ހަރަދު ވާނީ ފަސް ބިލިއަން ކަމަށް!
''ރައްޔިތުންގެ މިހާ ބޮޑު ކަމެއް 40 އަހަރު ނުވަތަ ބައެއް ބޭފުޅުން 20 އަހަރުވަންދެން ބައެއް މީހުން ކުޑަ ކޮޓަރީގައި ބޮޑުވެގެން ގޮސް އެހާ ހާލުގައި އުޅެމުންދާއިރުގައި އެކަމަށް ސަމާލުކަން ކުޑަކަން ހަމަ ހިތާމައާއެކު މިއަދު މާލޭގެ ރައްޔިތުން އަދި ދަފްތަރުގެ ރައްޔިތުން އައްޔަންކޮށްފައި ހުރި އިންތިހާބީ މޭޔަރުގެ ހައިސިއްޔަތުން ވަރަށް ހިތާމަކުރަން'' އާޒިމް ވިދާޅުވިއެވެ.
އާޒިމް ވިދާޅުވީ މާލޭގެ ރައްޔިތުންނަށް ގޯތި ދޭނެ ސަރަހައްދުތައް ނިމިދިޔަ އެމްޑީޕީ ސަރުކާރުން ކަނޑައަޅާފައިވާ ކަމަށާއި ފުށިދިއްގަރުން 10 ހެކްޓަރުގެ ބިން ހިއްކުމުގެ ބަދަލުގައި ކުރީ ސަރުކާރުން ކަނޑައެޅި ސަރަހައްދުތަކުން ބިން ހިއްކަން ފަށަންޖެހޭ ކަމަށެވެ. އެއީ ގުޅީފަޅު، ގިރާވަރުފަޅުގެ އިތުުރުން އުތުރު ތިލަފަޅުއެވެ.
އަދި ފުށިދިއްގަރު ފަޅަށް 10 ބިލިއަން ދާނެ ކަމަށް ވިދާޅުވިޔަސް، އަޅުގަނޑަކީ މިކަމުގައި އެންމެ ގިނަ ތަޖުރިބާ ހުރި އެކަކު ވާހަކަ ދައްކަމުން މިދަނީ ފަސް ބިލިއަން ދާނީ
އާޒިމް ވިދާޅުވީ ހުރިހާ ކަމެއްގެ އަސްލަކީ ގެދޮރުވެރިކަމުގެ މައްސަލައަށްވާއިރު މޭޔަރުގެ ހައިސިއްޔަތުން ރައްޔިތުންގެ އެކަމަށް ހައްލެއް ހޯދައި ދިނުމަކީ އޭނާގެ ޒިންމާއެއް ކަމަށެވެ. އެހެންކަމުން މާލޭގެ ރައްޔިތުން އެދޭ ގޮތަށް ގޯތިދޭން ކަނޑައެޅި ސަރަހައްދުތައް ހިއްކަން އާޒިމް ވަނީ ރައީސް ޑރ މުހައްމަދު މުއިއްޒަށް ގޮވާލައްވާފައެވެ.
އޭނާ ވިދާޅުވީ، ސަރުކާރުން ހިންގާ ތަރައްގީގެ އެއްވެސް މަޝްރޫއުއަކާއި އޭނާ ދެކޮޅު ނޫން ކަމަށެވެ. ފުށިދިއްގަރުފަޅު ހިއްކުމާއިވެސް އޭނާ ދެކޮޅު ނަހައްދަވާ ކަމަށް ވިދާޅުވިއެވެ. ނަމަވެސް ފަސޭހައިން ރައްޔިތުންނަށް ދެވޭ ހިސާބުތައް ހިއްކުން މާ މުހިއްމު ކަމަށް ވިދާޅުވިއެވެ.
އުތުރުތިލަފަޅު ގޯތި ދިނުމުގެ ވާހަކަ އާޒިމް ފާހަގަކޮށްފައިވާއިރު މި ސަރުކާރުން ނިންމާފައި ވަނީ އުތުރުތިލަފަޅުގައި ދަނޑުވެރިކަމަށް ހާއްސަ މަޝްރޫއެއް ކުރިއަށްގެންދިޔުމަށެވެ.
ޗައިނާ އަށް ކުރެއްވި ފުރަމާނަ ދަތުރުފުޅު ނިންމަވާލެއްވުމަށް ފަހުގައި ނޫސްވެރިންނާ ވާހަކަފުޅު ދައްކަވަމުން ރައީސް މުއިއްޒު ވިދާޅުވީ ރާއްޖޭގައި ދަނޑުވެރިކަން އިތުރަށް ފުޅާކޮށް، ކާބޯތަކެތި ދަތިނުވެ ލިބޭނެކަން ކަށަވަރު ކުރުމުގެ ގޮތުން ފުޑް ސެކިއުރިޓީ ގާއިމްކުރުމަށްޓަކައި ޗައިނާ ސަރުކާރާއެކު އެއްބަސްވުމެއް ހަދާފައިވާ ކަމަށެވެ.
އެ އެއްބަސްވުމުގެ ދަށުން އުތުރުތިލަފަޅުގައި ދަނޑުވެރިކަމުގެ ހާއްސަ މަޝްރޫއެއް ކުރިއަށް ގެންދިއުމަށްވެސް ޗައިނާ ސަރުކާރާއެކު މަޝްވަރާކުރެއްވި ކަމަށާއި އެ މަޝްރޫއުގައި ރާއްޖޭގައި އާންމުކޮށް ހައްދާ ދަނޑުވެރިކަމުގެ ހުރިހާ ބާވަތެއް، މަދުވެގެން ދެލައްކަ ރައްޔިތުންނަށް ބޭނުންވާ މިންވަރަށް ހެއްދޭނެ އެގްރިކަލްޗާ އެސްޓޭބްލިޝްމެންޓެއް ގާއިމްކުރެވޭނެ ކަމަށް ރައީސް ވިދާޅުވެފައިވެއެވެ.
ނިމިދިޔަ ފަސް އަހަރު ޙައްލު ވެވުނީ ކޮންކަމެއްތަ؟