ކޮވިޑް-19: މިއަދު ރާއްޖެއިން ފައްސިވީ109 މީހުން
މިއަދު ރާއްޖެއިން ކޮވިޑް-19 އަށް ފައްސިވީ 109 މީހުންނެވެ.
މިހާރު ކުރިއަށްދާ ނޫސްވެރިންގެ ބައްދަލުވުމުގައި އެޗްއީއޯސީ ގެ ފަރާތުން މައުލޫމާތު ދެއްވަމުން ވިދާޅުވީ އިއްޔެގެ އިރުއޮއްސި 18:00 އިން ފެށިގެން މިއަދުގެ އިރުއޮއްސި 18:00 އާއި ހަމައަށް ރާއްޖެއިން ފައްސިވެފައި ވަނީ 109 މީހުން ކަމަށެވެ.
އޭގެ ތެރޭގައި ހިމެނެނީ 80 ދިވެހިންނާއި ބަންގްލަދޭޝްގެ 24 މީހުންނާއި އިންޑިއާގެ ދެ މީހުންނާއި ޝްރީލަންކާގެ ވެސް ދެ މީހުންގެ އިތުރުން ނޭޕާލްގެ ރައްޔިތެއް ކަމަށެވެ.
މިއަދު ފައްސިވީ މީހުންގެ ތެރޭގައި 106 މީހުން ފައްސިވެފައިވަނީ ގްރޭޓާ މާލެ ސަރަޙައްދުންނެވެ. އަދި އަތޮޅުތަކުން ފައްސި ވެފައިވަނީ ތިން މީހެކެވެ.
މިހާތަނަށް ރާއްޖެއިން މިބައްޔަށް 7،578 މީހުން ވަނީ ފައްސި ވެފައެވެ.
ފައްސިވީ މީހުންގެ ތެރެއިން މިވަގުތު އައިސޮލޭޝަން ފެސިލިޓީތަކުގައި 1،482 މީހުން ތިބިއިރު 184 މީހަކަށް ހޮސްޕިޓަލުތަކުން ފަރުވާދެމުން އެބަގެންދެއެވެ.
ރާއްޖެއިން ކޮވިޑް ޖެހުނު މީހުންގެ ތެރެއިން 4،925 މީހަކު މިބަލިން މިހާރު ވަނީ ރަނގަޅު ވެފައެވެ. މިބަލީގައި ނިޔާވި މީހުންގެ އަދަދު ވަނީ 28 އަށް އަރާފައެވެ.
