ކަރަންޓީނާ ހިލާފުވާ މީހުން 5000 ރުފިޔާ އިން ޖޫރިމަނާ ކުރަނީ

ކޮވިޑް-19 އާ ގުޅިގެން ކަރަންޓީން ވާން އެންގި މީހަކު، އެ އަމުރާއި ހިލާފުވެއްޖެ ނަމަ 5000 ރުފިޔާ އިން ޖޫރިމަނާ ކުރާ ގޮތަށް އެކަހެރި ކުރުމުގެ މަރުކަޒުތަކާއި ކަރަންޓީނު ކުރުމުގެ މަރުކަޒުތަކާއި ބެހޭ ގަވާއިދަށް އިސްލާހް ގެނެސްފިއެެވެ.

Ads by MWSC

ދިވެހި ސަރުކާރުގެ ގެޒެޓުގައި ޝާއިއުކޮށްފައިވާ އެ އިސްލާހުގައި ބުނެފައި ވާ ގޮތުގައި ކަރަންޓީނު ކުރުމުގެ މަރުކަޒުތަކާއި އެކަހެރިކޮށް ބެހެއްޓުމުގެ މަރުކަޒުތައް ކަނޑައެޅުމުން، ނުވަތަ މީހަކު ނުވަތަ ބަޔަކު ކަރަންޓީނު ކޮށްފައި ނުވަތަ އެކަހެރި ކޮށްފައި ބަހައްޓައިގެން ފަރުވާދިނުމަށް ހަމަޖެހިފައިވާ އުސޫލުން އެކަން ކުރަން ފެށުމުން، އެ ކަމަށް އިޙުތިރާމްކޮށް އާންމު ޞިއްޙަތުގެ ނުރައްކާ ކޮންޓްރޯލު ކުރުމަށް ނުވަތަ ގައިން ގަޔަށް އަރާ ބަލި ކޮންޓްރޯލު ކުރުމަށް ކުރެވެމުންދާ މަސައްކަތަށް އެއްބާރުލުން، ކޮންމެ މީހަކު ވެސް ދޭންވާނެ ކަމަށެވެ.

އަދި އެއްބާރުލުން ދިނުމެއް ނެތި، ވަކި މީހަކު ނުވަތަ ބަޔަކު ކަރަންޓީނު ކޮށްގެން ނުވަތަ އެކަހެރި ކޮށްގެން ފަރުވާ ދިނުމަށް ކުރަމުންދާ މަސައްކަތަށް ހުރަސްއަޅައިފި ނަމަ، ނުވަތަ އާންމު ޞިއްޙަތު ރައްކާތެރި ކުރުމަށް ނުވަތަ ގައިންގަޔަށް އަރާ ބަލިން ރައްކާތެރި ކުރުމަށް ކުރެވޭ މަސައްކަތުގައި ގާއިމްކުރެވޭ އެކަހެރި ކުރުމުގެ މަރުކަޒެއް ނުވަތަ ކަރަންޓީނު ކުރުމުގެ މަރުކަޒެއް ހިންގުމަށް މީހަކު ހުރަސްއަޅައިފި ނަމަ، އެ ކުރަނީ ކުށެއް ކަމަށް އިސްލާހުކުރި ގަވާއިދުގައި ބުނެފައިވެއެވެ.

އެގޮތުން އެކަހެރިވުމަށް އަންގާފައިވާ މީހަކު، އޭނާއަށް އަންގާފައިވާ އަމުރާ ހިލާފުވެއްޖެ ނަމަ، 5000 ރުފިޔާއިން ޖޫރިމަނާ ކުރެވޭނެއެވެ. އަަމުރާ ހިލާފުވާ ފުރަތަމަ ފަހަރު 2،500 ރުފިޔާއިން ޖޫރިމަނާ ކުރާއިރު ދެވަނަ ފަހަރު 3،500 ރުފިޔާއިން ޖޫރިމަނާ ކުރަން ވަނީ ހިމަނާފައެވެ. ތިންވަނަ ފަހަރުން ފެށިގެން ދެން ޖޫރިމަނާ ކޮންމެ ފަހަރަކު 5،000 ރުފިޔާއިން ޖޫރިމަނާ ކުރާނެ ކަމަށް އިސްލާހު ކޮށްފައިވާ ގަވާއިދުގައި ބުނެފައިވެއެވެ.

މި މާއްދާގެ ދަށުން އަޅަންޖެހޭ އެންމެހައި ފިޔަވަޅުތައް އަޅައި، އެ ފިޔަވަޅުތައް
ތަންފީޒު ކުރުމުގެ ކަންކަން ކުރިޔަށް ގެންދާނީ ، މޯލްޑިވްސް ޕޮލިސް
ސަރވިސްއިންނެވެ. އަދި ފުލުހުންގެ ޚިދުމަތް ޤާއިމުވެފައި ނުވާ ރަށްރަށުގައި
ފިޔަވަޅުތައް އަޅަމުން ގެންދާނީ ލޯކަލް ކައުންސިލްތަކުންނެވެ.