މި އަހަރު 50 ރަށެއްގެ ކައުންސިލަށް އާ އިމާރާތެއް ހަދަނީ
މި އަހަރު ތެރޭގައި 50 ރަށެއްގެ ކައުންސިލަށް އާ އިމާރާތެއް އެޅުމުގެ މަސައްކަތް ފެށިގެންދާނެ ކަމަށް ރައީސް ޑރ މުހައްމަދު މުއިއްޒު މިއަދު އިއުލާން ކުރައްވައިފިއެވެ.
ރައީސް އެކަން އިއުލާން ކުރެއްވީ ބޮޑުތިލަދުންމައްޗަށް ކުރައްވަމުން ގެންދަވާ ދަތުރުފުޅުގެ ތެރެއިން ހދ. މަކުނުދޫގެ ރައްޔިތުންނާ ބައްދަލުކުރައްވާ ވާހަކަފުޅު ދައްކަވަމުންނެވެ.
މިއަދު ފާހަގަކުރަމުންދާ ލާ މަރުކަޒީ ދުވަހާ ގުޅުވައި ވާހަކަފުޅު ދައްކަވަމުން ރައީސް ވިދާޅުވީ ކައުންސިލްތަކަށް ގާނޫނީ ގޮތުން ގިނަ ޒިންމާތަކެއް ހަވާލުކުރެވިފައިވީ ނަމަވެސް، ރާއްޖޭގެ ގިނަ ކައުންސިލްތަކުގެ އިމާރާތްތަކަކީ، ގިނަ ދުވަސްވެފައިވާ، ބާ އިމާރާތްތަކެއް ކަމުން، ރައްޔިތުންނަށް ފޯރުކޮށްދޭންޖެހޭ ހިދުމަތްތައް ފޯރުކޮށްދިނުމުގައި، ވަރަށް ގިނަ ދަތިތައް ކައުންސިލްތަކަށް ކުރިމަތިވެފައިވާ ކަމަށެވެ.
އެހެންވެ އެމަނިކުފާނު ވިދާޅުވީ، ބަޖެޓުގައި ނެތަސް ކައުންސިލްތަކުގެ އިމާރާތްތައް އަޅަން މި އަހަރު ތެރޭގައި ބޮޑު މަޝްރޫއުއެއް ހިންގަން ހަމަޖެހިފައިވާ ކަމަށެވެ. ރައީސް ވިދާޅުވި ގޮތުގައި އެ މަޝްރޫއު ކުރިއަށް ގެންދާނީ އިންވެސްޓާ ފައިނޭންސް މޮޑެލްގެ ތެރެއިން ފައިސާ ހޯދައިގެންނެވެ.
''.. މި މަޝްރޫއުގެ ފުރަތަމަ ފިޔަވަހީގައި 50 ރަށުގެ ރަށު ކައުންސިލް އޮފީސް އަޅުގަނޑުމެން ގާއިމްކޮށްދޭނަން. 50 ރަށް ހިޔާރުކުރާނެ ގޮތަކީ، އެންމެ ބޮޑަށް ހަލާކުވެފައި ހުރި ކައުންސިލް އިދާރާތަކަށް ބަލާނީ
އެ ޖަލްސާގެ ފެށުމުގެ އިރުކޮޅެއް ކުރިން ރައީސް އޮފީހުން އާއްމުކުރި ލާމަރުކަޒީ ދުވަހުގެ ހިތޯބުގައި ރައީސް ވިދާޅުވީ، ރާއްޖޭގެ އިދާރީ ދާއިރާތައް، ފުރިހަމަ ލާމަރުކަޒީ ނިޒާމެއްގެ ތެރެއިން ހިންގާކަން ކަށަވަރުކޮށް، ލާމަރުކަޒީ ނިޒާމު އިތުރަށް ހަރުދަނާކޮށް ކައުންސިލްތަކަށް ގާނޫނުން ލިބިދީފައިވާ ބާރާއި އިހުތިޔާރު އޭގެ އެންމެ ފުރިހަމަ މާނައިގައި ތަންފީޒުވާކަން ކަށަވަރު ކުރުމަކީ ސަރުކާރުގެ މުހިންމު ސިޔާސަތެއް ކަމަށެވެ.
''އަޅުގަނޑު ގަބޫލުކުރާގޮތުގައި، ލޯކަލް ކައުންސިލްތަކަކީ، ދައުލަތުގެ ފަރާތުން ރައްޔިތުންނަށް ޚިދުމަތް ފޯރުކޮށްދޭ ސަރުކާރުގެ މުހިންމު އެއް ފަށަލަ. ސަރުކާރުގެ ސިޔާސަތުތައް، ސިޓީ، އަތޮޅު އަދި ރަށުފެންވަރުގައި ތަންފީޒުކޮށް، ރައްޔިތުންނަށް ދުވަހުން ދުވަހަށް ބޭނުންވާ ޚިދުމަތްތައް ވިލަރެސްކޮށް ބަލަހައްޓާ އިދާރާ.'' އެމަނިކުފާނު ވިދާޅުވިއެވެ.
އެހެންކަމުން، ލޯކަލް ކައުންސިލްތަކުގެ އެންމެ މުހިންމު އެއް ދައުރަކީ، ރައްޔިތުންނަށް ދެވޭ ހިދުމަތްތައް، ސަރުކާރުގެ އިދާރާތަކާ ގުޅިގެން، ހަމަހަމަކަމާއެކު ރައްޔިތުން އެދޭގޮތަށް ބައްޓަންކުރުމަށް މަސައްކަތް ކުރުން ކަމަށް ވިދާޅުވިއެވެ.
އެގޮތަށް ކައުންސިލްތަކުގެ ހިންގުން ބައްޓަން ކުރެވޭނީ، ރައްޔިތުންގެ ހިޔާލާއި ބައިވެރިވުން އިތުރުކޮށްގެން ކަމަށާއި ކައުންސިލްގެ ނިންމުންތަކާއި މަސައްކަތްތައް ތަންފީޒު ކުރެވެމުންދާ ގޮތުގެ މަޢުލޫމާތު، ރައްޔިތުންނާ ހިއްސާކޮށް، ރައްޔިތުންގެ ހިޔާލު ހޯދައިގެން ޖަވާބުދާރީވާ، ޒިންމާދާރު ކައުންސިލްތަކަކަށް ވެވޭނީ އޭރުން ކަމަށް ވިދާޅުވިއެވެ.
