ކޮވިޑް-19: ފައްސި ވުމުން ވިލިނގިއްޔަށް ނޭރުވި ބަލިމީހާ މާލެ ގެންނަނީ
ގދ. ތިނަދޫ އިން ކޮވިޑަށް ފައްސިވީ ބަލިމީހާ ގއ. ވިލިނގިއްޔަށް ނޭރުވުމުން، މާލެ ގެންނަން ނިންމައިފި އެވެ.
އޮންލައިން ނޫސް ސީއެންއެމް އިން ބުނެފައިވަނީ ކޮވިޑަށް ފައްސިވީ މީހާ މާލެ ގެނައުމުގެ މަސައްކަތް ކުރަމުން އަންނަ ކަމަށާއި މިއަދު އިރުއޮއްސި 18:00 ގައި ސީޕްލޭންގައި އެމީހާ މާލެ ގެނެވޭނެ ކަމަށް ލަފާ ކުރައްވާކަމަށް، ތިނަދޫ ކައުންސިލު މެމްބަރު އަހުމަދު އައްސަދު ވިދާޅުވި ކަމަށެވެ.
ގއ. އަތޮޅުގައި ތަރައްގީކުރި ކޮވިޑް ފެސިލިޓީއަށް ތިނަދޫއިން ފައްސިވީ މީހާ ގެންދިއުމަށް ކުރި މަސައްކަތް ނާކާމިޔާބު ވެފައިވަނީ ވިލިނގިލީ ރައްޔިތުންގެ ތެރެއިން ބަޔަކު އެކަމާއި ދެކޮޅު ހެދުމުންނެވެ. އެސަރަޙައްދަށް ފުލުހުން ދިޔަ ނަމަވެސް އެކަމަށް ޙައްލެއް ލިބިފައި ނުވާތީ އެމީހާ ވަނީ އަނބުރާ ތިނަދޫ އަށް ގެންގޮސްފައެވެ.
ތިނަދޫއިން ކޮވިޑަށް ފައްސި ވެފައިވަނީ އުމުރުން 68 އަހަރުގެ މީހެކެވެ. އެމީހާ ފެސިލިޓީއަށް ގެންދަން މަސައްކަތްކުރީ އޭނާ އަކީ ހައި ރިސްކު މީހަކަށް ވާތީއެވެ.
