ހުރިހާ ރަށަކަށް މި އަހަރު ދާނަން، މަޝްރޫއުތައް ބަލަން ވެސް ފަހުން އަދި އަންނާނަން: ރައީސް
މި ފަސް އަހަރު ތެރޭގައި މަދުވެގެން ދެ ބުރަށް ރާއްޖޭގެ ހުރިހާ ރަށަކަށް ވަޑައިގަންނަވާނެ ކަމަށް ރައީސް ޑރ މުހައްމަދު މުއިއްޒު މިއަދު ވިދާޅުވެއްޖެއެވެ.
ރާއްޖޭގެ ހުރިހާ ރަށަކަށް ޒިޔާރަތް ކުރެއްވުމުގެ ސިލްސިލާ ދަތުރުފުޅެއް ރައީސް ވަނީ ފައްޓަވާފައެވެ. މި ވަގުތު އެމަނިކުފާނު ދަތުރުކުރައްވަމުން ގެންދަނީ ނިލަންދު އަތޮޅު ދެކުނުބުރިއަށާއި، މުލަކަތޮޅު އަދި ފެލިދުއަތޮޅުގެ ރަށްތަކަށެވެ. މި ދަތުރުފުޅުތަކުގައި ރައީސް ގެންދަވަނީ އެ ރަށްތަކުގެ ކައުންސިލާ ބައްދަލުކުރައްވާ ދިމާވެފައި ހުރި ދަތިތަކުގެ މައުލޫމާތު އޮޅުންފިލުއްވަމުންނެވެ.
މ. މުލަކު ރައްޔިތުންނާ ބައްދަލުކުރައްވާ ވާހަކަފުޅު ދައްކަވަމުން ރައީސް ވިދާޅުވީ ހުރިހާ ރަށެއްގެ ރައްޔިތުންނާ، އަދި ވަގުތުލިބޭ މިންވަރަކުން ކައުންސިލްތަކާއި ބައްދަލުކުރައްވަނީ ހަގީގީ މާނާގައި ލާމަރުކަޒު ކުރުމުގެ ނިޔަތުގައި ކަމަށެވެ. އޭގެ ސަބަބުން ރައްޔިތުން ބޭނުންވާ ކަންތައް ސާފުވެގެންދާ ކަމަށާއި ފާއިތުވި ދުވަސްތަކުގައި ގިނަ ރަށްތަކަށް ވަޑައިގެންނެވިފައިވާ ކަމަށް ވިދާޅުވިއެވެ. އެމަނިކުފާނު އަމާޒު ހިއްޕަވާފައިވަނީ މި އަހަރު ތެރޭގައި ހުރިހާ ރަށަކަށް ޒިޔާރަތް ކުރުމަށެވެ.
''އަދި އޭގެ ފަހުން މި މަސައްކަތް ހިނގައިގަނެ ގިނަ ކަންކަން ނިމި އާ މަސައްކަތްތައްވެސް ކުރިއަށް ގެންދިޔުމުގެ މަސައްކަތް ކުރިއަށްދާ ގޮތް ބެލުމަށްޓަކައި، އަދި އެއް އަހަރު ފަހުން 2026 ހަމަ މީގެ ދެވަނަ ރައުންޑެއް އަޅުގަނޑު ކުރިއަށް ގެންދަން ޕްލޭންކޮށްފައި މިއޮތީ ހުރިހާ ރަށަކަށް ދެވަނަ ބުރަކަށްދާ ގޮތަކަށް'' ރައީސް ވިދާޅުވިއެވެ.
އެމަނިކުފާނު ވިދާޅުވީ ރައްޔިތުންނާ ގާތުން މަސައްކަތްކުރުމުން، ރައްޔިތުން ބޭނުންވާ ގޮތަށް މަސައްކަތްކުރެއްވުމުގެ ޔަގީންކަން ލިބިގެންދާނެ ކަމަށް ރައީސް ވިދާޅުވިއެވެ. ވިދާޅުވީ، އެމަނިކުފާނަކީ ރައްޔިތުންގެ ހާދިމެއް ކަމަށެވެ. ދެއްވި ޔަގީންކަމަކީ ހުންނަވާނީ ރައްޔިތުން ހަވާލުކުރި ޒިންމާ އަދާކުރުމުގައި ކަމަށެވެ. މުޅި ސަރުކާރުންވެސް މަސައްކަތްކުރަނީ އެ އަޒުމުގައި ކަމަށާއި އެހެންވެ ފުރުސަތު ދެއްވަން ރައީސް ވަނީ ރައްޔިތުން އަރިހުން އެދިވަޑައިގެންފައެވެ. ރައީސް މުއިއްޒު ވިދާޅުވީ ރައްޔިތުންގެ އެއްބާރުލުމާއި އެކު ތަރައްގީގެ ހުރިހާ ކަންތައްތައް ބާރު ސްޕީޑުގައި ކުރިއަށް ގެންދެވޭނެ ކަމަށެވެ.
ރައީސް ވަނީ މުލަކު ކައުންސިލާވެސް މިއަދު ބައްދަލުކުރައްވާފައެވެ. ކައުންސިލުން ފާހަގަކުރެއްވި ކަންކަމުގެ ތެރޭގައި ރަށުގެ ހެލްތް ސެންޓަރު ހޮސްޕިޓަލަކަށް ބަދަލުކޮށްދެއްވުމަށާއި، އޭޓީއެމްގެ ހިދުމަތް ލިބޭނެގޮތް ހައްދަވައިދެއްވުމަށާއި، ރަށުގެ ގިރާ ސަރަހައްދު ހިމާޔަތް ކުރުމުގެ މަޝްރޫޢު އަވަހަށް ފަށްޓަވައިދެއްވުމަށާއި، ބަނދަރު ބޮޑު ކޮށްދެއްވުމަށް އެދިވަޑައިގެންނެވިއެވެ. އަދި ޒުވާނުންނަށްޓަކައި ކުޅިވަރުގެ ދާއިރާއިން އިތުރު ވަސީލަތްތައް ގާއިމުކޮށްދެއްވުމަށާއި، އެ ރަށުގައި ޒުވާނުންގެ މަރުކަޒެއް ގާއިމުކޮށްދެއްވުމަށްވެސް އެދިވަޑައިގެންނެވިއެވެ. މީގެ އިތުރުން ރަށުގައި ކުރިން ބޭނުންކުރަމުންދިޔަ ފާލަން މިހާރު ރޫޅާލާފައިވުމުން ކުރިމަތިވަމުންދާ ގޮންޖެހުންތައް ކައުންސިލުން ހިއްސާކުރެއްވިއެވެ.
އެ ބައްދަކުރެއްވުމުގައި ރައީސް ދެއްކެވި ވާހަކަފުޅުގައި ކައުންސިލުން ފާހަގަކުރެއްވި ކަންކަން ބައްލަވާނެކަމުގައި ވިދާޅުވިއެވެ. މީގެ އިތުރުން އެމަނިކުފާނު ވަނީ މި ބައްދަލުކުރެއްވުމުގައި ބައިވެރިވެވަޑައިގެންނެވި ވަޒީރުން މެދުވެރިކުރައްވައި ކައުންސިލުން ފާހަގަކުރެއްވި ކަންކަމުގައި ސަރުކާރުން ކުރައްވަމުން ގެންދަވާ މަސައްކަތްތަކުގެ އެންމެ ފަހުގެ މައުލޫމާތު ހިއްސާކުރައްވާފައެވެ.
Ads by STO
