ފެނަކައިން ބުނީ ވައިކަރަދޫއަށް މިއަދު ޖެނެރޭޓަރު ފޮނުވޭނެ ކަމަށް
ހދ.ވައިކަރަދޫ އަށް ދިމާވެފައިވާ ކަރަންޓުގެ މައްސަލައަށް ހައްލެއް ހޯދުމަށް ކުރެވެމުންދާ މަސައްކަތުގެ ތެރެއިން އެރަށަށް އައު ޖެނެރޭޓަރެއް މިއަދު ފޮނުވާނެ ކަމަށް ފެނަކައިން ބުނެފިއެވެ.
އެ ރަށުގެ އެކި ސަރަަހައްދުތަކުން ކަރަންޓު ކެނޑެމުން އަންނަތާ ހަތަރު ދުވަސްވެ، ރައްޔިތުން ދަނީ މުޒާހަރާ ކުރަމުންނެވެ.
ވައިކަރަދޫއިން "ދެން" އާ ވާހަކަ ދެއްކި މީހަކު ބުނީ މިދިޔަ ހޯމަ ދުވަހުން ފެށިގެން ކަރަންޓުގެ ހިދުމަތް ރަނގަޅަށް ނުލިބޭ ކަމަށެވެ،. އެހެންވެ މުޒާހަރާ ކުރަމުން އަންނަތަ ދެ ދުވަސްވެއްޖެ ކަމަށެވެ.
''ފަސް ސަރަހައްދަށް ބަހާލައިގެން، އެއް ގަޑިއިރު ކޮންމެ ސަރަހައްދަކަށް ކަރަންޓު ދެމުންދަނީ" އެރަށުން ވާހަކަ ދެއްކި މީހާ ބުންޏެވެ.
ފެނަކައިން މިއަދު 'އެކްސް' ގައި ކުރި ޕޯސްޓެއްގައި ބުނީ ވައިކަރަދޫ އަށް ބޭނުންވާ 250 ކިލޯވޯލްޓުގެ ގެ އައު ޖަނަރޭޓަރު މިހާރު އެ ރަށަށް ފޮނުވުމުގެ މަސައްކަތް ކުރެވެމުންދާ ކަމަށެވެ.
އަދި މާދަމާ އައު ޖެނަރޭޓާ އިންސްޓޮލޭޝަންގެ މަސައްކަތް ކުރެވޭނެ ކަމަށެވެ. ކަރަންޓު ނެތުމުގެ ސަބަބުން ރައްޔިތުންނަށް ދިމާވާ ދަތިތަކަށް އެ ކުންފުނިން މާފަށް އެދުނެވެ.
