ރިހެބިލިޓޭޓް ކުރެވޭ ކުދިން ސަލާމަތީ ބާރުތަކުގެ ހިދުމަތަށް ނެރެނީ
ކުށުގެ ވެށީގައި ތިބޭ ކުދިންގެ ތެރެއިން ސަރުކާރުން ހިންގާ ރިހެބިލިޓޭޝަން ޕްރޮގްރާމްގެ ތެރެއިން 18 އަހަރު ފުރުމުން ސަލާމަތީ ބާރުތަކުގެ ހިދުމަތައް ނެރޭ ގޮތަށް ނިންމާފައިވާކަން ސަރުކާރުން ހާމަކޮށްފިއެވެ.
އެކަން ހާމަކުރެއްވީ ހޯމް ލޭންޑް މިނިސްޓަރު އަލީ އިހުސާން 'އެކްސް' ގައި ކުރެއްވި ޕޯސްޓެއްގައެވެ. މިނިސްޓަރު ވިދާޅުވީ މިހާރު ގާނޫނު އޮތް ގޮތުން ކުށުގެ ވެށީގައި އުޅޭ ނުވަތަ ކުށަށް އަރައިގަންނަ ކުދިންނަށް ދޭންޖެހޭ ރިހެބިލިޓޭޝަން އަދި ސައިކޮލޯޖިކަލް ފަރުވާ މަރުކަޒުކޮށްގެން ދެވެނީ 15 އަހަރު ވީމަ ކޯޓު ހުކުމެއްގެ ދަށުން ކަމަށެވެ.
ނަމަވެސް ރާއްޖޭގައި ކުށުގެ ވެށީގައި އުޅޭ އަދި ކުށަށް އަރައިގަންނަ 12، 13 އަދި 14 އަހަރުގެ ކުދިން ނިސްބަތުން ގިނަ ކަމަށެވެ. ތެރެއިން ގިނަ ކުދިންނަކީ ހަރުދަނާ ބެލެހެޓުންތެރިކަމާއި ރައްކާތެރިކަން ފޯރުކޮށްނުދެވޭ އާއިލާތަކުގެ ކުދިން ކަމަށް ވިދާޅުވިއެވެ.
''މި ކުދިންނަށް މުޖުތަމައުގައި ބައިތިއްބައިގެން ނުވަތަ އާއިލާ ކައިރީގައި ބައިތިއްބައިގެން ރިހެބިލިޓޭޓްކުރުމަކީ އެހާ ކާމިޔާބުކޮށް ކުރެވޭކަމެއް ކަމަކަށް ތަފާސް ހިސާބުތަކުން ނުދައްކާ. ނަތީޖާއަކީ މިފަދަކުދިންގެ ސަބަބުން މުޖުތަމައުއަށް ނުރައްކާވެ އެކުދިން ކުށްވެރިންނަށް ވެގެން ދިއުން'' ރަސްމީ އެކައުންޓުން ކުރެއްވި ޓްވީޓެއްގައި ވިދާޅުވިއެވެ.
ސަރުކާރުގެ ނިންމުމަކީ ގާނޫނުގައި ބަޔާންކުރާ 15 އަހަރުގެ ލިމިޓް 12 އަހަރަށް ދަށް ކުރުމެވެ. އިހުސާން ވިދާޅުވީ އެ ނިންމުމުގެ ސަބަބުން ކުއްޖަކު ކުށުގެ މާހައުލަށް ހުށެހެޅި ކުށްވެރިއަކަށް ނުވަނީސް އެކުއްޖާ ކޯޓު އަމުރެއްގެ ދަށުން މަރުކަޒަކަށް ގެންދެވި ރިހެބިލިޓޭޓް ކުރެވި މުޖުތަމައުއަށް ބޭނުންތެރި ޒުވާނަކަށް ހެދޭނެ ކަމަށެވެ.
އަދި ހަމައެއާއެކު މިވަގުތު ކުށަށް އަރައިގަންނަ އެ އުމުރުގެ ކުދިން ސަލާމަތްކުރެވި، ހިތްވަރުގަދަ، ކެރޭ، ގައުމަށް ފައިދާހުރި ޒުވާނުންނަށް ބަދަލުކުރެވޭނެ ކަމަށެވެ. އެކަން ކުރާނީ ދީނީ ތައުލީމާއި ތަރުބިއްޔަތު، ފިޒިކަލް ފިޓްނެސް އާއި ރަސްމީ ތައުލީމު، ކޮމްޕެޓިިޓިވް ސްޕޯޓްސް، މަސައްކަތްތެރިކަން، ގައުމިއްޔަތު ޕާސަނަލައިޒްޑް ސައިކޯސޯޝަލް އިންޓަވެޝަން، ލީޑާޝިޕް އަދި ޓީމް ބިލްޑިން ހިމެނޭ ރެޖިމެންޓެޑް ސިސްޓަމެއްގެ ތެރެއިން ކަމަށް ވިދާޅުވިއެވެ.
''މީގެ ތެރެއިން ދިގުމުއްދަތަށް މަރުކަޒަށް ގެންދެވޭ ކުދިން 18 އަހަރުވުމުން ސިފައިންގެ އަދިި ފުލުހުންގެ މުއައްސަސާގެ ހިދުމަތަށް 3 ނުވަތަ 5 އަހަރުގެ މުއްދަތަށް ނެރެވޭނެ'' މިނިސްޓަރު ވިދާޅުވީ ދިގު މުއްދަތަށް އަދި ދެމެހެއްޓެނިވި ގޮތަކަށް އެކަން ކުރުމަށްޓަކައި ސަރުކާރުގެ ވިސްނުމަކީ ''ހޯޕް އައިލެންޑް'' ކަނޑައަޅައި ތަރައްގީކޮށް މިމައްސަލައަށް ދާއިމީ ހައްލެއް ގެނައުން ކަމަށެވެ.
އެ ރަށުގައި ޗުއްޓީ ދުވަސްވަރު އެކުދިންގެ އާއިލާ ތަކަށް ޒިޔާރަތްކުރެވި އާއިލާއާއި އެކު ގުޅުންބަދަހި ކުރެވޭނެ ފެސިލިޓީތައް ގާއިކުރެވޭނެ ކަމަށް ވިދާޅުވިއެވެ.
ތިކަމަކިީ މަާކުރިންސުރެ ކުރަން ޖިިހެޭ ކަމެށް….. ތީ ވަރަށް ރަގަލު ކަމެއް،…..