ޒަކާތު ފަންޑުން ފަލަސްތީނަށް ފޮނުވަނީ 1.5 މިލިއަން ރުފިޔާ
އިސްލާމިކް މިނިސްޓްރީގެ ދަށުން ހިންގާ ޒަކާތު ފަންޑުން ފަލަސްތީނުގެ ގައްޒާގެ ރައްޔިތުންނަށް އެހީވާން ސަރުކާރުން ފުރަތަމަ ބުރުގައި ފޮނުވަނީ އެއް ލައްކަ ޑޮލަރު (1.5 މިލިއަން ރުފިޔާ) ކަމަށް އިސްލާމިކް މިނިސްޓަރު ޑރ މުހައްމަދު ޝަހީމް އަލީ ސައީދު މިރޭ ވިދާޅުވެއްޖެއެވެ.
ޒަކާތު ފަންޑަކީ ފަގީރުންނާ މިސްކީނުންނަށް އެހީވާން އުފައްދާފައިވާ ފަންޑެކެވެ. އެކަން އިތުރަށް ހަރުދާކުރުމަށް މި ސަރުކާރުން ވަނީ ޒަކާތު ހައުސްގެ ނަމުގައި އިދާރާއެއް ގާއިމުކޮށްފައެވެ. ޒަކާތުގެ ނިޒާމު ހަރުދަނާ ކުރުމުގެ މަސައްކަތާއި، ޒަކާތުގެ ނަފާ އޭގެ ބެހެނިވެރިންނަށް ފުޅާ ދާއިރާއެއްގައި ލިބޭނެ ގޮތަށް ޒަކާތު ފަންޑު ތަރައްގީކުރުން ޒަކާތު ހައުސްގެ މަގްސަދުގެ ތެރޭގައި ހިމެނެއެވެ.
މީޑިއާތަކަށް ފޮނުވި މެެސެޖެއްގައި އިސްލާމިކް މިނިސްޓަރު ވިދާޅުވީ ޒަކާތު ފަންޑުން ގައްޒާގެ އަޚުންނާ އުޚުތުންނަށް ފޮނުވާ އިންސާނީ އެހީތެރިކަން ފޯރުކޮށްދޭނީ ގަތަރުގެ ރެޑް ކްރެސެންޓް މެދުވެރިކޮށް ކަމަށެވެ. މީގެ ކުރިން ވެސް ރާއްޖެއިން ގައުމީ ފެންވަރުގެ އެހީ ދެ ފަހަރެއްގެ މަތިން ގަތަރުގެ ރެޑްކްރެސެންޓް މެދުވެރިކޮށް ފައިސާ ފޮނުވާފައިވާކަން މިނިސްޓަރު ފާހަގަކުރެއްވިއެވެ. މި ފަހަރު ގައްޒާ އަށް ފައިސާ ފޮނުވަނީ ދެ ބަހަކަށް ބަހާލައިގެންނެވެ.
ޒަކާތު ފަންޑުން ފުރަތަމަ މަރުޙަލާގައި ފޮނުވަން ގަސްތުކުރަނީ އެއް ލައްކަ ޑޮލަރު މި ފައިސާ ފޮނުވާނީ 2 ޕޭމަންޓަކަށް ބަހައިގެން، މި ފައިސާއަކީ ޣައްޒާގެ ރައްޔިތުންގެ ކާބޯތަކެއްޗަށް ހޭދަކުރުމަށްޓަކައި ފޮނުވޭ އެހީއެއް
ޝަހީމް ވިދާޅުވީ ފަލްސްތީނުގެ ރައްޔިތުންނަށް އެހީވުމަކީ ރައީސް ޑރ މުހައްމަދު މުއިއްޒުގެ އިރުޝާދުގެ ދަށުން ކުރިއަށް ގެންދެވޭ ކަމެއް ކަމަށެވެ. މިއީ ރާއްޖޭގެ ޒަކާތު ފަންޑުން ބޭރުގެ ފަރާތަކަށް އެހީވާ ފުރަތަމަ ފަހަރެވެ.
އިޒްރޭލުން ފަލަސްތީނަށް ދެމުންދާ ހަމަލާތަކުގެ ސަބަބުން ގައްޒާގެ އާބާދީގެ 90 ޕަސެންޓު މީހުން ވަނީ އެކި ސަރަހައްދުތަކަށް ހިޖުރަކުރަން މަޖުބޫރުވެފައެވެ. ހަނގުރާމާގައި 32،000 އަށްވުރެ ގިނަ މީހުން މަރުވެފައިވާއިރު ހަމަލާތައް މިހާރުން މިހާރަށް ހުއްޓައިލަން ގޮވައިލައި ހުސްވި ހަފްތާގެ ހޮނިހިރު ދުވަހު އދ.ގެ ސަލަމާތީ މަޖިލީހުން ވަނީ ގަރާރެއް ފާސްކޮށްފައެވެ.
