ސްކޫލުގައި ނުބޭއްވުމުން ޕީއެންއެފް އުފައްދާ ޖަލްސާ ރާޅުގަނޑު ސަރަހައްދަށް
ޕީޕަލް ނެޝަނަލް ފްރޮންޓް (ޕީއެންއެފް) އުފެއްދުމަށް މިރޭ ބާއްވަން ނިންމި ޖަލްސާ އަށް ފުލުހުން ހުރަސް އަޅާފައިވާތީ، ރާޅުގަނޑު ސަރަހައްދަށް ބަދަލުކޮށްފިއެވެ.
މިރޭ ނުވައެއް ޖަހާއިރު ގިޔާސުއްދީން ސްކޫލުގައި ބާއްވަން އޮތް ޖަލްސާގެ ވަގުތު ކުޑަތަންވެފައި އޮއްވައި ފުލުހުން ވަނީ ސްކޫލު ގޭޓު ބަންދުކޮށް ޖަލްސާ ބާއްވަން ހުރަސް އަޅާފައެވެ. ފުލުހުން ޖަލްސާއަށް ހުރަސްއެޅީ ހުއްދަ ނުނަގާ ކުރިއަށްގެންދާތީވެއެވެ. ފުލުހުން ބުނީ އެ ސްކޫލުގައި ޖަލްސާ ބާއްވަން ޕީއެންއެފަށް ދިން ހުއްދަ ބާތިލުކޮށްފައިވާ ކަމަށެވެ. އަދި އެކަން ޕީއެންއެފްއަށް އޮތީ އަންގާފައި ކަމަށެވެ.
ނަމަވެސް ވަކި ހިސާބަކުން ގާތްގަނޑަކަށް ޕާޓީގެ 400 އެއްހާ މެންބަރުން ވަނީ ސްކޫލު ހޯލަށް ވަދެފައެވެ. އެތަނުގައި ވަކި އިރެއްވަންދެން މަޑުކުރުމަށް ފަހު އިލެކްޝަން ކޮމިޝަންގެ މަންދޫބަށް ސްކޫލަށް ނުވަދެވުމުން އަނެއްކާވެސް ޖަލްސާ ނުފެށި އިރުތަކެއްވިއެވެ. އެހެންވެ އެ ޕާޓީ އުފެއްދުމުގައި އިސްކޮށް ހަރަކާތްތެރިވާ މަލީހު ޖަމާލް ވިދާޅުވީ ޖަލްސާ ރާޅުގަނޑު ސަރަހައްދަށް މިހާރު ބަދަލުކޮށްފައިވާ ކަމަށެވެ. އެހެންވެ ޕާޓީގެ މެންބަރުން ވަނީ އެ ސަރަހައްދަށް މިސްރާބު ޖަހާފައެވެ. ބެލެވޭ ގޮތުގައި އެއީ ކުރިން ''ނިއު ޕޯޓް'' ހިންގި ސަރަހައްދެވެ.
ސިޔާސީ ޕާޓީގެ ގާނޫނު ބުނާ ގޮތުން ޕާޓީ އުފެއްދުމަށް ބާއްވާ ޖަލްސާގައި އިލެކްޝަންގެ މަންދޫބެއް ބައިވެރިވާން ޖެހެއެވެ. އެއީ ގާނޫނުގައި ހުރި އިޖުރާއަތްތައް ފުރިހަމަވޭތޯ ބެލުމަށެވެ. ޕާޓީ އުފެއްދުމަށް ބާއްވާ ޖަލްސާގައިި ޕާޓީގެ ލޯގޯ، ކުލަ، ޕާޓީގެ ދިދަ، އަސާސީ ގަވާއިދު އަދި ޕާޓީ ވަގުތީ ގޮތުން ހިންގާނެ ލީޑާޝިޕެއް ކަނޑައަޅަން ޖެހެއެވެ. މިރޭގެ ޖަލްސާގައި ކުރީގެ ރައީސް އަބްދުﷲ ޔާމީންވެސް ބައިވެރިވެވަޑައިގަންނަވާނެ ކަމަށް އެ ޕާޓީން ބުނެއެވެ. އެކަމަކު އެއީ ''ސަޕްރައިޒް'' އެއް ކަމަށް ބުނެފައިވެއެވެ.
ފުލުހުންގަނޑު ދުވޭ ދެން އެތަނަށް. ކެކެކެކެ