ޕީއެންއެފަށް މަރުހަބާ ވިދާޅުވަމުން ރައީސް ދެއްވި ޔަގީންކަމަކީ ސިޔާސީ މަސައްކަތަަށް ހުރަސް ނާޅުއްވާނެކަން
ކުރީގެ ރައީސް އަބްދުﷲ ޔާމީން އިސްވެ ހުންނަވާ އުފެއްދެވި ސިޔާސީ ޕާޓީ، ޕީޕަލް ނެޝަނަލް ފްރޮންޓް (ޕީއެންއެފް) އަށް ރައީސް ޑރ މުހައްމަދު މުއިއްޒު މިއަދު މަރުހަބާ ވިދާޅުވެއްޖެއެވެ.
ޕީއެންއެފް އުފައްދަން ބޭއްވި ޖަލްސާ އަކީ، ރާއްޖޭގައި މިހާތަނަށް އަަލަށް ސިޔާސީ ޕާޓީ އެއް އުފެއްދުމުގެ ޖަލްސާއަަކަށް އެންމެ ގިނަ ބަޔަކުގެ ސަމާލުކަން ހުއްޓުން އިވެންޓެވެ. ރޭ ނުވައެއް ޖެހިއިރު ބާއްވަން ތާވަލުކުރި ޖަލްސާ ބޭއްވުނީ ދަންވަރު 12 ވެސް ޖެހި ފަހުންނެވެ. ރާޅުގަނޑު ސަރަަހައްދުގައި ޖަލްސާ ބަދަލުކުރީ، ހުއްދަ ނުނަގާ ގިޔާއްސުއްދީން އިންޓަނޭޝަން ސްކޫލު ބާއްވަން އުޅުނު ޖަލްސާ އަށް ފުލުހުން ހުރަސްއެޅުމުންނެވެ.
ސްކޫލު ގޭޓް ބަންދުކޮށް، އެތެރެއަށް ވަންނަން މަސައްކަތްކުރި ޕާޓީގެ މެންބަރުން ހުއްޓުވުމުގެ ތެރޭގައި ފުލުހުންނާއި ސަޕޯޓަރުންނާ ދެމެދު ހަމަނުޖެހުންތައް ހިނގިއެވެ. އެސްއޯ ފުލުހުން ބާރުގެ ބޭނުންކޮށް، ކަރުނަ ގޭސްވެސް ފުލުހުން ބޭނުންކުރިއެވެ. ފުލުހުން ބުނެފައިވާ ގޮތުން ޖަލްސާ ބޭއްވުމަށް ޕީއެންއެފަށް، އެ ސްކޫލުން ދިން ހުއްދަ ބާތިލުކުރިކަން އެ ޕާޓީއަށް ސުކޫލުން އަންގާފައިވާ ކަމަށެވެ.
ރަސްމީ ގެކޮޅު މުލިއާގޭގައި އީދު ސަލާމްކުރެއްވުމަށްފަހު ނޫސްވެރިންނާ ވާހަކަފުޅު ދައްކަވަމުން ރައީސް މުއިއްޒު ވިދާޅުވީ، ސިޔާސީ ޕާޓީއެއް އުފެއްދުމަކީ ކޮންމެ ބަޔަކަށްވެސް ލިބިގެންވާ ހައްގެއް ކަމަށެވެ. ސީދާ ރައީސް ޔާމީންގެ ނަން ނުގެންނަވައި ރައީސް ވިދާޅުވީ ޕީއެންއެފް ނަމުގައި ޕާޓީ އުފައްދަން '''ބޭނުންފުޅުވި'' ބޭފުޅުންނަށް'' އެކަން ކުރުމުގެ ފުރުސަތު އޮންނަންވާނެ ކަމަށެެވެ.
އަދި އުފާ ވެސް ކުރަން ޖަލްސާ ބޭއްވިގެން، އެ ބޭފުޅުންގެ ގާނޫނީ ކަންކަން ރޭގައި ފުރިހަމަ ކުރެއްވީމަ މަރުހަބާވެސް ދަންނަަވަން
ނޫސްވެރިންނާ ވާހަކަފުޅު ދައްކަވަމުން ރައީސް ވިދާޅުވީ ޕީއެންއެފުގެ ޖަލްސާއަށް ހުރަސްއަޅައި އެސްއޯ ފުލުހުން ނުކުމެފައިވަނީ އެމަނިކުފާނުގެ އިރުޝާދާ ސީދާ ހިލާފަށް ކަމަށެވެ. އެެހެންވެ އެންގުމާ ހިލާފުވީ ފަރާތްތަކާއި މެދު ފިޔަވަޅު އަޅުއްވާނެކަމުގެ ޔަގީންކަން ރައީސް ދެއްވިއެވެ.
ރައީސް މުއިއްޒު ވިދާޅުވީ، ސިޔާސީ ގޮތުން އެއްވެސް މީހަކަށް ގޯނާއެއް ނުކުރުމަށް ހޯމް މިނިސްޓަރު އަލީ އިހުސާން އާއި ކޮމިޝަނާ އޮފް ޕޮލިސް އަލީ ޝުޖާއު އަށް މީގެ ކުރިން އިރުޝާދު ދެއްވާފައިވާ ކަމަށެވެ.
މިދިޔަ އަހަރުގެ ނޮވެމްބަރު މަހު ވެރިކަމާއި ހަވާލުވެވަޑައިގެންނެވި ރައީސް މުއިއްޒު ވިދާޅުވީ އެމަނިކުފާނު އަބަދުވެސް ބޭނުންފުޅުވަނީ ފުލުހުން ޕްރޮފެޝަނަލްކޮށް މަސައްކަތްކުރުމަށް ކަމަށެވެ. ކުރީގައި ފެނުނުގޮތަށް އެސްއޯ ފުލުހުން ރައްޔިތުންނަށް އަނިޔާކޮށް ހިފާ ހައްޔަރުކުރުން ފަދަ ކަންކަމަށް ޖާގަ ނުދެއްވާނެ ކަމުގެ ޔަގީންކަން ރައީސް ދެއްވިއެވެ.
ޕީއެންއެފުގެ އުފައްދާ ޖަލްސާ ބާއްވަން ސޯޝަލް ސެންޓަރުވެސް ސަރުކާރުން ހަމަޖެއްސިއެވެ. ޖަލްސާ ބާއްވަން ހުރަސްއެޅި މައްސަލާގައި އިދިކޮޅު އެމްޑީޕީން ވަނީ ކަންބޮޑުވުން ފާޅުކޮށްފައެވެ.
ޕީއެންއެފުން ވަނީ ގާތްގަނޑަކަށް 329 މެންބަރުންނާއެކު ޕާޓީ އުފައްދާ ޖަލްސާ ބާއްވައި ގާނޫނީ ގޮތުން ފުރިހަމަކުރަން ޖެހޭ ހުރިހާ ކަމެއް ކަމެއް ފުރިހަމަކޮށްފައެވެ. ޕާޓީގެ ވަގުތީ ރައީސަށް އިންތިހާބު ކޮށްފައިވަނީ ޔާމީންގެ ދަރިކަލުން ޒޭން ޔާމީންއެވެ.
ޕީއެންއެފް އުފައްދާފައިވާއިރު، އެ ޕާޓީއަކީ ޔާމީންއާ ސަރުކާރު ހިންގާ ޕީއެންސީ/ޕީޕީއެމްއާ ދެމެދު ރިޔާސީ އިންތިހާބުގައި ޖެހުނު ނުތަވަސްކަމުގެ ތެރެއިން އުފެދުނު ޕާޓީއެކެވެ. ޕާޓީ އުފެއްދުމުގެ ޖަލްސާގައި ޔާމީންގެ އަނބިކަނބަލުން ފާތިމަތު އިބްރާހިމް (މެޑަމް ފާތުން) ވެސް ބައިވެރިވެވަޑައިގެންނެވިއެވެ. ޖަލްސާ ނިމިފައި ވަނިކޮށް ޔާމީންވެސް އެ ސަރަހައްދަށް ވަޑައިގެން ސަޕޯޓަރުންނާ ބައްދަލުކުރެއްވިއެވެ.
Ads by STO
