ފީވަކު 20 ގެއަކަށް ފެން ވަދެއްޖެ
ރާއްޖޭގެ އެކި ސަރަހައްދުތަކަށް ކުރަމުންދާ ވިއްސާރާގައި ބޯކޮށް ވާރޭ ވެހި ށ. ފީވަކުގެ 20 ގެ ފެންވަދެގެން ރިޕޯޓްކޮށްފިއެވެ.
ނެޝަންލް ޑިޒާސްޓަ މެނޭޖްމެންޓް (އެންޑީއެމްއޭ) އިން ބުނީ، މިހާރު ކުރަމުންދާ ވިއްސާރާގައި އަތޮޅުތެރޭގެ ހާލަތުވެސް ބަލަމުން އަންނަ ކަމަށެވެ.
އެގޮތުން ށ. ފީވަކުގެ 20 ގެ އަކަށާއި ށ. ފޯކައިދޫ ތިން ގެއަކަށް ފެން ވަދެފައިވާ ކަމުގެ ރިޕޯޓު ލިބިފައިިވާ ކަމަށް އެންޑީއެމްއޭއިން ބުންޏެވެ. އެ އިދާރާއިން ބުނީ، ފެން ވަދެފައިވާ ގެތަކަށް އިޖާބަދިނުމުގެ މަސައްކަތުގައި ކައުންސިލްތަކާއި އިޖާބަދޭ ފަރާތްތައް ދަނީ ހަރަކާތްތެރިވަމުން ކަމަށެވެ.
ރާއްޖޭގެ އެކި ހިސާބުތަކަށް މޫސުންވެފައިވާއިރު މިއަދު ވެހުނު ވާރޭގައި މާލޭގައި ވަނީ ވަރަށް ބޮޑަށް ފެންބޮޑުވެފައެވެ. ފެން ހިންދުމުގެ މަސައްކަތް އެމްއެންޑީއެފުން ދަނީ ކުރަމުންނެވެ.
ކުރިއަށް އޮތް ދެ ދުވަހު ރާއްޖޭގެ އެކި ހިސާބުތަކަށް މޫސުން ގޯސްވާނެ ކަމަށް މެޓް އޮފީހުން މައުލޫމާތުދެއެވެ. ބޯކޮށްވާރޭވެހޭނެ ކަމަށް ލަފާކޮށް ހއ. އަތޮޅުން ފެށިގެން ލ. އަތޮޅަށް މިރޭ 12 ޖެހުމުގެ ނިޔަލަށް ޔެލޯ އެލާޓް ވަނީ ނެރެފައެވެ.
