ހުަޅުޖަހަން އުޅޭ ކަމަށް އެމްޑީޕީން ކުރި ތުހުމަތާއެކު ޕީއެންސީގެ ރައްދު ޓްވިޓާގައި!

ރައްޔިތުންގެ މަޖިލީހުގެ އިންތިހާބުގެ ވޯޓުލާން މަދު ވަގުތުކޮޅަކަށް ވެފައި އޮއްވައި ސަރުކާރުން މައި ޕާޓީ ޕީއެންސީ/ޕީޕީއެމްއާ އިދިކޮޅު އެމްޑީޕީއާ ދެމެދު ޓްވިޓާގައި މިރޭ ކޯޅެން ފަށައިފިއެވެ.

Ads by STELCO

މިކަމެއް ވެގެން މިއުޅެނީ އެމްޑީޕީގެ ރަސްމީ އެކައުންޓުން ޓްވިޓާގައި ކުުރި ތުހުމަތަކާއި ގުޅިގެންނެވެ. އެމްޑީޕީން ބުނީ ކ.ތުލުސްދޫ ދާއިރާއަށް އެ ޕާޓީގެ ޓިކެޓުގައި ވާދަކުރައްވާ ކުރީގެ ފިނޭންސް މިނިސްޓަރު އިބްރާހިމް އަމީރު އެ އަތޮޅު ދިއްފުށީގައި ދިރިއުޅޭ ގޭގައި ހުޅުޖަހައި ރޯކުރާނެ ކަމުގެ އިންޒާރު ޕީއެންސީގެ ކެންޑިޑޭޓު އިބްރާހިމް ނަސީމްގެ ސަޕޯޓަރުން ދީފައިވާ ކަމަށެވެ.

''އަދި އެ ރަށުގެ އަމާންކަން ނަގާލައި އެޕާޓީގެ ކެންޑިޓޭޓަށް ދުއްތުރާކުރުމުގެ އަމަލު މިޕާޓީއިން ކުށްވެރި ކުރަމެވެ'' އެމްޑީޕީން ބުންޏެވެ.

އާއްމު ގޮތެއްގައި މި ކަހަލަ ތުހުމަތުތަކަށް ޕީއެންސީ/ޕީޕީއެމް އިން ރައްދު ދެނީ ނޫސް ބަޔާނަކުންނެވެ. ނުވަތަ ޕްރެސްގައެވެ. އެއާއި ހިލާފަށް މިރޭ ޕީޕީއެމް އާއި ޕީއެންސީގެ ރަސްމީ އެކައުންޓުން ވަނީ އެމްޑީޕީއަށް ރައްދުދީފައެވެ.

''ތިޔަފަދަ ބުހުތާން ދޮގު ނުފަތުރާ! ފިތުނަ ފަސާދަ އުފެއްދުމަށް ތި ކުރާ ކަންތައް ކުށްވެރިކުރަން'' ޕީއެންސީގެ ކެންޑިޑޭޓުންނަކީ ތަންތަނުގައި ހުޅުޖަހާނެ ބައެއް ނޫން ކަމަށާއި މީގެ ކުރިންވެސް ތަންތަނުގައި ހުޅުޖަހާ ގައުމު ހަލަބޮލި ކުރީ އެމްޑީޕީން ކަމަށް ޕީއެންސީ/ޕީޕީއެމް އިން ބުންޏެވެ.

މަޖިލީސް އިންތިހާބުގެ ވޯޓުލާން ކުޑަތަން ވެފައިވާއިރު މި ދެ ޕާޓީގެ ވާދަވެރިކަން ވަނީ ވަރަށް ބޮޑުވެފައެވެ. މަޖިލީސް އިންތިހާބުގެ ވޯޓުލުން ފަށާނީ ހެނދުނު އަށެއް ޖަހާއިރުއެވެ. ވޯޓުލުން ކުރިއަށްދާނީ ހަވީރު 5:30 ގެ ނިޔަލަށެވެ. އިންތިހާބުގައި އެމްޑީޕީގެ 80 އަށްވުރެ ގިނަ ދާއިރާއަށް ވާދަކުރާއި ޕީއެންސީ ޓިކެޓުގައި 93 ކެންޑިޑޭޓުން ވާދަކުރެއެވެ.