ޓެސްޓިން ކެޕޭސިޓީ އިތުރުނުކޮށް ފަތުރުވެރިން އިތުރެއް ނުވާނެ: ބޮންޑޭ
ރާއްޖޭގައި ކޮވިޑް-19 އަށް ޓެސްޓް ކުރާ މީހުންގެ އަދަދުތައް އިތުރުނުކޮށް، ފަތުރުވެރިން އަންނަ އަދަދު އިތުރު ނުވާނެ ކަމަށް ރައްޔިތުންގެ މަޖިލިހުގެ މާފަންނު މެދު ދާއިރާގެއެމްޑީޕީގެ މެމްބަރު އިބްރާހިމް ރަޝީދު (ބޮންޑޭ) ރޭ ވިދާޅުވެއްޖެއެވެ.
ރާއްޖޭގައި އެވަރެޖުކޮށް ދުވާލެއްގެ މައްޗަށް 1000 ޓެސްޓު ހަދަމުން ދާއިރު މާލޭގެ އެކި ސަރަހައްދުގައި ސުންކު ނަގަމުން ދަނީ އެއްވެސް ތަރުތީބެއް ނެތިއެވެ. އަދި ޓެސްޓުކުރެވޭ މެޝިންތައް ހުންނަނީ އޭޑީކޭ ހޮސްޕިޓަލާއި، އައިޖީއެމްއެޗްގެ އިތުރުން ފުލުހުންގެ ލެބޯޓްރީގައެވެ.
ރާއްޖޭގެ ފަސް ސަރަހައްދެއްގައި ކޮވިޑް-19 އަށް ޓެސްޓް ކުރެވޭނެ އިންތިޒާމު ވަނީ ހަމަޖައްސައިފައެވެ. އެއީ ރ. އުނގޫފާއި، ބ. އޭދަފުއްޓާއި، ގދ. ތިނަދޫގެ އިތުރުން ލ. ގަމާއި އައްޑޫ ސިޓީއެވެ. އަދި އަތޮޅުތަކުގައި ކޮވިޑް-19 އަށް ޓެސްޓް ކުރުމަށް ޖީން އެކްސްޕާޓް ކާޓްރިޖުގެ 1،200 ކާޓްރިޖް އެބަހުއްޓެވެ.
ބޮންޑޭ ކުރެއްވި ޓުވީޓެއްގައި ވިދާޅުވީ ޓެސްޓް ކުރާނެ އާލާތްތައް "އެތައް މިތަނުން" ހަދިޔާކޮށްފައިވާ އިރު، ދައުލަތުން ޓެސްޓް ކިޓްތައް ގަތުމަށް އެތައް ހޭދައެއް ކުރަމުން އަންނަކަމަށެވެ. އެކަމަކު، ޓެސްޓިން ކެޕޭސިޓީ އަދިވެސް އިތުރު ނުކުރެވޭ ކަމަށްވެސް އޭނާގެ ޓުވީޓުގައި ވަނީ ހާމަކޮށްފައެވެ.
ރާއްޖެއިން ޓެސްޓު ކިޓުތައް ހުސްވާ ވަރަކުން ސަރުކާރުން ވަނީ ރާއްޖެއިން ބޭރުން ޓެސްޓު ކިޓުތައް ގެނެސްފައެވެ. ރާއްޖެ އަށް މިފަހަރު ޓެސްޓް ކިޓްތައް ގެންނަނީ ޗައިނާއާއި އެމެރިކާ އިންނެވެ.
ޓެސްޓިން ކެޕޭސިޓީ އިތުރުނުކޮށް ފަތުރުވެރިން އިތުރެއް ނުވާނެ ކަމަށް ބޮންޑޭ ވިދާޅުވި އިރު، ކޮވިޑް-19 އާ ގުޅިގެން ބޯޑަރު ބަންދުކޮށްފައި އޮތުމަށް ފަހު، ޖުލައި 15 ގައި އަލުން ބޯޑަރު ހުޅުވި ފަހުން، ދޮޅު މަސް ދުވަސްތެރޭ ރާއްޖެ އައީ 9،329 ޓޫރިސްޓުންނެވެ. ތަފާސްހިސާބުތައް ދައްކާގޮތުން މިހާތަނަށް އެންމެ ގިނަ ޓޫރިސްޓުން އައީ ޔޫއޭއީންނެވެ.
