ހައްގުތައް ނުދެވޭ ނަމަ ރައްޔިތުންގެ އަތުން ޓެކްސް ނަގައިގެން ނުވާނެ: އިބްރާ
ގާނޫނު އަސާސީގައި ބަޔާން ކޮށްފައި ހުރި ރައްޔިތުންގެ ހައްގުތައް ރައްކާތެރިކޮށް ނުދެވޭ ކަމުގައިވާ ނަމަ، ރައްޔިތުންގެ އަތުން ދައުލަތަށް އެއްވެސް ޓެކުހެއް ނަގައިގެން ނުވާނެކަމަށް ގާނޫނުއަސާސީ އެކުލަވާލި ރައްޔިތުންގެ ހާއްސަ މަޖިލީހުގައި މެމްބަރުކަން ކުރެއްވި އިބްރާހިމް އިސްމާއީލް (އިބްރާ) ވިދާޅުވެއްޖެއެވެ.
ރޭގެ ވަގުތެއްގައި އިބްރާ ކޮށްފައިވާ ޓުވީޓެއްގައި ވަނީ ކޮވިޑު-19 ފެތުރުން ހުއްޓުވުމަށް ޓަކައި ހެލްތު ޕްރޮޓެކްޝަން އޭޖެންސީ ( އެޗްޕީއޭ ) އިން އަޅާ ބައެއް ފިޔަވަޅުތަކަށް ފާޑުވިދާޅުވެފައެވެ. އެގޮތުން ގޭގައި ތިބެ ކުރާ ކުދި ވިޔަފާރިތައް ކުރުމަށްޓަކައި ވެސް ހުއްދަ ނަގަން ޖެހޭތޯ ވަނީ ސުވާލު ކުރައްވާފައެވެ.
ގާނޫނު އަސާސީގެ 19 ވަނަ މާއްދާގައި ވާގޮތުން އިސްލާމީ ޝަރީއަތުގައި ނުވަތަ ގާނޫނުގައި ކަނޑައެޅިގެން މަނާކޮށްފައި ނުވާ ކޮންމެ ކަމެއް ކުރުމުގެ މިނިވަން ކަން ކޮންމެ ރައްޔިތަކަށް ލިބިގެންވާ ކަމަށް އިބްރާގެ ޓުވީޓުގައި ހާމަ ކުރައްވާފައި ވެއެވެ.
އިބްރާ ކުރެއްވި ދެވަނަ ޓުވީޓެއްގައި ވިދާޅުވެފައި ވަނީ ގާނޫނު އަސާސީގައި ބަޔާން ކޮށްފައި ހުރި ރައްޔިތުންގެ ހައްގުތައް ރައްކާތެރި ނުކޮށްދެވޭނަމަ ރައްޔިތުންގެ އަތުން ދައުލަތަށް އެއްވެސް ޓެކުހެއް ނަގައިގެން ނުވާނެ ކަމަށެވެ.
އެހެންނަމަވެސް އިބްރާ މިހެން ޓުވީޓު ކުރައްވާފައި ވާއިރު އޮންލައިންކޮށް ކާބޯތަކެތި ވިއްކާނަމަ ރަޖިސްޓްރީ ކުރަން އެޗްޕީއޭއިން ވަނީ އަންގައިފައެވެ.
އާންމުންގެ ގިނަ ކަންބޮޑުވުންތަކެއް އަމާޒުވެފައިވަނިކޮށް އިކޮނޮމިކް މިނިސްޓްރީން ރޭ ނެރުނު ބަޔާނުގައި ވަނީ ގޭގައި ކުރާ ބައެއް އަމިއްލަ މަސައްކަތްތައް ރަޖިސްޓްރީ ކުރަން ނުޖެހޭނެ ކަމަށެވެ.
