އެމްޑަބްލިޔުއެސްސީ ގެ 72 މުވައްޒަފަކަށް ފްލެޓު ޔަގީންވެއްޖެ
މޯލްޑިވްސް ވޯޓަރ އެންޑް ސެވަރޭޖް ކޮމްޕެނީ (އެމްޑަބްލިޔުއެސްސީ) ގެ މުވައްޒަފުންނަށް ޚާއްސަކޮށްގެން ހުޅުމާލޭ ދެވަނަ ފިޔަވަހީގައި އިމާރާތްކުރާ ފްލެޓުތަކަށް ކުރިމަތިލި އެކުންފުނިން ކުރިމަތިލި 72 މީހަކަށް ފްލެޓު ލިބޭނެކަން ޔަގީން ވެއްޖެއެވެ.
މިއަދު އޮންލައިންކޮށް ބޭއްވި ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން އެކުންފުނީގެ މެނޭޖިން ޑިރެކްޓަރު ހަސަން ޝާހު ވިދާޅުވީ އެމްޑަބްލިޔުއެސްސީން އަޅާ ދެ ޓަވަރުގެ ތެރެއިން އެއް ޓަވަރުގެ އަމަލީ މަސައްކަތް ނިންމަން ކުންފުނިން އަމާޒު ހިފައިގެން އެ މަސައްކަތް ކުރިއަށްގެންދާ ކަމަށެވެ.
އެމްޑަބްލިޔުއެސްސީ އާއި ސަރުކާރުން ހަވާލުކުރި 15 ބުރީގެ ދެ ޓަވަރުގެ ތެރެއިން އެކުންފުނިން މިހާރު މަސައްކަތް ފަށާފައިވަނީ އެއް ޓަވަރުގެ ނިންމުމަށް ކަމަށް ވެސް ހަސަން ވިދާޅުވިއެވެ.
މީގެއިތުރުން އެމްޑަބްލިޔުއެސްސީ ގެ އެމްޑީ ވިދާޅުވީ އެކުންފުނީގެ ފުރަތަމަ ޓަވަރުގެ ސްޓްރަކްޗާ ނިންމައި ރޭނުމުގެ މަސައްކަތް މިހާރު ފަށާފައިވާ ކަމަށެވެ.
އެއް ކޮޓަރި، ދެ ކޮޓަރި އަދި ތިން ކޮޓަރީގެ އެޕާޓުމެންޓު ވެސް ހިމެނޭ މި ޓަވަރުގެ މަސައްކަތް ކުރަނީ ޗައިނާގެ ޓްވެންޓީ ތާޑް މެޓަލާޖިކަލް ކޮންސްޓްރަކްޝަން ގްރޫޕް ކޯ ލިމިޓެޑް އޮފް މިންމެޓަލްސް އިންނެވެ.
"މި މަސައްކަތުގެ ޕްރޮގްރެސް ދަންނަވާނަމަ 55 ޕަސެންޓާ 60 ޕަސެންޓާ ދެމެދަށް މަސައްކަތް ވަނީ ނިމިފައި،" ޝާހު ވިދާޅުވިއެވެ.
