ތެދުވެރި ނޫސްވެރިކަން ކުރަން މާލީ މިނިވަންކަން ހޯދަންޖެހޭ: މީޑިއާ ކައުންސިލް
ތެދުވެރިކަމާއި ޒިންމާދާރުކަމާ އެކު ހަބަރު ފެތުރުމުގައި ނޫސްވެރިން ދެމި ތިބުމަށް އެންމެ ބޮޑު ބާރެއް ނޫސްވެރިންނަށް ލިބޭނީ، އެ މީހުންގެ މާލީ މިނިވަންކަން ހޯދުމަށް އަހަންމިއްޔަތުކަން ދީގެން ކަމަށް މޯލްޑިވްސް މީޑިއާ ކައުންސިލް (އެމްއެމްސީ) ގެ ރައީސް އަހްމަދު މުސްތަފާ ވިދާޅުވެއްޖެ އެވެ.
ދުނިޔޭގެ ނޫސްވެރިކަމުގެ މިނިވަންކަމުގެ ދުވަހާ ގުޅިގެން ދެއްވި ހިތާބުގައި މުސްތަފާ ވިދާޅުވީ، ނޫސްވެރިކަމުގެ މިނިވަންކަން ރާއްޖޭގެ ގާނޫނު އަސާސީގައި ބަޔާން ކުރި ނަމަވެސް، ނޫސްވެރިންނާއި މީޑިއާތަކަށް އަބަދު ވެސް ގިނަގުނަ ގޮންޖެހުންތައް ކުރިމަތިވާ ކަމަށެވެ.
އޭނާ ވިދާޅުވީ ނޫސް އިދާރާތަކުގެ މާލީ މިނިވަންކަން އޮންނަ މިންވަރެއްގެ މައްޗަށް އެ މީޑިއާތަކުގެ މިނިވަންކަން ބަރޯސާ ކުރަން ޖެހޭ ހާލަތު ކޮންމެ ވެސް މިންވަރަކަށް ތަޖުރިބާ ކުރަން ޖެހޭ ކަމަށެވެ. އަދި، މިކަމަށް ދައުލަތުގެ ހުރިހާ ބާރުތަކަކުން ހާއްސަ ނަޒަރިއްޔާތެއް ބެހެއްޓުން ގޮވާލެއްވި އެވެ.
"ނޫސްވެރިކަމުގެ އެންމެ މައިގަނޑު އަސާސްތައް ކަމުގައިވާ ތެދުވެރިކަމާއި، ޒިންމާދާރުކަމާއެކު ހަބަރު ފެތުރުމުގައި ނޫސްވެރިން ދެމިތިބުމަށް އެންމެ ބޮޑު ބާރެއް ލިބިގެންދާނީ އެ ފަރާތްތަކުގެ މާލީ މިނިވަންކަން ހޯދުމަށް އަހައްމިއްޔަތުކަން ދީގެން ކަމަށް އަޅުގަނޑު ދެކެން،" މުސްތަފާ ވިދާޅުވިއެވެ.
ނޫސްވެރިކަމުގެ މިނިވަންކަމުގެ ދުވަސް ފާހަގަކުރާއިރު ދިވެހި ނޫސްވެރިންނާއި މީޑިއާތަކަށް މާލީ މިނިވަންކަން ހޯދުމަށް، ގައުމީ، އިދާރީ އަދި ފަރުދީ ފެންވަރުގައި ވެސް ގިނަގުނަ މަސައްކަތްތަކެއް ކުރަން ޖެހޭ ކަމަށެވެ.
މީގެ އިތުރުން، ރާއްޖޭގެ ސޯޝަލް މީޑިޔާގައި ހަރަކާތްތެރިވި މަޝްހޫރު ބްލޮގާ، ޔާމީން ރަޝީދުއާއި މިނިވަން ނޫހުގެ ނޫސްވެރިޔާ އަހުމަދު ރިލްވާންގެ މަރުގެ މައްސަލައިގައި އިންސާފު ނުލިބި އޮތުމަކީ ދުނިޔޭގެ ނޫސްވެރިކަމަށް ވެސް ކުރިމަތިވެފައި އޮތް އިއާދަ ނުކުރެވޭ ވަރުގެ ބޮޑު ގެއްލުމެއް ކަމަށެވެ.
މާލީ ގޮތުން ދަތިއްޔާ ދޮގުޚަބަރު ފެތުރުން އެއީ ކުރަންޖެހޭ ކަމެއް ކަމަށް މީނާ މިބުނަނީ