ކުޑަކުދިންގެ ދުވަހު ރައީސް އާކުރެއްވީ އަނިޔާ ލިބެމުންދާ ފަލަސްތީނު ކުދިންގެ ހަނދާން
މިއަދު ފާހަގަކުރަމުން އަންނަ ކުޑަކުދިންގެ ދުވަހާ ގުޅިގެން އިޒްރޭލުގެ އަނިޔާވެރިކަމުގެ ޝިކާރައަކަށް ވެފައިވާ ފަލަސްތީނު އެތައް ހާސް ކުޑަކުދިންގެ ހަނދާން ރައީސް ޑރ. މުހައްމަދު މުއިއްޒު އާ ކުރައްވައިފި އެވެ.
ކުޑަކުދިންގެ ދުވަހާއި ގުޅިގެން ދެއްވި ހިތޯބުގައި، ދުވަހުގެ ތަހުނިޔާ އަރިސްކުރުމަށް ފަހު ރައީސް ވިދާޅުވީ, މިފަދަ ދުވަހެއްގައި، ހިތަށް ވެރިވާ އުފާވެރި އަދި އުންމީދީ އިހުސާސްތަކާއެކު ހިތާމަވެރި އަސަރުތަކެއް ކުރުވާ ކަމަށެވެ.
"އެއީ، ފަލަސްޠީނުގެ ބިމުގައި އަނިޔާ ލިބި، ބިކަ ހާލުގައި ޖެހެމުންދާ އެތައް ހާސް ކުޑަކުދީންނެވެ. އިޒްރޭލުގެ އަނިޔާވެރި އަތްތަކުގެ ޝިކާރައަކަށްވެ، ޙަޔާތުގެ ޅަނދޮޅު ފޯވަހީގެ އެންމެ ހިތްފަހި ދުވަސްތަކުގެ އުފަލާއި، ތަޢުލީމާއި، ޢާއިލީ ލޯބިން މަޙްރޫމްވަމުން އެދާ މަޢުޞޫމް ކުދީންނަކީ ހަމަ އަޅުގަނޑުމެންގެވެސް ދަރީންނެވެ." ރައީސް ވިދާޅުވި އެވެ.
ރައީސް ވަނީ, އެ ކުދީންގެ ތެރެއިން ޝަހީދުވާ ކޮންމެ ކުއްޖަކަށް ސުވަރުގޭގައި ކީރިތިﷲ ވަޢުދުވެވޮޑިގެންފައިވާ މަތިވެރި ނިޢުމަތް މިންވަރު ކުރެއްވުމަށާއި އަނިޔާލިބި ގެދޮރާއި ސަހަރޯވެރީން ގެއްލި ނިކަމެތިވަމުންދާ ކޮންމެ ކުއްޖަކަށް ކީރިތި ﷲގެ ރަޙްމަތާއި މަދަދުގެ ހާސްދޮރު ހުޅުއްވުމަށް ދުއާ ކުރައްވައިފަ އެވެ.
ކުޑަކުދިންގެ ދުވަހާ ގުޅިގެން ރައީސް ދެއްވި ހިތޯބުގައި އިތުރަށް ވަނީ އުސްތާޛުލްޖީލް މަރުޙޫމް މުޙައްމަދު ޖަމީލުދީދީ "ހައްތާވެސް ދަރީންނެވެ." ކުރުވާހަކަ ހަނދާނަށް ގެންނަވައި, އެ ވާހަކައިން ލިބިދޭ އެންމެ ބޮޑު އިބުރަތަކީ އުފަން ދަރީން ނޫނަސް، ކޮންމެ ކުޑަކުއްޖަކީވެސް ދަރިއެއްކަމުގައި ދެކި އޯގާތެރިކަމާއި އެހީތެރިކަމާއެކު ދިރިއުޅެން ފަށައިފި މީހެއްގެ ނަފްސާއި ރޫޙަށް ހަމަޖެހުން ލިބިދޭކަން ކަމުގައި ފާހަގަކުރައްވައިފަ އެވެ.
ރައީސް ވިދާޅުވީ މިއީ ކޮންމެ މީހަކުވެސް މިއަދު ވިސްނާލުން މުހިންމު ކަމެއް ކަމަށެވެ. އަދި ކުޑަކުދީންނަށް ރައްކާތެރިކަން ދީ، ރީތި ނަމޫނާ ދައްކާ، ހެޔޮމަގަށް އެކުދީންގެ ސުލޫކު ބައްޓަންކުރަން މަގުދައްކައިދިނުމުގައި ހަމަ ކޮންމެ މީހަކުވެސް ދެމިހުރުމަކީ ކޮނޑުގައި އެޅިފައިވާ ވަރަށް މުހިންމު ދީނީ، އިންސާނީ، އަދި ޤައުމީ މަސްއޫލިއްޔަތެއް ކަމަށްވެސް ރައީސް ވިދާޅުވި އެވެ.
އެމަނިކުފާނު އިތުރަށް ވިދާޅުވީ ދިވެހި ލޮބުވެތި ކުޑަކުދީން ބޮޑެތި ކުރަންވާނީ، އިސްލާމީ އުޞޫލުތަކަށް ކަމޭހިތައި، ދިވެހިވަންތަކަމަށް ލޯބިކުރާ، ޤައުމު އިސްކުރާ، ގޮތްހުރި އުޅުންހުރި ޖީލެއްގެ ގޮތުގައި ކަމަށާއި މިއީ ވެސް އެންމެންގެ ޒިންމާއެއް ކަމަށެވެ.
ރާއްޖޭގެ ރަށްރަށުގައި ގިނަ ބަޔަކު އެދޭ ގޮތަށް ކުޑަކުދީންނަށާއި ޢާއިލާތަކަށް ބޭނުންވާނެ ފަދަ ޕާކުތައް، ސަރުކާރުން ބިނާކުރަމުން ދާކަން ރައީސް ފާހަގަކުރެއްވި އެވެ. އަދި ރާއްޖޭގެ އެކި ކަންކޮޅުތަކުގައި ކުތުބުޚާނާތައް ބިނާކުރަން ފަށައި، ކުޑަކުދީންގެ ސިކުނޑިތަކަށް ޢިލްމާއި މަޢުލޫމާތުން ކާނާ ލިބޭނެ މަގުތައް އިތުރުކޮށްދޭން ސަރުކާރުން މަސައްކަތް ކުރަމުން ދާކަމަށްވެސް ރައީސް ވިދާޅުވި އެވެ.
"ބަވަނަވަމުން މިދާ ދުނިޔެއަށް ހަލުވިކަމާއެކު އަންނަ ބަދަލުތަކާއި، ކުރިއަރަމުން އަންނަ ޓެކްނޮލޮޖީތަކަށް ދަރީން އަހުލުވެރިކުރުވަން ވާނީ އަޅުގަނޑުމެން ނުހަނު ހުޝިޔާރުވެ ތިބެއެވެ. ޒަމާނީ ކޮންމެ އޮއިވަރަކާއެކު އަންނަ ނުކިއްސަރު ކަންކަމުން ދަރީން ދަފަރާ ކުރާން ހޭލުންތެރިވެ ތިބެ އެވެ." ރައީސް ވިދާޅުވި އެވެ.
ރައީސް ވަނީ މި ހުރިހާ ކަމެއްގައި ސަރުކާރުން ހުރިހާ މައިންބަފައިންނާއި، ބެލެނިވެރީންނާއި، ސަހަރޯވެރީންނާވެސް އެއްބާރުލައި އަތުގުޅާލައިގެން މަސައްކަތްކުރާނެ ކަމުގެ ޔަގީންކަން ދެއްވައިފަ އެވެ.
