ކުލި ކޮންޓްރޯލް ކޮށްފިނަމަ ގެއްލުން ލިބޭނެ، އެއީ ހައްލެއް ނޫން: ވަޒީރު

މާލެ ސަރަހައްދުގައި ގެދޮރުން ނަގާ ކުލި ކޮންޓްރޯލް ކުރުމުގެ ސަބަބުން ގެއްލުންތަކެއް ލިބޭނެ ކަމަށާއި އެއީ ހައްލު ނޫންކަމަށް ގެދޮރުވެރިކަމާއި ބެހޭ ވަޒީރު ޑރ. އަލީ ހައިދަރު އަހުމަދު ވިދާޅުވެއްޖެ އެވެ.

Ads by STELCO

މާލެ ސަރަހައްދުގައި އަތް ނުފޯރާ ފަށަށް ގެދޮރުގެ ކުލި މަތިވެފައިވާތީ އެކަމުގެ ކަންބޮޑުވުން ފާޅުކުރާތާ ދުވަސްތަކެއް ވެއްޖެ އެވެ. އެހެންނަމަވެސް މިއަދާ ހަމައަށްވެސް މިމައްސަލައަށް އޮތީ ހައްލެއް ނުލިބި އެވެ.

މިމައުޟޫގައި ވާހަކަ ދައްކަވަމުން ވަޒީރު ޑރ. ހައިދަރު ވިދާޅުވީ ކުލި ކޮންޓްރޯލްކުރުން މާކެޓަށް ދޫކޮށްލަން ޖެހެނީ އެ ކޮންޓްރޯލްކޮށްފި ނަމަ އޭގެ ސަބަބުން ބައެއް މައްސަލަތައް ދިމާވެދާނެތީ ކަމަށެވެ. އެގޮތުން ލިބިދާނެ އެއް ގެއްލުމެއްގެ ގޮތުގައި ހައިދަރު ފާހަގަކުރެއްވީ ގެދޮރު އިމާރާތް ކުރަން ގެތަކުގެ ވެރިން ނަގާ ބޮޑެތި ލޯނު ނުދެއްކި ގިނަ ދުވަސްވެގެން ދިޔުމެވެ.

"އެއީ ހުޅުވާލެވިފައިވާ މާކެޓެއް އޮންނަ ގައުމެއްގައި ކުރަން ކަމުދާ ކަމެއް ކަމުގައި އިކޮނޮމިސްޓުން ވެސް ގަބޫލެއްނުކުރޭ. އެހެންވީމަ އަޅުގަނޑަކަށް ހިޔެއްނުވޭ ކުލި ކޮންޓްރޯލްކުރުމަކީ އަޅުގަނޑުމެން ކުރަން ކަމުދާ ކަމެއްހެނެއް،" ވަޒީރު ވިދާޅުވި އެވެ.

މީގެ ކުރިން 800 މީހުންގެ ސޮޔާއިއެކު ކުލި ކޮންޓްރޯލް ކުރުމަށް ގޮވާލައި ރައްޔިތުންގެ މަޖިލީހަށް ޕެޓިޝަނެއްވެސް އާންމުންގެ ޖަމިއްޔާއަކުން ހުށަހެޅި އެވެ. އެހެންނަމަވެސް މަޖިލީހުން އެ ޕެޓިޝަން ބޭރުކޮށްލީ އެވެ.

ކުރީގެ ރައީސް އަބްދުﷲ ޔާމީންގެ ވެރިކަމުގައިވެސް ކުލި ކޮންޓްރޯލް ކުރުމުގެ ބަދަލުގައި މާލެ ސަރަހައްދުގައި ގެދޮރަށް އޮންނަ ޑިމާންޑަށްވުރެއް، ބިމާއި ފްލެޓު އިތުރުކުރަން އިސްކަން ދީގެން މަސައްކަތްތަކެއް ކުރި އެވެ. މިސަރުކާރުންވެސް ގެންގުޅެނީ އެ ސިޔާސަތެވެ.

ރައީސް ޑރ. މުހައްމަދު މުއިއްޒު ވަނީ މި ދައުރު ނިމޭއިރު ބޯހިޔާވަހިކަން ކަށަވަރު ނުވާ އެއްވެސް ރައްޔިތަކު ނުހުންނާނެކަމަށް ވިދާޅުވެފަ އެވެ. އަދި މާލެ ސަރަހައްދުގައި ގެދޮރުވެރިކަން ތަނަވަސްކޮށްދިނުމަށް އެމަނިކުފާނު ވަނީ ވައުދުވެވަޑައިގެންފަ އެވެ.