ކައުންސިލް ހިންގަން އާ އިމާރާތް އަޅާނެ 50 ރަށް ކަނޑައަޅަނީ
މިއަހަރު ތެރޭގައި ގާއިމްކޮށްދެއްވުމަށް ރައީސް ޑރ. މުހައްމަދު މުއިއްޒު ވައުދުވަޑައިގެންނެވި 50 ކައުންސިލު އިދާރާ އަޅާނެ ރަށްތައް މި މަހުގެ ތެރޭގައި ކަނޑައެޅޭނެ ކަމަށް މިނިސްޓާ އޮފް ސިޓީސް ލޯކަލް ގަވަމެންޓް އެންޑް ޕަބްލިކް ވޯކްސް އާދަމް ޝަރީފް ރޭ ވިދާޅުވެއްޖެ އެވެ.
50 ރަށެއްގެ ކައުންސިލަށް އާ އިމާރާތެއް އެޅުމުގެ މަސައްކަތް ފެށިގެންދާނެކަން ރައީސް މުއިއްޒު އިއުލާންކުރެއްވީ ފެބްރުއަރީ މަހު ބޮޑުތިލަދުންމައްޗަށް ކުރެއްވި ދަތުރުފުޅުގެ ތެރެއިން ހދ. މަކުނުދޫގެ ރައްޔިތުންނާ ބައްދަލުކުރައްވާ ވާހަކަފުޅު ދައްކަވަމުންނެވެ.
ރޭ، ދައުލަތުގެ މީޑިއާ، ޕީއެސްއެމްގައި ވާހަކަ ދައްކަވަމުން އާދަމް ޝަރީފް ވިދާޅުވީ ކައުންސިލުގެ އޮފީސް އިމާރާތްތައް އަޅާނެ ރަށްތައް ކަނޑައެޅުމާއި ގުޅޭ މަޝްވަރާތައް ކުރިއަށްދާ ކަމަށެވެ. އެކަމަށް ހާއްސަ އުސޫލެއް އެކުލަވާލާފައިވާ ކަމަަށް މިނިސްޓަރު ވިދާޅުވި އެވެ.
އަދި ކަނޑައަޅާފައިވާ ކްރައިޓީރިއާ އަށް ބަލައިގެން ރަށްތައް ކަނޑައެޅުމުގެ މަސައްކަތް މިމަސް ނިމުމުގެ ކުރިން ނިންމާލަން އަމާޒު ހިފާފައިވާ ކަމަށް ވެސް މިނިސްޓަރު ވިދާޅުވި އެވެ. މަޝްރޫއު ކުރިއަށް ދަނީ ޗައިނާ ސަރުކާރުގެ ހިލޭ އެހީގަ އެވެ.
ކައުންސިލު އިދާރާ ކަނޑައެޅުމުގައި ބޭނުންކުރާނެ މިންގަނޑުތަކާއި މާކްސް ދެވޭނެ ގޮތްތަކަށް ބަލާއިރު، ގިނަ ޕޮއިންޓް ލިބެނީ ރަށުގެ އާބާދީއާއި، ކައުންސިލުންގެ ވަސީލަތް އަދި އިމާރާތުގެ ހާލަތު (އިމާރާތުގެ އައުބައުމިން) އަށެވެ. މި ތިން ކެޓެގަރީއަށް ކަނޑައެޅިފައިވަނީ 20 ޕޮއިންޓެވެ.
ކައުންސިލްތައް އިމާރާތްކުރުމުގައި ދެން ބަލަނީ، އެ ކައުންސިލަރުން މަސައްކަތްކުރާނެ ޖާގައޮތްތޯ އާއި، މުވައްޒަފުން މަސައްކަތްކުރާނެ ޖާގައޮތްތޯ އާއި، އަންހެނުންގެ ތަރައްގީއަށް މަސައްކަތްކުރާ ކޮމެޓީގެ މެމްބަރުންނަށް ކައުންސިލް އިދާރާގައި ޖާގަ އޮތްތޯ އަދި އެ ކައުންސިލަކީ ކަންގަތި އެވޯޑް ލިބިފައިވާ ކައުންސިލެއްތޯއެވެ. މިއިން ކޮންމެ ކެޓެގަރީއަކަށް ކަނޑައެޅިފައިވަނީ 10 ޕޮއިންޓެވެ.
Ads by STO
