ކޮވިޑް-19: ފަސްޓް ލޭޑީ ފަޒްނާ ބައިވެރިވެ ވަޑައިގެންނެވި އިވެންޓަކަށް ދިޔަ ނޫސްވެރިއަކު ފައްސި ވެއްޖެ
ރައީސުލް ޖުމްހޫރިއްޔާ އިބްރާހިމް މުޙައްމަދު ޞާލިޙުގެ އަނބިކަނބަލުން ފަޒްނާ އަޙުމަދު ބައިވެރިވެ ވަޑައިގެންނެވި އިވެންޓެއް ކަވަރ ކުރަން ދިޔަ ނޫސްވެރިއަކު ކޮވިޑަށް ފައްސި ވެއްޖެއެވެ.
އެނގިފައިވާ ގޮތުގައި އެނޫސްވެރިޔާ ގޮސްފައިވަނީ، މިދިޔަ އަންގާރަ ދުވަހު، ފަސްޓް ލޭޑީ ފަޒްނާ ބައިވެރިވެ ވަޑައިގެންނެވި "ޕްރޮޖެކްޓް ގާޑިއަން" އިފްތިތާހް ކުރުމުގެ އިވެންޓަށެވެ.
އޮންލައިން ނޫސް "ވަގުތު" އިން ބުނެފައިވާ ގޮތުގައި އެނޫސްވެރިޔާ ވަނީ ހުޅުމާލޭ ޕޮލިސް ސްޓޭޝަން ހުޅުވުމުގެ ރަސްމިއްޔާތުގައިވެސް ބައިވެރިވެފައެވެ. އެރަސްމިއްޔާތުގައި ހޯމް މިނިސްޓަރ އިމްރާން އަބްދުﷲ އާއި ކޮމިޝަނަރ އޮފް ޕޮލިސް މުހައްމަދު ހަމީދު ވެސް ބައިވެރިވެ ވަޑައިގެންނެވިއެވެ.
މިކަމާއި ގުޅޭގޮތުން ސަރުކާރުގެ އެއްވެސް އިދާރާއަކުން އަދި ރަސްމީކޮށް އެއްވެސް ބަހެއް ލިބިފައެއް ނުވެއެވެ.
ރާއްޖެއިން ކޮވިޑަށް ފައްސިވީ މީހުންގެ ޖުމްލަ އަދަދު މިހާރު ވަނީ 8،281 އަށް އަރާފައެވެ.
އައިސޮލޭޝަން ފެސިލިޓީތަކުގައި މިބައްޔަށް ފަރުވާ ހޯދާ 1،304 މީހުން ތިބިއިރު، ހޮސްޕިޓަލުތަކުން ފަރުވާ ހޯދަމުންދަނީ 157 މީހެކެވެ. މިހާތަނަށް ބަލާއިރު ރާއްޖެއިން މި ބަލިން ފަސޭހަވެފައިވަނީ ޖުމްލަ 5،483 މީހުންނެވެ. އަދި 29 މީހަކު މިބަލީގައި ނިޔާވެފައިވެއެވެ.
