ކުށުގެ ވެށީގައި އުޅޭ ކުދިން ބައިތިއްބަން ހަދާ ''ހޯޕް އައިލެންޑް'' ގެ މަސައްކަތް ފަށައިފި
ކުށުގެ ވެއްޓަށް ހުށަހެޅޭ ކުދިން ރިހެބިލިޓޭޓްކުރަން ސަރުކާރުން ތަރައްގީކުރާ ''ހޯޕް އައިލެންޑް'' ގެ މަސައްކަތް ކުރިއަށްދާ ކަމަށް ހޯމް ލޭންޑް ސެކިއުރިޓީ މިނިސްޓަރު އަލީ އިހްސާން މިއަދު ވިދާޅުވެއްޖެއެވެ.
ކުށުގެ ވެއްޓަށް އަރައިގަންނަ 18 އަހަރު ނުފުރޭ ކުދިންނަށް ރިހެބިލިޓޭޝަން ދިނުމުގެ މަސައްކަތް ސަރުކާރުން އަންނަނީ ކުރަމުންނެވެ. މިއަދު އިސްކަންދަރު ކޮށީގައި ބޭއްވި ''ހޯމްޓީމް'' ޕްރެސްގައި މިނިސްޓަރު ވިދާޅުވީ ސަރުކާރުގެ ވިސްނުމަކީ ކުށުގެ ވެއްޓަށް ހުށަހެޅޭ ކުދިން ހަރުދަނާ ބައެއްގެ ގޮތުގައި ހަދައި މުޖުތަމައަށް ނެރުން ކަމަށެވެ.
"ބޭނުމަކީ ތުއްތުކުދިން ޖަލަށް ލުމެއް ނޫން އެކުދިން ކުށުގެ މާހައުލުން ނަގާ މުޖުތަމައުއަށް ފައިދާހުރި ކުދިން ތަކަކަށް ހެދުން" މިނިސްޓަރު ވިދާޅުވިއެވެ.
މިނިސްޓަރު ވިދާޅުވީ ސަރުކާރުގެ ވިސްނުމަކީ ވަކި ރަށެއް މިކަމަށް ގާއިމުކޮށް ވަކި ޕްރޮގްރާމްތަކެއް ހިންގުން ކަމަށެވެ. އަދި “ހޯޕް އައިލެންޑް”ގެ ނަމުގައި މި ރަށް ގާއިމުކުރުމުގެ ތައްޔާރީތައް ކުރިއަށް ދާކަމަށް މިނިސްޓަރު ހާމަކުރެއްވިއެވެ.
އެ ރަށުގައި ކުދިން ރިހެބިލިޓޭޝަން ދެވުމުގެ ނަތީޖާއަކަށް ވާނީ ގޮތުން މުޖުތަމައުއަށް ބޭނުންތެރި ބަޔަކަށް ވެގެން ދިޔުން ކަމަށް އިހުސާން ވިދާޅުވިއެވެ.
މީގެ އިތުރުން އެކުދިންނަށް 18 އަހަރުވިމުން ފުލުހުން ނުވަތަ ސިފައިންގެ ހިދުމަތައް ވެއްދުން އަދި ވަކި މުއްދަތަކަށް ފަހު އެކުދިން ބޭނުންވާ ދާއިރާ އަށް ނިކުތުމުގެ ފުރުސަތު ލިބިގެން ދާނެ ކަމަށްވެސް މިނިސްޓަރު ފާހަގަކުރިއެވެ.
މީގެ ކުރިން ޖިނާއި ކުށުގެ ޒިންމާ ނަގަން ޖެހޭ އުމުރަކީ 15 އަހަރެވެ. ނަމަވެސް މި ސަރުކާރުން ވަނީ މި އުމުރު 12 އަހަރަށް ބަދަލުކުރަން ނިންމާފައިއެވެ.
ރާއްޖޭގައި ކުށުގެ ވެށީގެ މާހައުލުގައި 12 އަހަރާއި 13 އަހަރުގެ ގިނަ އަދަދެއްގެ ކުދިން އުޅެމުންދާ ކަމަށްވެސް ސަރުކާރުން ވަނީ ހާމަކޮށްފައިއެވެ.
