ގެއްލިގެން ހޯދަމުންދާ ދޯނި އަދިވެސް ނުފެނޭ
ހަތަރު މީހުންނާއެކު، ހުކުރު ދުވަހު ކ. ތިލަފުށިން ފުރައިގެން މ. މެދުފުށި އައިލެންޑް ރިޒޯޓަށް ދަތުރުކުރަމުން ދަނިކޮށް ގެއްލުނު ''އޭއޭއޭ-37'' ދޯނި އަދިވެސް ނުފެންނަ ކަމަށާއި ހޯދުމުގެ މަސައްކަތް ކުރިއަށްދާ ކަމަށް އެމްއެންޑީއެފުން ބުނެފި އެވެ.
ގެއްލިގެން ހޯދަމުންދާ މުދާ އުފުލާ އެ ދޯނިން ދިވެއްސަކާއި، ބަންގްލަދޭޝްގެ ތިން މީހުން ދަތުރުކުރި އެވެ.
އެމްއެންޑީއެފުން މިއަދު ހަވީރު ބުނީ, ގެއްލިގެން ހޯދަމުންދާ މުދާ އުފުލާ ދޯނި ހޯދުމަށް އެމްއެންޑީއެފް ކޯސްޓްގާޑުން ކުރިއަށްގެންދާ އޮޕަރޭޝަންގައި ކަނޑާއި ވައިގެމަގުން ހޯދުމުގެ މަސައްކަތް މިހާރުވެސް ދަނީ ކުރިއަށްދާ ކަމަށެވެ.
"މިހާތަނަށް އަދި ފެނިފައެއްނުވޭ," އެ މައްސަލައިގެ އެންމެ ފަހުގެ އަދާހަމަ ދެމުން އެމްއެންޑީއެފް މީޑިއާ އޮފިޝަލް ވިދާޅުވިއެވެ.
އެމްއެންޑީއެފުން ބުނެފައިވާ ގޮތުން ''އޭއޭއޭ-37'' ދޯނި ތިލަފުށިން ފުރީ ހުކުރު ދުވަހު ހެނދުނު 6 ހާއިރު އެވެ. ދޯނީގެ ހަބަރެއް ނުވެގެން، އެކަމުގެ މައަލޫމާތު އެމްއެންޑީއެފް ކޯސްޓްގާޑު މެރިޓައިމް ރެސްކިޔު ކޯޑިނޭޝަން ސެންޓާ (އެމްއާރުސީސީ) އަށް ރިޕޯޓް ލިބުނީ އެ ދުވަހުގެ 05:20 ހާއިރެވެ
އެ ދޯނި ހޯދުމުގެ އޮޕަރޭޝަންގައި ކޯސްޓުގާޑުގެ އުޅަނދުތަކުގެ އިތުރުން މޯލްޑިވިއަންގެ މަތިންދާ ބޯޓެއްވެސް ބޭނުން ކުރެ އެެވެ.
ދޯންޏާ ބެހޭ އެއްވެސް މައުލޫމާތެއް ލިބިއްޖެނަމަ އެމްއެންޑީއެފް ކޯސްޓްގާޑުގެ ހިލޭ ގުޅޭ ނަމްބަރު 191 ގުޅައި، މައުލޫމާތު ހިއްސާކުރަން އެދިފައިވެ އެވެ.
