އައްޑޫ ގުޅިފައިވާ ރަށްތަކުގެ ފެނުގެ ހިދުމަތަށް ބުރޫއަރާތީ އިދިކޮޅުގެ ކުއްލި މައްސަލައެއް
އައްޑޫ ގުޅިފައިވާ ރަށްތަކުގެ ފެނުގެ ހިދުމަތަށް ދިމާވެފައިވާ މައްސަލަ ހައްލުކުރުމަށް އިދިކޮޅު އެމްޑީޕީން މަޖިލީހަށް ކުއްލި މައްސަލައެއް ހުށަހަޅައިފި އެވެ.
މަޖިލީހުގެ މިއަދުގެ ޖަލްސާއަށް މި ކުއްލި މައްސަލަ ހުށަހަޅާފައިވަނީ ހިތަދޫ ދެކުނު ދާއިރާގެ މެންބަރު އިބްރާހިމް ނާޒިލް އެވެ.
ނާޒިލް ހުށަހެޅުއްވި މައްސަލައިގައި ބުނެފައިވަނީ އެޕްރިލް 2024، އިން ފެށިގެން އައްޑޫގެ ގުޅިފައިވާ ރަށްތަކަށް ފެން ނުލިބޭ ކަމަށާއި، މީގެ ސަބަބުން ރައްޔިތުންގެ އާންމު ދިރިއުޅުމަށް ބުރޫއަރައި ރައްޔިތުންނަށް އެތައް ތަކުލީފެއް ކުރިމަތިވަމުން އަންނަ ކަމަށެވެ.
ކުއްލި މައްސަލާގައިވާ ގޮތުން އެ މައްސަލަ ހައްލު ނުވެ ދިގުލައިގެންދާތީ އާންމުންނާއި ވިޔަފާރިތަކަށް ވެސް އޭގެ އަސަރު ދަނީ ކުރަމުންނެވެ. އެހެންކަމުން މައްސަލަ ވީ އެންމެ އަވަހަކަށް ހައްލު ކުރުމަށް މައްސަލާގައި ގޮވާލާއިފައިވެއެވެ.
މި މައްސަލަ މަޖިލީހަށް ބަލައިގަތުމަށް ނެގި ވޯޓުގައި ދެކޮޅަށް އެއްވެސް މެންބަރަކު ވޯޓު ދެއްވާފައިނުވެ އެވެ. ސަރުކާރު ހިންގާ ޕާޓީގެ ސުޕަމެޖޯރިޓީ އޮންނަ މަޖިލީހުން ބިލު ބަލައިގެންފައިވަނީ 83 ވޯޓުންނެވެ.
އައްޑޫ ސިޓީގެ ގުޅިފައިވާ ރަށްތަކަށް ދިމާވެފައިވާ ފެނުގެ މައްސަލައަށް ދާއިމީ ހައްލެއް ލިބޭނީ ފެނުގެ ނިޒާމު އަޕްގްރޭޑް ކުރުމުގެ މަޝްރޫއު ނިމުމުން ކަމަށް ފެނަކައިން ބުނެފައިވާއިރު މައްސަލަ ހައްލުކުރުމަށް އެމްޑަބްލިޔުއެސްސީއާއެކު ވަނީ ސޮއިކޮށްފަ އެވެ.
