ކެންސަރު ފަރުވާއަށް މިނިސްޓަރު ރަމީލާ އަނެއްކާވެސް އެޑްމިޓްވެއްޖެ
ކެންސަރު ބައްޔަށް ފަރުވާ ހޯއްދަވަމުން ގެންދަވާ އެގްރިކަލްޗަރ އެންޑް އެނިމަލް ވެލްފެއަރ މިނިސްޓަރު ރަމީލާ އަނެއްކާ ވެސް އިތުރު ފަރުވާއަށް ހޮސްޕިޓަލުގައި އެޑްމިޓް ކުރައްވައިފި އެވެ.
އެ ބައްޔަށް ޑައިގްނޯސްވުމާ ގުޅިގެން ކީމޯ އާއި ރޭޑިއޭޝަން ތެރަޕީ ނެގުމަށް ރާއްޖެއިން ބޭރަށް ރަމީލާ އެންމެ ފުރަތަމަ ވަޑައިގެންނެވީ މިދިޔަ ނޮވެންބަރު މަހު ފަހުކޮޅުގަ އެވެ. ބަލި ޖެހިފައިވާކަން އެނގިވަޑައިގަތީ ކެންސަރުގެ އެޑްވާންސް ސްޓޭޖުގައި ހުއްޓައި ކަމަށް އެކަމަނާ ވިދާޅުވެފައިވެ އެވެ.
ފަރުވާއަށް ފަހު އަލުން މަސައްކަތަކާ ގުޅިވަޑައިގެން ފަހުން ދުވަސްކޮޅެއް ވެފައިވާއިރު, މިނިސްޓަރު މިއަދު "އެކްސް" ގައި ވިދާޅުވީ އިތުރު ސާޖަރީއަކަށް އަނެއްކާވެސް ހޮސްޕިޓަލުގައި އެޑްމިޓުވެފައިވާ ކަމަށާއި ކީމޯ ތެރަޕީ އަދި އިމިއުނޯ ތެރަޕީ ނަންގަވާނެ ކަމަށެވެ.
މިނިސްޓަރު ފަރުވާ ހޯއްދަވަމުން ގެންދަވަނީ ރަހިމުގެ ދޮރަށް ޖެހޭ ކެންސަރު، "މެޓަސްޓެޓިސް ސީރަސް ޕަޕިލަރީ ކާސިނޯމާ" އަށެވެ.
ރަމީލާގެ ޕޯސްޓުގައި ވަނީ ކޮންމެ ދުވަހަކު ކުރިމަތިވާ ގޮންޖެހުންތަކުން ސަލާމަތްވާން ލިބޭ ހިތްވަރަށް ﷲ އަށް ޝުކުރު އަދާކުރައްވައިފަ އެވެ.
