މި އަހަރު ވެސް އޮތީ ޑެފިސިޓް ބަޖެޓެއް، ހަރަދު ކުޑަކުރަން ފިޔަވަޅުތައް އަޅާނެ: ޝަފީގް
މި އަހަރުވެސް އޮތީ 14 ބިލިއަން ރުފިޔާގެ ޑެފިސިޓެއް ކަމަށާއި ހަރަދު ކުޑަކުރުމަށް ފިޔަވަޅުތައް އަޅާނެ ކަމަށް ފިނޭންސް މިނިސްޓަރު ޑރ. މުހައްމަދު ޝަފީގު ވިދާޅުވެއްޖެއެވެ.
ރައްޔިތުންގެ މަޖިލިހުގެ މާލިއްޔަތު ކޮމިޓީގައި މިއަދު ވާހަކަފުޅު ދައްކަވަމުން ޝަފީގް ވިދާޅުވީ މިހާރު ކުރިޔަށްދަނީ ބަޖެޓް ކުޑަކުރުމަށް ޓައިމްލައިނެއް ހެދުން ކަމަށެވެ. އަދި ކުންފުނިތަކަށް ދޭ ސަބްސިޑީ ކުޑަކުރުމަށް ވެސް މަަސައްކަތް ކުރައްވާނެ ކަމަށް ޝަފީގް ވިދާޅުވިއެވެ.
ޝަފީގް ވިދާޅުވީ މާލީ ހާލަތު ހަމަޔަކަށް އެޅުވުމަށް، ވީ އެންމެ އަވަހަކަށް ރިފޯމުތައް އަވަސް ކުރަން ޖެހޭ ކަމަށާއި އެކަން ކުރުމަށް މަޖިލީހުގެ ފުރިހަމަ އެއްބާރުލުން ބޭނުންވާ ކަމަށެވެ.
“މި ރިފޯމު ކުރުމަކީ މިހާރު އަޅުގަނޑުމެންނަށް އޮޕްޝަނެއް ނޫން. މި ކަމުގައި މަޖިލީހުންގެ މެންބަރުންގެ އެއްބާރުލުން ބޭނުން” ޝަފީގް ވިދާޅުވިއެވެ.
އަދި ވޭތުވެދިޔަ ދެ އަހަރު ވެސް ފާސްކޮށްފައި އޮތީ ޑެފިސިޓް ބޮޑު ބަޖެޓެއް ކަމަށާއި މި އަހަރު ވެސް އޮތީ 14 ބިލިއަން ރުފިޔާގެ ޑެފިސިޓް ބަޖެޓެއް ކަމަށް ޝަފީގް ވިދާޅުވިއެވެ. މީގެ އިތުރުން ސަރުކާރުގެ މުވައްޒަފުންގެ މުސާރަ ހާމަނައިޒް ކުރުމުގެ މަސައްކަތް ވެސް ވަރަށް އަވަހަށް ފަށާނެ ކަމަށާއި މުޅި އާބާދީގެ ގާތްގަނޑަކަށް 46 ޕަސެންޓަށް މުސާރަ ބޮޑު ކުރެވިފައިވާ ކަމަށް މިނިސްޓަރު ފާހަގަކުރެއްވިއެވެ.
