ތިލަފުށީގައި ހުސް ބިން ހުރިނަމަ އަދި ހުޅުވައިލާނެ
ސިނާއީ ބޭނުމަށް ތިލަފުށިން ބިމަށް އެދި މިހާރު ހުށަހެޅި ފަރާތްތަކަށް ބިން ދޫކުރުމަށްފަހު އިތުރު ބިން ހުރިނަމަ އަލުން ހުޅުވައިލާނެކަމަށް ހައުސިންގް ޑިވެލޮޕްމެންޓް ކޯޕަރޭޝަން, އެޗްޑީސީން ބުނެފި އެވެ.
ތިލަފުށިން ބިން ބޭނުންވާ ފަރާތްތަކުން އެކަމަށް އެދި ހުށަހެޅުމަށް ހުޅުވައިލީ މިމަހުގެ 14 ވަނަ ދުވަހާއި ހަމައަށެވެ. އެޗްޑީސީން ބުނީ މިހާރު ކުރަމުން ދަނީ އާންމުން ހުށަހެޅި ސިޓީތަކަށް ބިމުގެ ޖާގަ ހުރި މިންވަރުން ބިން ދޫކުރުމުގެ މަސައްކަތް ކަމަށެވެ. ބިން ދޫކުރަމުން ދާނީ އުސޫލުތަކުގެ ތެރެއިން ސިޓީ ހުށަހެޅި ތަރުތީބުންނެވެ.
އެޗްޑީސީން ބުނީ ތިލަފުށިން ބިން ބޭނުންވެގެން ގިނަ ބަޔަކު އެދިފައިވާ ކަމަށެވެ.
މި އެންމެންނަށް ބިން ދޫކުރުމަށްފަހު އިތުރު ޖާގަ ހުރިނަމަ ބިންތައް ކުއްޔަށް ދޫކުރުމަށް އަދި ހުޅުވައިލާނެ ކަމަށްވެސް އެ ކޯޕަރޭޝަނުން ވަނީ ބުނެފަ އެވެ.
އެޗްޑީސީން ބުނީ އިތުރު މައުލޫމާތު ހޯދުމަށް 1516 އަށް ގުޅަން އެދޭ ކަމަށެވެ.
Ads by STO
