ސްކޭމްތަކުގައި މުވައްޒަފުންގެ ބައިވެރިވުމެއް ނެތް: ބީއެމްއެލް
ސްކޭމްތަކުގައި ބޭންކް އޮފް މޯލްޑިވްސް (ބީއެމްއެލް) މުވައްޒަފެއްގެ ބައިވެރިވާކަން ފާހަގަކުރެވިފައިނުވާ ކަމުގެ ޔަގީންކަން އެ ބޭންކުން ދީފި އެވެ.
ސްކޭމްތަކުގައި މުވައްޒަފެއްގެ ބައިވެރިވުމެއް ނެތް ކަމުގެ ޔަގީންކަން އެ ބޭންކުންދީފއިވަނީ މިއަދު ބޭއްވި ރައްޔިތުންގެ މަޖިލީހުގެ ސްޓޭޓް އޯންޑް އެންޓަޕްރައިޒެސް ކޮމިޓީގެ ބައްދަލުވުމުގަ އެވެ. އެ ބައްދަލުވުމުގައި ވާހަކަ ދައްކަވަމުން ބީއެމްއެލްގެ ޑިރެކްޓާ އޮފް ރީޓެއިލް، ބިޒްނަސް އެންޑް އެސްއެމްއީ ބޭންކިން މޫސާ ނިމާލް ވިދާޅުވީ މިހާތަނަށް އެފަދަ އެއްވެސް އިޝާރާތެއް ވެސް ލިބިފައިނުވާ ކަމަށެވެ.
"އަޅުގަނޑުމެން ހަމަ ޔަގީންކަން އަރުވަން ސްޓާފުންގެ ބައިވެރިވުމެއް އަދި މިހާތަނަށް ފާހަގަކުރެވިފައެއް ނުވޭ. ދެން މި ސްކޭމް އިންސިޑެންޓްސްތަކަކީ އެކަމާ ބެހޭ ފަރާތްތަކަށް ރިޕޯޓު ކުރެވިގެން އިންވެސްޓިގޭޝަން އާ އެއްޗެހި ހިނގާ ކަންކަން. އަދި މިހާތަނަކަށް އެއްވެސް ފަރާތަކުން އަޅުގަނޑުމެންނަށް އިޝާރާތެއް ލިބިފައެއް ނުވޭ." ނިމާލް ވިދާޅުވި އެވެ.
އެ ބައްދަލުވުމުގައި އޭނާ ވަނީ ސްކޭމްގެ މައްސަލަތައް ރިޕޯޓު ކުރެވިިފައިވާ ގޮތް ވެސް ކޮމިޓީއާ ހިއްސާކުރައްވާފަ އެވެ.
އެގޮތުން، އޭނާ ވިދާޅުވީ މިއަހަރު ސްކޭމްގެ 1400 މައްސަލަ ރިޕޯޓުކޮށްފައިވާ ކަމަށެވެ. އަދި ރިޕޯޓު ކުރާ މައްސަލަތަކުގެ ތެރެއިން 39 އިންސައްތަ އަކީ އާއިލާ މީހަކަށް ހެދިގެން ފައިސާ ޓްރާންސްފާކުރުވާ މައްސަލަތައް ކަމަށެވެ.
އިޝްތިހާރުތަކުގައި ހުންނަ މުދާ ގަންނަން ފައިސާ ޓްރާންސްފާ ކުރުވުމުގެ މައްސަލަތައް ޖުމްލަ މައްސަލަތަކުގެ 35 އިންސައްތަ ހިއްސާ ކުރާއިރު 20 އިންސައްތަ އަކީ ވައިބާ ނުވަތަ ޓެލެގްރާމް ގްރޫޕްތަކުގައި ހިނގާ ބޭރު ފައިސާގެ މުއާމަލާތްތަކުގެ ސްކޭމްގެ މައްސަލަތަކެވެ.
ނިމާލް ވިދާޅުވި ގޮތުގައި 20 އަކީ ބީއެމްއެލް އިންޓަނެޓް ބޭންކިން އެފްގެ ލޮގިން ކޮމްޕްރޮމައިޒް ވާ މައްސަލަތައް ކަމަށެވެ.
Ads by STO
