އަންނަ އަހަރަށް ކަނޑައެޅި 59.7 ބިލިއަން ރުފިޔާގެ ބަޖެޓު ކޮމިޓީން ފާސްކޮށްފި
ސަރުކާރުން ހުށަހެޅި 59.7 ބިލިއަން ރުފިޔާގެ ބަޖެޓަށް އެއްވެސް ބަދަލެއް ނުގެނެސް، މަޖިލީހުގެ ބަޖެޓު ދިރާސާކުރާ ކޮމިޓީން މިއަދު ވަނީ ފާސްކޮށްފައެވެ.
ސަރުކާރުން އަންނަ އަހަރަށް ލަފާކޮށް ރައްޔިތުންގެ މަޖިލީހަށް ހުށަހެޅި 59.7 ބިލިއަން ރުފިޔާގެ ބަޖެޓު، އެއްވެސް އުނިއިތުރެއް ނުގެނެސް ބަޖެޓު ދިރާސާކުރާ ކޮމިޓީން ފާސްކޮށްފިއެވެ.
އަންނަ އަހަރަށް ލަފާކޮށް ހުށަހަޅާފައި ވަނީ ޖުމްލަ 59,704,440,795 ރުފިޔާގެ ބަޖެޓެކެވެ. މިއީ މިއަހަރަށް ފާސްކުރި 64.2 ބިލިއަން ރުފިޔާގެ ބަޖެޓާ އަޅާބަލާއިރު 4.5 ބިލިއަން ރުފިޔާ މަދު އަދަދެކެވެ.
ބަޖެޓު ދިރާސާކުރާ ކޮމިޓީން ބޭއްވި ބައްދަލުވުމުގައި، ފިނޭންސް މިނިސްޓްރީން ފޮނުވި ގޮތަށް ބަޖެޓު ފާސްކުރަން ހުށަހެޅުއްވީ ކެލާ ދާއިރާގެ މެންބަރު އަބްދުﷲ ޝަރީފެވެ. އެ ހުށަހެޅުމަށް މައްޗަންގޮޅި މެދު ދާއިރާގެ މެންބަރު އަހްމަދު ޒަމީރު ތާއީދު ކުރެއްވިއިރު، ބަޖެޓު ފާސްވީ ކޮމިޓީގެ 10 މެންބަރުންގެ ވޯޓުންނެވެ.
ބަޖެޓާ ގުޅޭގޮތުން ކޮމިޓީ މަރުހަލާގައި ކުރި މަޝްވަރާތަކުގައި މިނިވަން މުއައްސަސާތަކުން ވަނީ ބަޖެޓު ކުޑަވުމުގެ ޝަކުވާ ހުށަހަޅާފައެވެ. ނަމަވެސް މާލީ ވަޒީރު ހަސަން ޒަރީރު ވިދާޅުވީ، މިހާރު ކަނޑައަޅާފައިވާ މިންވަރުން ފުދޭނެ ކަމަށާއި، އިތުރު ހަރަދެއް ކުރަން ޖެހިއްޖެ ނަމަ ކޮންޓިންޖެންސީ ބަޖެޓުން އެކަން ހަމަޖެއްސޭނެ ކަމަށެވެ.
އަންނަ އަހަރުގެ ބަޖެޓުގައި މައިގަނޑު 10 ދާއިރާއަކަށް ބަހާލައިގެން ޚަރަދުތައް ހިމަނާފައިވާއިރު، އެންމެ ބޮޑު ބަޖެޓެއް ކަނޑައަޅާފައިވަނީ ސިއްހީ ދާއިރާއަށެވެ. އެ ދާއިރާއަށް 10.6 ބިލިއަން ރުފިޔާ ވަނީ ކަނޑައަޅާފައެވެ. މީގެ އިތުރުން ތައުލީމީ ދާއިރާ، އިގްތިސާދީ ދާއިރާ އަދި އިޖުތިމާއީ ރައްކާތެރިކަމުގެ ދާއިރާ ފަދަ މުހިންމު ދާއިރާތައް ބަޖެޓުގައި ހިމެނެއެވެ.




ކޮމެންޓް
މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.