މެމްބަރުންގެ އަދަދު ހިފެހެއްޓުމާ އެކު، ގާބިލު މީހާއަށް ފުރުސަތު ދޭން ޖެހޭ: މަހްފޫޒް
ރައްޔިތުންގެ މަޖިލިހުގެ މެމްބަރުންގެ އަދަދު ހިފެހެއްޓުމާ އެކު، އެކަމަށް އެންމެ ގާބިލު މީހާއަށް ފުރުސަތު ދޭން ޖެހޭ ކަމަށް އިދިކޮޅު މައި ޕާޓީ، އެމްޑީޕީގެ ލީގަލް ޑިރެކްޓަރު މަހްފޫޒް ސައީދު ވިދާޅުވެއްޖެ އެވެ.
މިނިވަން މުއައްސަސާތަކުގެ ކޮމިޓީގެ މިއަދުގެ ބައްދަލުވުމުގައި ކުރިއަށް ގެންގޮސްފައި ވަނީ ރައްޔިތުންގެ މަޖިލިިހުގެ މެމްބަރުންގެ އަދަދު ކޮންމެ ފަސް އަހަރަކުން އިތުރުވަމުންދާ ދިއުމާ މެދު 20 ވަނަ ރައްޔިތުންގެ މަޖިލިހުގެ މެމްބަރުން ދެކެވަޑައިގަންނަވާ ގޮތެއް ދެނެގަތުމަށް ބާރަށު ދާއިރާގެ ކޮންގްރެސް ޕާޓީގެ މެމްބަރު އިބްރާހިމް ޝުޖާއު ހުށަހަޅުއްވާފައިވާ ގަރާރު ދިރާސާ ކުރުމުގެ މަސައްކަތެވެ.
ގަރާރާ މެދު ދެކޭ ގޮތް ދެނެގަތުމަށް ބޭއްވި މި ބައްދަލުވުމުގައި މަހްފޫޒް ވިދާޅުވީ މިހާރު ހުށަހެޅިފައިވާ ގަރާރުގައި މެމްބަރުންގެ އަދަދު މަދުކުރަން ހުށަހަޅާފައި ވަނީ މެމްބަރުންގެ އަދަދު އިތުރުވަމުންދާ ދިއުމުގެ ސަބަބުން ދައުލަތަށް މާލީ ގޮތުން ތަކުލީފަކަށްވާތީ އެ ވިސްނުމުގައި އެކަނި ކަމަށެވެ. ގާނޫނު އަސާސީ އެކުލަވާލިއިރު މެމްބަރުންގެ އަދަދުގެ ގޮތުގައި ވަކި އަދަދެއް ކަނޑައަޅާފައި ނުވާ ސަބަބުތަކާ އަދި ކަމާ ގުޅުންހުރި ކަންކަމަށް އަލިއަޅުއްވާލައްވާ މަހްފޫޒް ވިދާޅުވެފައި ވަނީ މެމްބަރުން ކަނޑައެޅުމުގައި ބަޔާންކޮށްފައިވާ މަގުސަދުތައް ނުގެއްލޭ ގޮތަށް އެކަން ކުރުން މުހިންމު ކަމަށެވެ.
މެމްބަރުންގެ އަދަދާ މެދު ބަހުސް ކުރެވޭއިރު، ރައްޔިތުންގެ ބައިވެރިވުން ގެއްލިގެން ނުދާނޭ ގޮތަށް އެކަން ކުރުމަކީ ބޭނުންތެރި ކަމެއް ކަމަށް އޭނާ ވިދާޅުވި އެވެ. މަހްފޫޒް ފާހަގަކުރެއްވި ގޮތުގައި މެމްބަރުންގެ ޖުމްލަ އަދަދެއް ގާނޫނު އަސާސީގައި ކަނޑައަޅާއިރު، އެ އަދަދު އިންތިހާބު ކުރާނީ ކޮންގޮތަކަށްކަން ވެސް ކަނޑައެޅެން ޖެހޭ ކަމުގަ އެވެ.
"އެ އަދަދު އިންތިހާބު ކުރާނީ ކިހިނެއްތޯ. ކޮންމެ އަތޮޅަކަށް ކިތައް މެމްބަރުންތޯ. އަތޮޅުގެ ގޮތުންތޯ ނުވަތަ އާބާދީގެ ގޮތުންތޯ. އަތޮޅަށް ނުބަލައި މުޅި ރާއްޖޭން 65 މެމްބަރުން އިންތިހާބު ކުރާނީތޯ،" މެމްބަރުން ކަނޑައަޅާނެ ގޮތަކާ ގުޅޭގޮތުން މަހްފޫޒް ވިދާޅުވި އެވެ.
އެމްޑީޕީގެ ލީގަލް ޑިރެކްޓަރު އިތުރަށް ވިދާޅުވި ގޮތުގައި މަޖިލިހަށް މިހާރު މެމްބަރުން އިންތިހާބު ކުރެވޭ ގޮތަށް ބެލުމުން ބައެއް ދާއިރާތަކުން، ވަރަށް ކުޑަކުޑަ އާބަދީއެއްގެ ތެރެއިން މެމްބަރުން އިންތިހާބުވެގެން އަންނަތަން ފެންނަ ކަމުގަ އެވެ. އެގޮތަށް ދިމާވުމުން އެ ދާއިރާއެެއްގައި ހުރި އެންމެ ނުފޫޒުގަދަ، އެންމެ ފައިސާގެ ގޮތުން ތަނަވަސް ނުވަތަ އެންމެ އާއިލާ ބޮޑު މީހާ އިންތިހާބުވުމުގައި ފުރުސަތު އޮތް މިންވަރު ބަލަން ޖެހޭ ކަމުގަ އެވެ.
"ރައްޔިތުންގެ މަޖިލީހުގެ މެމްބަރުން އިންތިހާބު މި ކުރަނީ އޭނާ މެދުވެރިކޮށް ގާނޫނު ހެދުމަށް ކަމަށްވާއިރު، އެ ދާއިރާގައި ހުރި އެންމެ ނުފޫޒުގަދަ ނުވަތަ ރައްޔިތުންގެ ތެރެއިން އެންމެ ގިނަ ބަޔަކާ އެންމެ ގުޅުން ބޮޑު މީހާއަށް ދެވޭ ފުރުސަތެއްގެ ގޮތުގައި މިހާރު ބަދަލުވެގެން ގޮސްފައި އޮތީ،" މެމްބަރުން އިންތިހާބުވަމުން އަންނަ ގޮތާ ބެހޭގޮތުން މަހްފޫޒް ވިދާޅުވި އެވެ.
އޭނާ ވިދާޅުވެފައި ގާނޫނު އަސާސީގެ 71 ވަނަ މާއްދާއަށް އިސްލާހު ހުށަހަޅާއިރު މި ހުރިހާ ކަަމަކަށް ރިއާޔަތް ކުރެވެން ޖެހޭނެ ކަަމަށެވެ. އެގޮތުން މަހްފޫޒް ފާހަގަކުރެއްވީ:
- މެމްބަރަކަށް ނުފޫޒު ނުފޯރުވާ ކަމަށް އެންމެ ގާބިލު މީހާ އިންތިހާބު ކުރެވޭނެ މަގު ހޯދުން
- ރައްޔިތުންގެ ފުރިހަަމަ ބައިވެރިވުން ނުގެއްލޭނެ ގޮތަކަށް އަމަލުކުރުން
- މަޖިލިހުގެ ޖުމްލަ އަދަދަކީ ވަކި މީހެއްގެ ކޮންޓްރޯލުގެ ދަށަށް ގެންދެވޭ ފަދަ މަދު އަދަދަކަށް ނުވުން
- ކަނޑައަޅާނެ މެމްބަރުންގެ އަދަދުގެ ހައްލު ހޯދުން
މި ކަންކަން ހިމެނޭހެން ފުޅާ ދާއިރާއެއްގައި މަޝްވަރާ ކުރެވިގެން ނޫން ގޮތަކަށް ބަދަލު ގެނައުމަކީ ރަނގަޅު ކަމަކަށް ނުވާނެ ކަމަށް މަހްފޫޒް ވިދާޅުވި އެވެ.
"މަޖިލިހުގެ މެމްބަރުންގެ އަދަދު ވަކިވަރެއްގައި ހިފެއްޓިފައި އޮތުން. އަދި ބޮޑަށް ރަނގަޅީ ވެސް ގާނޫނު އަސާސީގެ ސީދާ މި އަދަދަކީ މިއީ ކަމަށް ކަނޑައެޅިފައި އޮތުން. އެއީ ރަނގަޅު ގޮތެއް ކަމަށް ފެންނަނީ. މިގޮތަށް ގެނައުމަށް އަޅުގަނޑުމެން ތާއީދުކުރަން،" އަދަދު ކަނޑައެޅުމުގައި އުސޫލެއް އޮންނަންވާނެކަން ފާހަގަކުރައްވާ މަހްފޫޒް ވިދާޅުވި އެވެ.
މަހްފޫޒްގެ ވާހަކައިގައި ވަނީ މެމްބަރުންގެ އަދަދު ކަނޑައެޅުމުގައި ރައްޔިތުންގެ މަޖިލިހުން މިހާރު އަމަލުކުރަމުން އަންނަ ތަރުތީބު ރަނގަޅުކަން ފާހަގަކުރައްވާފަ އެވެ.
