ކޮވިޑް-19: އަލްޙަމްދުލިއްﷲ. އިތުރު 114 މީހުން ބަލިން ފަސޭހަ ވެއްޖެ
ރާއްޖެއިން ކޮވިޑް-19 އަށް ފައްސީ މީހުންގެ ތެރެއިން އިތުރު 114 މީހަކު މިބަލިން ފަސޭހަ ވެއްޖެއެވެ.
ރާއްޖޭގައި ކޮވިޑަށް ފައްސިވީ މީހުންގެ ތެރެއިން މިހާތަނަށް ބަލިން ރަނގަޅުވި މީހުންގެ ޢަދަދު މިހާރު ވަނީ 5936 އަށް އަރާފައެވެ.
އެޗްޕީއޭ އިން ބުނެފައިވާ ގޮތުގައި އިއްޔެގެ އިރުއޮއްސި 6:00 އިން މިއަދުގެ އިރުއޮއްސި 6:00 އަށް ރާއްޖެއިން ކޮވިޑަށް ފައްސި ވެފައިވަނީ 72 ދިވެހިންނާއި 26 ބިދޭސީންނާއެކު ޖުމްލަ 98 މީހުންނެވެ.
ފައްސިވީ ބިދޭސީންގެ ތެރޭގައި ހިމެނެނީ ބަނގްލަދޭޝް 12 މީހަކާއި، އިންޑިއާގެ 4 މީހަކާއި، ޗައިނާގެ 5 މީހަކާއި، ނޭޕާލުގެ 2 މީހަކާއި، އިޓަލީ މީހަކާއި، ބްރެޒިލް މީހެއްގެ އިތުރުން ސްޕެއިންގެ މީހެކެވެ.
މިއަދު ގްރޭޓާރ މާލެ ސަރަޙައްދުން ފައްސިވީ 87 މީހެކެވެ. އަދި އަތޮޅުތެރެއިން 11 މީހެކެވެ.
މީގެއިތުރުން މިބަލި ޖެހުނު މީހުންގެ ތެރެއިން 22 ދިވެހިންނާއި، 7 ބިދޭސީއަކު ހިމެނޭހެން މިހާތަނަށް 29 މީހަކު ރާއްޖެއިން މި ބަލީގައި ވަނީ ނިޔާވެފައެވެ.
މިފަަހަކަށް އައިސް ރާއްޖެއިން ކޮވިޑަށް ފައްސިވާ މީހުންގެ ޖުމްލަ އަދަދު އާއްމުގޮތެއްގައި ހުންނަނީ 100 އަށްވުރެ މަތީގައެވެ. ބަލި ކޮންޓްރޯލްކޮށް ރައްކާތެރިވުމުގެ ގޮތުން އެޗްޕީއޭއިން އަންނަނީ ގިނަ ގުނަ ކަންތައްތަކެއް އިލްތިމާސް ކޮށްފައެވެ.
އޭގެ ތެރޭގައި، ބޭރަށް ނިކުންނައިރު މާސްކު އެޅުމަށާއި، އިޖުތިމާއި ގައިދުރުކަން ދެމެހެއްޓުމުގެ ގޮތުން އެކަކު އަނެކަކާއި 3 ފޫޓު ދުރުމިން ބެހެއްޓުމަށް ވެސް އަންގާފައިވެއެވެ. އަދި ކޮންމެހެން ބޭރަށް ނިކުންނަން ޖެހިގެން ނޫނީ ބޭރުތެރޭގައި ނޫޅުމަށް ވެސް އެޗްޕީއޭ އިން އިލްތިމާސް ކޮށްފައިވެއެވެ.
Ads by STO
