ވިނަރެސް ބޭރުގައި ހުރި ތަކެތި އެޗްޑީސީން ނަގައިފި، ހަވާލު ނުވާނަމަ ނައްތައިލަނީ
ހުޅުމާލެ ދެވަނަ ފިޔަވަހީގައި ހުރި ވިނަރެސް ޓަވަރުތަކުގެ އާންމު ސަރަހައްދުތަކުގައި ހުރި ތަކެތި ހައުސިންގް ޑިވެލޮޕްމެންޓް ކޯޕަރޭޝަން، އެޗްޑީސީން ނަގައިފި އެވެ.
މިދިޔަ މެއި މަހުގެ 29 ވަނަ ދުވަހު އެޗްޑީސީން ވަނީ ވިނަރެސް ފްލެޓުތަކުގެ އާންމު ސަރަހައްދުތަކުގައި ހުރި ގަސްމުށި، ފައިވާން، ބޫޓު، ފަރުނީޗަރު އަދި އެނޫންވެސް ހިފާ ގެންގުޅޭ ތަކެތި އެސަރަހައްދުތަކުން ނަގަން އަންގައިފަ އެވެ. އެހެންނަމަވެސް މި އެންގުމަށް ބައެއް ފަރާތްތަކުން އިޖާބަ ދީފައި ނުވާތީ އެޗްޑީސީވް ވަނީ މިދިޔަ ޖުލައި މަހުގެ 21 ގެ ނިޔަލަށް ހުރިހާ ޓަވަރުތަކުގެ ބޭރު ސާފުކޮށް ނިންމައިފަ އެވެ.
އެ ކޯޕަރޭޝަނުން އިއްޔެ ކުރި އިއުލާނެއްގައި ބުނީ އާންމު ސަރަހައްދުތަކުން ނެގި ކުނި ފިޔަވައި، ހިފާ ގެންގުޅޭ ތަކެތި، ވިނަރެސް 7 ގެ މެނޭޖުމެންޓު އޮފީހުގައި ބަހައްޓާފައިވާނެ ކަމަށެވެ. އަދި އެތަކެއްޗާއި ހަވާލުވުމަށް މިމަހު 8 ގެ ނިޔަލަށް މުއްދަތު ދީފައި ވެއެވެ.
އެޗްޑީސީން ބުނީ ސުންގަޑީގެ ކުރިން ތަކެއްޗާއި ހަވާލު ނުވާނަމަ އެތަކެތި ނައްތައިލާނެ ކަމަށެވެ.
މިއާއެކު އެކުންފުނިން ވަނީ ވިނަރެސް އިމާރާތްތަކުގެ އާންމު ބައިތައް ހަމަހަމަ އުސޫލެއްގެ ދަށުން ބޭނުން ކުރުމަކީ އިމާރާތުގައި ހިތްގައިމު އަދި ރައްކާތެރި މާހައުލެއް ބިނާކުރުމަށް ވަރަށް މުހިންމު ކަމެއްކަން ފާހަގަކޮށްފަ އެވެ.
ވިނަރެސް އާންމު ސަރަހައްދުތައް ބޭނުން ކުރުމުގެ އުސޫލެއް އެޗްޑީސީގެ ވެބްސައިޓުގައި ވަނީ އާންމު ކޮށްފަ އެވެ. އެ ކޯޕަރޭޝަނުން އެދެނީ އެ އުސޫލާއި ހިލާފަށް އެއްވެސް މީހަކު ކަންކަން ނުކުރުމަށެވެ.
Ads by STO
