އާއިލީ ކަމެއް ދިމާވެގެން މިއަދުގެ ޖަލްސާއަށް މިނިސްޓަރަށް ވަޑައިނުގަނެވުނު
އާއިލީ ކަމެއް ދިމާވެގެން، މިއަދުގެ ޖަލްސާގައި ވަޒީރުންނާ ސުވާލުކުރުމުގެ ވަގުތުގައި ހައުސިން މިނިސްޓަރު ޑރ. އަލީ ހައިދަރުއާ ސުވާލުކުރަން އެޖެންޑާ ކޮށްފައިވަނިކޮށް ރައްޔިތުންގެ މަޖިލިހަށް ވަޑައިނުގެންނެވި އެވެ.
މިއަދުގެ ޖަލްސާގައި އެޖެންޑާ ކޮށްފައި އޮތީ ހައުސިން ސްކީމްތަކާއި ބެހޭ ގޮތުން ސުވާލުކުރުމެވެ. މިނިސްޓަރާ ސުވާލުކުރަން ހުށަހެޅީ ގަލޮޅު އުތުރު ދާއިރާގެ މުހައްމަދު އިބްރާހީމް (ކުޑޫ) ކުރެއްވުމެވެ.
ކުޑޫގެ ފުރަތަމަ ސުވާލަކީ ގުޅީފަޅުން ބިން ލިބުނު ފަރާތްތަކަށް އިން ވަކިކޮށް ބިން ހަވާލުކުރަން ފަށާނީ ކޮން ދުވަހަކުތޯ އެވެ. ދެވަނަ ސުވާލަކީ ބިންވެރިޔާ ސްކީމުގެ ދަށުން ކުރީގެ ރައީސް އިބްރާހީމް މުހައްމަދު ސޯލިހުގެ ސަރުކާރުން މާލޭ މީހުންނަށް ބޯހިޔާވަހިކަން ފޯރުކޮށްދިނުމަށް ދީފައިވާ ގޯތިތައް އޭގެ ވެރިފަރާތްތަކަށް ހަވާލު ކުރެވޭނީ ކިހާ ހިސާބަކުތޯ އެވެ. އޭގެ އިތުރުން ހުޅުމާލޭގެ ދެވަނަ ފިޔަވަހީގައި އިމާރާތް ކުރަމުންދާ 4،000 ފްލެޓް ކާމިޔާބުވީ ފަރާތްތަކަށް އެ ފްލެޓް ހަވާލުކުރެވޭނީ ކޮންއިރަކުތޯ އެވެ.
މަޖިލިހުގެ ރިޔާސަތުން އަބްދުއްރަހީމް އަބްދުﷲ ވިދާޅުވީ ދިމާވި ސަބަބަކާ ހުރެ މިއަދު މަޖިލިހަށް ވަޑައިގެންނެވެން ނެތް ކަމަށް ހައިދަރު އަންގަވާފައިވާ ކަމަށެވެ.
"ކުއްލިއަަކަށް ދިމާވި އާއިލީ ކަމަކާ ގުޅިގެން މިއަދު ވަޑައިގެންނެވެން ނެތް ކަމަށް މިއަދު ހެނދުނުގެ ވަގުތެއްގައި ވަނީ އަންގަވާފައި،" އަބްދުއްރަހީމް ވިދާޅުވި އެވެ.
މަޖިލިހުގެ ރައީސް ވިދާޅުވީ އެންމެ އަވަހަށް އެޖެންޑާ ކުރެވެން އޮތް ދުވަހަކަށް ސުވާލު އެޖެންޑާ ކުރައްވާނެ ކަމަށެވެ.
Ads by STO
