މޫސުން ގޯސް، ކަނޑުމަތީގެ 6 ހާދިސާއެއް ހިނގައިފި
ރޭ މެންދަމުން ފެށިގެން ފަތިހާ ދެމެދު ކަނޑުމަތީގެ ހަ ހާދިސާއެއް ހިނގައިފި އެވެ.
މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) އިން މިއަދު ބުނީ ކަނޑުމަތީގެ ހަ ހާދިސާއެއް ހިނގާފައިވާ ކަމުގެ ރިޕޯޓް އެ އިދާރާއަށް ލިބިފައިިވާ ކަމަށެވެ.
- 9 ފަތުރުވެރިންނާއި 5 ފަޅުވެރިންނާ އެކު ދަތުރުކުރި 'ކޮޅުލިޔާ' ނަމަކަށް ކިޔާ ސަފާރީ ތިމަރަފުށި އެއާޕޯޓް ބީޗަށް ލައްވުން:
މި ހާދިސާގެ ރިޕޯޓް ލިބިފައި ވަނީ ރޭ 01:10 ހާއިރު ކަމަށްވާއިރު، ހާދިސާގައި އެއްވެސް މީހަކަށް އަނިޔާއެއް ލިބިފައެއް ނުވެ އެވެ. ސަފާރީގައި ތިބި މީހުން މިހާރު ތިބީ އެ ރަށު ގެސްޓްހައުސްއެއްގަ އެވެ.
- ތ. އަތޮޅު ތެރެއިން ބާޖެއް ކަފު ޖަހައިގެން ދަތުރުކުރި ޓަގު ބޯޓެއް މޫސުން ގޯސްވެ ވާ ކަނޑައިގެން ދިއުން:
މިވަގުތު ބާޖު އޮތީ އެ އަތޮޅު ގުރައިދޫ ކައިރިއަށް ބީހިފަ އެވެ. ޓަގު ބޯޓް އޮތީ އެ ސަރަހައްދުގައި އެންކަރުކޮށްގެންނެވެ. މި ހާދިސާގެ ރިޕޯޓް ލިބިފައި ވަނީ 02:54 ހާާއިރު އެވެ.
- 'ފިޝްމަން' ކިޔާ މަސް ދޯންޏެއް ލ. އަތޮޅަށް ދަތުރު ކުރަނިކޮށް ލ. ހިތަދޫގެ 23 މޭލު ބޭރުން ދިޔަވުން:
މި ހާދިސާގެ ރިޕޯޓް ލިބިފައި ވަނީ 03:20 ހާއިރު ކަމަށްވާއިރު ހާދިސާ އާ ގުޅިގެން ހަރަކާތްތެރިވެފައި ވަނީ ފާސްޓް އިންޓަ ސެޕްޓަ ކްރާފްޓް 'މާފަތް' އެވެ. މި ދޯނި މިހާރު ވަނީ މަޑުމަޑުން ދުއްވާފައި ގޮސް ލ. ހިތަދޫ ބަނދަރަށް ވަދެފަ އެވެ.
- 6 މީހުންނާ އެކު ދަތުރުކުރި 'ބިނާ ކާގޯ' ކިޔާ ސަޕްލައި ދޯންޏެއް ލ. ހިތަދޫގެ 11 މޭލު ބޭރުން އިންޖީން ހުއްޓި ދިޔަވުން:
އިތުރު ދޯންޏެއްގެ އެހީގައި މިހާރު ކަފުޖަހައިގެން މި ދޯނި ދަތުރު ކުރަމުންދާ ކަމަށާއި ހާދިސާގައި ހަރަކާތްތެރިވަމުން ދަނީ ފާސްޓް އިންޓަ ސެޕްޓަ ކްރާފްޓް 'މާފަތް' އެވެ.
- 10 މީހުންނާ އެކު ދަތުރުކުރި ސައުތު އެކްސްޕްރެސް ދޯންޏަށް ދިޔަވުން:
ދޯނި ދިޔަވާތީ ސިފައިން ވަނީ އެހީތެރިކަން ފޯރުކޮށްދީފަ އެވެ. ސެންޓްރަލް އޭރިއާ ކޮމާންޑް ކޯސްޓްގާޑް ތާޑް ސްކޮޑްރަންގެ އެހީތެރިކަމާ އެކު، މި ދޯނި މިއަދު ހެނދުނު 09:00 ހާއިރު، ލ. މާމެންދޫ ބަނދަރަށް ވައްދާފަ އެވެ. މި ހާދިސާގެ އެ އިދާރާއަށް ރިޕޯޓް ކޮށްފައި ވަނީ މެންދަމު 02:48 ހާއިރު އެވެ.
- 80 ފޫޓްގެ ފާގަަތި ނަމަކަށް ކިޔާ ދޯންޏެއް ދިޔަވުން:
ސެންޓްރަލް އޭރިއާ ކޮމާންޑް ދ. ކުޑަހުވަދޫ ޕޯސްޓްގެ ސިފައިން ވަނީ ހަރަކާތްތެރިވެފަ އެވެ. ހާދިސާގައި ދޯނީގައި ހުރި ބިދޭސީ ފަޅުވެރިއަކަށް އަނިޔާވެފައިވެ އެވެ. އިތުރު ފަރުވާއަށް ފ. ނިލަންދޫ ހޮސްޕިޓަލަށް ގެންގޮސް ދިނުމަށް ސެންޓްރަލް އޭރިއާ ކޮމާންޑް ކޯސްޓްގާޑް ތާޑް ސްކޮޑްރަންގެ އެހީތެރިކަމާ އެކު، އެ މީހާ ވަނީ ނިލަންދޫއަށް ގެންގޮސްދީފަ އެވެ. މި ހާދިސާގެ ރިޕޯޓް ލިބިފައި ވަނީ 05:00 ހާއިރު އެވެ.
މޫސުމާ ބެހޭ ގައުމީ އިދާރާއިން "ދެން އޮންލައިން" މައުލޫމާތު ދެމުން ބުނީ މި ހަފުތާގެ އަންގާރަ ދުވަހާއި ހުކުރު ދުވަސް ފިޔަވައި މޫސުން ގޯސްވާނެ ކަމަށެވެ. މެޓް އޮފީހުން ބުނީ މިއަދު ރާއްޖޭގެ އެކި ހިސާބަށް ވިއްސާރަކޮށް ގުގުރާނެ ކަމަށެވެ. އަދި ބައެއް ރަށްތަކަށް ބޯކޮށް ވާރޭ ވެހުން އެކަށީގެންވާ ކަމަށެވެ.
ދެކުނުގެ އަތޮޅުތަކަށް، ދެކުނާއި ހުޅަނގުދެކުނުން އަދި އެހެން ހިސާބުތަކަށް ހުޅަނގާއި ހުޅަނގު އުތުރުން ގަޑިއަކު 8 މޭލާއި 18 މޭލާ ދެމެދުގެ ބާރުމިނުގައި ވައި ޖެހޭނެ އެވެ. ވިލާގަނޑުގައި ގަޑިއަކު ގާތްގަނޑަކަށް 40 މޭލަށް ވައިގަދަވުން އެކަށީގެންވާ ކަމަށް މެޓް އޮފީހުން ބުނެ އެވެ.
ކަނޑުތައް އާދައިގެ ވަރަކަށް ގަދަވެފައި ވިލާގަނޑުގައި އިތުރަށް ގަދަވާނެ އެވެ. ރާޅުގެ އުސްމިން ހުންނާނީ 4 ފޫޓާއި 7 ފޫޓާ ދެމެދުގަ އެވެ. އެހެންކަމުން ކަނޑުދަތުރުކުރާ ފަރާތްތަކުން މޫސުމަށް ސަމާލުކަން ދިނުމަށް މެޓް އޮފީހުން ވަނީ އިލްތިމާސްކޮށްފަ އެވެ.
