Monday, 16 November 2026
Advertisement
Ooredoo — Article-Top (leaderboard)
ސިޔާސީ

ޔާމީންގެ ސިޔާސީ ގުއިރޯނުގައި އަޅުގަނޑުމެން ދެބަފައިން ނުޖެހޭނަން: ފައިސަލް

ޔާމީންގެ ސިޔާސީ ގުއިރޯނުގައި އަޅުގަނޑުމެން ދެބަފައިން ނުޖެހޭނަން: ފައިސަލް
ކުރީގެ ރައީސް ޔާމީން އަބްދުލްޤައްޔޫމް ޖައްސަވާ ސިޔާސީ ގުއިރޯނުގައި ޖެހިވަޑައިނުގަންނަވާނެ ކަމަށް ވިދާޅުވެ، ކުރީގެ ރައީސް އަބްދުﷲ ޔާމީނަށް ރައްޔިތުންގެ މަޖިލިހުގެ ރައީސް އަބްދުއްރަހީމް އަބްދުﷲ ގެ ދަރިކަލުން އިބްރާހިމް ފައިސަލް ރައްދު ދެއްވައިފި އެވެ. ފައިސަލް މިރޭ ފޭސްބުކްގައި ކުރެއްވި ޕޯސްޓެއްގައި ވިދާޅުވީ އޭނާގެ ބައްޕާފުޅު ޔާމީނަށް މެދުކެނޑުމެއްނެތި 20 އަހަރު ސިޔާސީ "އަޅުމަސައްކަތް" ކޮށްދެއްވި ކަމަށެވެ. ވަރުބަލިކަމެއް، ފޫހިކަމެއްނެތި އެ މަސައްކަތް ކޮށްދިން ކަމަށް މި ދިވެހި ގައުމު ހެކިވާނެ ކަމަށެވެ. އޭރު އެ ބައްޕަގެ ތައުލީމް ޔާމީނަށް މުހިންމު ނުވި ކަމަށެވެ. 2018 ވަނަ އަހަރު ވަނަ ޔާމީނާއި އެމަނިކުފާނުގެ އަނބިކަބަލުން ހެއްދެވި ސިހުރުގެ ތެރޭގައި މުޅި ޕީޕީއެމްގެ އޮޑި ފަރަށް އެރީ އަބްދުއްރަހީމް ހިމެނިވަޑައިގަންނަވާހެން ޕީޕީއެމްގެ ލީޑަޝިޕްގެ ގިނަބަޔަކު ދުރަށް ޖެއްސުމުން ކަމަށެވެ. އަދި އެއީ އެމަނިކުފާނުގެ އަންހެނުން ލައްވާ ޕީޕީއެމް ހިންގުވައި މުލިއާގޭގައި "ސިހުރުތަށި" ދުއްވަން އުޅުމުގެ ނަތީޖާ ކަމަށް ފައިސަލް ވިދާޅުވި އެވެ. ހަގީގަތުގައި އެ އިންތިހާބުގައި ޔާމީންގެ އަތުގައި އަލާއުއްދީނުގެ ވޮއްގަނޑާއި އުދުހޭ މުސައްލަ ނެތުމުން ކަަމަށެވެ.
"2019 ގައި މަނިކުފާނު ހަމަ ގަސްތުގައި ޕީޕީއެމްގެ މަޖިލިސް މެންބަރުން ފެއިލްކޮށްލީ ހަމަ ދުރާލާރާވައިގެން އެމީހުން އަޅުވެތި ކަމުގައި ބޭތިއްބުމުގެ ކެހިވެރި ނިޔަތުގަ އެވެ. އެހާލަތުގައި މަނިކުފާނު ދޫކޮށް ޕާޓީގެ އިސް ގިނަ ބަޔަކު ނައްޓާލިއިރު، ހުރިހާ ތަކުލީފެއް އުފުލަން ކެތްތެރިކަމާ އެކު ހުރީ އަޅުގަނޑުގެ ބައްޕަ އަބްދުއްރަހީމް އަބްދުﷲ އެވެ،"
ވިދާޅުވި ގޮތުގައި ވޮޑަމުލާ މައްސަލާގައި 2019 ވަނަ އަހަރުގެ ނޮވެމްބަރު މަހުގެ 29 ވަނަ ދުވަހު، ޔާމީނަށް ކްރިމިނަލް ކޯޓުން ފަސް އަހަރު ދުވަހުގެ ޖަލު ހުކުމް އިއްވުމުން، ދެ ޕާޓީގެ ސިޔާސީ މަސައްކަތް ކުރަން 24 ގަޑިއިރު "ގަނަތެޅުނީ" އޭނާގެ ބައްޕާފުޅު ކަަމުގަ އެވެ. އެ ހުކުމުން ސަލާމަތްވެ، އަހަރެއްހާ ދުވަސް ފަހުން ޔާމީން އެނބުރި ވަޑައިގަތްއިރު، ޕާޓީގެ ސިޔާސީ ހަރަކާތް މެކުހަށް ޖަހައި، އެންމެން ގޮވައިގެން ދުވާލު ހަތަރުދަމު، ސަރުކާރު ޒިންމާދާރުކުރުވާ އަވައްޓެރީންނާއި ދުރުތިބީންގެ ދޮޅިދަށަން އަތްލައި އެމަނިކުފާނުގެ ހައްގުގައި އަވަދިވަމުން ދިޔައީ އަބްދުއްރަހީމްކަން މި ދިވެހި ގައުމު ހެކިވާނެ ކަމުގަ އެވެ.
"ޖަލުން އެނބުރި އައިސް، ޕީޕީއެމް ޕީއެންސީ ކޯލިޝަންއިން ކާނިވަލުގައި ބޭއްވި މާސިންގާ ޖަލްސާއެއްގައި، މަނިކުފާނު ނެތްއިރު، ކޮށްދެއްވާފައިވާ މަސައްކަތުގެ ސަބަބުން މަނިކުފާނު އަޅުގަނޑުގެ ބައްޕައަށް އިއްވި ސަނާ އާއި ކުރި އިތުބާރުގެ ވާހަކަތަކުގެ މަތިން މިހާރު ހަނދާން އެބަހުރިތޯ އެވެ. އެ ބޮޑު މާސިންގާ ކޯލިޝަން މަނިކުފާނުގެ ގައިރު ހާޒިރުގައި ބަލަހައްޓަން މަނިކުފާނު ހަވާލުކުރީ އެއްވެސް އިލްމެއް، ހިލްމެއް ނެތް މީހަކާ ތޯ އެވެ؟ އެއިރު ހަމަ ބަރާބަރު ދެއްތޯ އެވެ،"
2023 ވަނަ ވަނަ އަހަރުގެ ރިޔާސީ ޓިކެޓުގައި ޔާމީނުގެ ނަން ނުބޭއްވީ އެމްޑީޕީން ކަން ފާހަގަކޮށް ފައިސަލް ވިދާޅުވެފައި ވަނީ އެމީހުން އެކަން ކޮށްފައި ވަނީ ކެންޑިޑޭޓް ރައީސް ނަޝީދުގެ ކެންޑިޑެސީ އެމަނިކުފާނު އިސްވެ ހުރެ 2018 ގައި ދުއްވާލުމުގެ ބަދަލުގައި ކަމަށެވެ. އެކަން އެހެން ވާނެކަން އެނގިހުރެ، އިދިކޮޅު އެންމެ ބޮޑު ކޯލިޝަނުން ކެންޑިޑޭޓަކު ނުނެރި މުޅި ގައުމު އެމްޑީޕީ އަތަށް ދެވަނަ ދައުރަކަށް ދޭން ޔާމީން ނިންމީ އެމަނިކުފާނަށް ކުރިމަތިނުލެވޭ ނަމަ، އިންތިހާބު ބޮއިކޮޓް ކުރުމުގެ ކެހިވެރި ނިޔަތުގައި ކަމަށެވެ. އަބްދުއްރަހީމްގެ ދަރިކަލުން ވިދާޅުވީ "ތިމާއަށް ނުލިބުނު މޮޅެއް އެހެން މީހަކަށް ލިބުމަށް ނޭދޭތީ" މުޅި އިދިކޮޅު ނުހަނު ނިކަމެތިކަމާ އެކު، އިތުރު ފަސް އަހަރު މަގުމަތީގައި ބޭއްވުމަށް ޔާމީން ނިންމެވި ހިސާބުން އެމަނިކުފާނުގެ ލީޑަޝިޕް ފެއިލްވިކަން ހިސާބު ޖައްސަވަން ނޭގުމަކީ ހަގީގަތެއް ކަމަށެވެ. ޕީޕީއެމްއަކީ ޔާމީނުގެ ތަރިކަ މުދަލެއް ކަމަށް ހިތައި ޕާޓީއަށް ލިބުނު ފައިސާގެ އެކި މިންވަރުގެ އެހީން ބޮޑު ބައެއް 2013 ވަނަ އަހަރުން ފެށިގެން އަމިއްލަފުޅު އެކައުންޓުތަކަށް ލައްވަމުން ދިޔައީ ޕީޕީއެމްގެ އާންމު މެމްބަރުންނަކީ މޮޔައިން ކަމަށް ދެކޭތީތޯ އެ ޕޯސްޓުގައި ވަނީ ސުވާލު އުފައްދަވާފަ އެވެ.
"އަޅުގަނޑުގެ ބައްޕަ އަދި މިއަދުގެ ގައުމުގެ ރައީސް ޑރ. މުއިއްޒުގެ ހިތްވަރާއި ކެރުން ނެތް ނަމަ، އަދިވެސް އަޅުގަނޑުމެން ތިބެން ޖެހޭނީ މަގުމަތީގަ އެވެ. މި ގައުމު އޮންނާނީ އޮޔާގޮސް ލޯމަތިން ގެއްލިފަ އެވެ."
ޑރ. މުހައްމަދު ޖަމީލާއި މަލީހު ޖަމާލާއި ހުސެއިން ވަހީދު އަދި އަހުމަދު ފަޔާޒު (ޕާޕާ) ގޮވައިގެން އިންނަވާ އެއީ ތެދުވެރިން ކަމަށް ވިދާޅުވަމުންދާއިރު، އެއިން ކޮންމެ މީހަކީ މަނިކުފާނު މި ދުނިޔެއިން ނައްތާލަން އުޅުނު މީހުން ކަމަށް ކުރިން ވިދާޅުވީ ޔާމީނު ކަމަށެވެ.
"އަޅުގަނޑާއި އަޅުގަނޑުގެ ބައްޕައަކީ ނުކިޔަވާ ތިބި މީހުން ކަމަށް ވެ އެކަމާ މަނިކުފާނު ކަންބޮޑުވެގެން އުޅުއްވާއިރު، މަނިކުފާނުގެ މޮޅަށް ކިޔެވި ދަރިން މި ގައުމަށް ކޮށްދިން ހިދުމަތެއް އަޅެ ވިދާޅުވެ ބައްލަވާށެވެ،"
ޔާމީން، އަބްދުއްރަހީމްއަށް ތައުރީފު ކުރައްވާ ދައްކަވާފައިވާ ވާހަކައިގެ ވީޑިއޯ ކްލިޕަކާ އެކު ކުރި ޕޯސްޓް ނިންމާލަމުން ފައިސަލް ވިދާޅުވި ގޮތުގައި އޭނާ އާއި އޭނާގެ ބައްޕާފުޅު ވެސް ޔާމީނުގެ ސިޔާސީ ގުއިރޯނުގައި ދެން ނުޖެހޭނެ ކަމުގަ އެވެ. އަދި އެމަނިކުފާނަށް ދެން މި ގައުމުގެ ހަޒާނާއަށް "އަތް ބޭނުމަށް ޖާގައެއް ވެސް ނުދޭނެ" ކަމުގަ އެވެ.

ރިއެކްޝަން

Advertisement
Ooredoo — Square (box)

ކޮމެންޓް

މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.