ހުޅުމާލޭގައި ޑައިވް ސެންޓަރެއް ތަރައްގީކޮށް ހިންގާނެ ބަޔަކު ހޯދަނީ
ހުޅުމާލޭގައި ޑައިވް ސެންޓަރެއް ތަރައްގީކޮށް ހިންގާނެ ފަރާތެއް ހޯދަން ހައުސިންގް ޑިވެލޮޕްމެންޓް ކޯޕަރޭޝަން، އެޗްޑީސީން އިއުލާން ކޮށްފި އެވެ.
އެޗްޑީސީން ކުރި އިއުލާނުގައި ވަނީ މިމަޝްރޫއަށް ޝައުގުވެރިވާ ފަރާތްތަކުން އީއޯއައި ހުށަހަޅަން ފުރުސަތު ހުޅުވާލައިފަ އެވެ. އެޗްޑީސީން ބުނީ މިމަޝްރޫއު ކުރިއަށް ގެންދަން އިސްކަން ދޭނީ ލީސް މޮޑެލްއިން ހިންގަން ކަމަށެވެ. އެހެންނަމަވެސް މި ނޫން މޮޑެލްތަކަށްވެސް އީއޯއައި ހުށަހެޅޭނެ އެވެ. އެހެންނަމަވެސް އެފަދަ އީއޯއައި ހުށަހަޅަންވާނީ ދެފަރާތަށްވެސް ލިބޭނެ ފައިދާތައް ބަޔާންކޮށްފަ އެވެ.
އެއް އީއޯއައި އަށްވުރެއް ގިނައިން ހުށަހަޅައިފިނަމަ އެޗްޑީސީގެ ތަސައްވުރާއި، އަމާޒުތަކުގެ އިތުރުން މާސްޓާޕްލޭނަށް އެންމެ އެކަށީގެންވާ އީއޯއައިއަކަށް އިސްކަން ދޭނެކަމަށް އެ ކޯޕަރޭޝަނުން ބުންޏެވެ.
އީއޯއައިތައް އިވެލުއޭޓްކުރުމުގައި ހުށަހަޅާފައިވާ ބިޒްނަސް މޮޑެލްއާއި، އޮޕަރޭޓަރާއި ޑިވެލޮޕަރ/ކޮންޓްރެކްޓަރުގެ ތަޖުރިބާއާއި، ހުށަހަޅާފައިވާ ޓީމާއި، މާލީ ހަމަޖެހުމާއި، ކެޕޭސިޓީއާއި، ސީއެސްއާރު އަދި ޑައިވް ސެންޓަރުގެ ކޮންސެޕްޓް ޑިޒައިންއަށް ބެލޭނެ އެވެ.
އެޗްޑީސީން އެދެނީ އީއޯއައި އާއެކު އެކްސްޕްރެޝަން އޮފް އިންޓަރެސްޓް އެޕްލިކޭޝަން ފޯމު ހުށަހެޅުމަށެވެ. އެ ފޯމު އެ ކޯޕަރޭޝަންގެ ވެބްސައިޓުން ލިބެން ހުންނާނެ އެވެ. މީގެ އިތުރުން ޑައިވް ސެންޓަރުގެ ކޮންސެޕްޓް ޑިޒައިންވެސް ހިމަނަން އިއުލާނުގައި އެދިފައި ވެއެވެ.
ފޯމު ހުށަހެޅޭނީ އީމެއިލް މެދުވެރިކޮށް ނުވަތަ އެޗްޑީސީގެ އޮފީހަށެވެ. އީއޯއައި ހުށަހެޅުމުގެ ސުންގަޑިއަކީ މިމަހުގެ 29 ވަނަ ދުވަހުގެ މެންދުރު ފަހުު 2:00 އެވެ.
Ads by STO
