ވޭދާންގްއާ ހުޝީ ލޯބީގެ ގޮތުން ގުޅިގެން އުޅޭ ވާހަކަ ދޮގެއް ނުކުރި
ބޮލީވުޑްގެ ކުރީގެ ބަތަލާ ސްރީދޭވީގެ ހަގު އަންހެން ދަރި ހުޝީ ކަޕޫރާއި ލޯބީގެ ގޮތުން ގުޅިގެން އުޅޭ ވާހަކައާ ގުޅޭގޮތުން އެކްޓަރު ވޭދާންގް ރައިނާ ވާހަކަ ދައްކައިފި އެވެ.
ހުޝީއާ ވޭދާންގް ބޮލީވުޑަށް ޑެބިއު ހެދީ ފިލްމު "އާޗީސް" އިންނެވެ. މި ފިލްމަށްފަހު ވޭދާންގްގެ އެކްޓިންއަށް ގިނަ ބައެއްގެ ތައުރީފު ލިބުނެވެ. ފިލްމު ރިލީޒް ކުރުމާއިއެކު މީޑިއާގެ ސަމާލުކަން ލިބުނީ ވޭދާންގް އާއި ހުޝީ ލޯބީގެ ގޮތުން ގުޅިގެން އުޅޭކަމުގެ ވާހަކައަށެވެ.
ދުވަސްތަކެއް ވަންދެން މިކަމާ ބެހޭ އެއްވެސް ވާހަކައެއް ނުދައްކައި ހުރުމަށްފަހު ވޭދާންގް ވަނީ މިވާހަކަ ދައްކައިފަ އެވެ. ޖީކިއުއަށް ދިން އިންޓަވިއުއެއްގައި ވޭދާންގް ބުނީ ޑޭޓު ކުރުމާ ދުރަށް ޖެހިފައިވާ ކަމަށެވެ. އެހެންނަމަވެސް ކުރިން ލޯބީގެ ގުޅުން ބޭއްވިންތޯ ކުރި ސުވާލަށް ވޭދާންގް ޖަވާބެއް ނުދިނެވެ. އަދި ދެމީހުންގެ ދެމެދުގައި އޮތް ގުޅުމެއްވެސް ތަފްސީލެއް ނުކޮށްދިނެވެ.
ވޭދާންގް ބުނީ މިވަގުތު އޭނާ ބޮޑަށް އިސްކަން ދެނީ އެކްޓިންގް މަސައްކަތަށް ކަމަށެވެ. އަދި ދާއިރާގެ މަސައްކަތްތައް އަދި ފެށުނީ ކަމަށާއި ވަރަށް ގިނަ ކާމިޔާބީތައް ހާސިލްކުރަން ބޭނުންވާ ކަމަށްވެސް ވޭދާންގް ބުންޏެވެ.
ވޭދާންގްގެ ދެން އެންމެ އަވަހަށް ރިލީޒްވާނީ އާލިއާ ބަޓްއާއިއެކު "ޖިގްރާ" އެވެ. ވޭދާންގް ބުނީ ފިލްމުގެ މަސައްކަތްތައް ކުރިއަށް ދިޔައީ ވަރަށް ރަނގަޅަށް ކަމަށެވެ. އެހެންނަމަވެސް އާލިއާގެ ޝޫޓުތައް ފެށި ހިސާބުން ބިރުގަތް ކަމަށާއި އާލިއާގެ މަސައްކަތް ވަރަށް ފުރިހަމަ ކަމަށް ވޭދާންގް ބުންޏެވެ.
ވޭދާންގްގެ އުމުރަކީ 24 އަހަރެވެ. އާޗީސް އަށްފަހު ވޭދާންގް ދަނީ އެކި ބްރޭންޑްތަކުގެ އެމްބެސަޑާޝިޕް ނަގަމުންނެވެ. ދާދި ފަހުން އޭނާ ވަނީ ހުޝީއާއެކު ޑިޒައިނަރު ގޯރަވް ގުޕްތާގެ ރޭމްޕްގައި ޝޯ ސްޓޮޕާއެއްގެ ގޮތުގައި ފެނިގެން ގޮސްފަ އެވެ.
Ads by STO
