ބޯކޮށް ވާރޭވެހި ފެންބޮޑުވާނެ ކަމަށް ލަފާކޮށް ހއ އިން ށ އަށް އޮރެންޖު އެލާޓް
ބޯކޮށް ވާރޭވެހި ފެންބޮޑުވާނެ ކަމަށް ލަފާކޮށް ހއ އަތޮޅުން ފެށިގެން ށ އަތޮޅަށް މޯލްޑިވްސް މީޓިއަރޮލޮޖީ ސެންޓަރު (މެޓް) އިން އޮރެންޖު އެލާޓެއް ނެރެފި އެވެ.
މި އެލާޓް ނެރެފައިވަނީ މިރޭ 8:30 އިން 22:30 އާ ހަމަޔަށެވެ.
އެލާޓްގައިވާ ގޮތުން ހއ އިން ށ އަތޮޅަށް ވިއްސާރަކުރުމާ އެކު ގުގުރާނެ އެވެ.
އުތުރުގެ އަތޮޅުތަކަށް މިރޭ 8:15 އިން ދަންވަރު 1:00 އާ ހަމަޔަށް ޔެލޯ އެލާޓް ވަނީ ނެރެފަ އެވެ. އެ ސަރަހައްދަށް ބޯކޮށްވާރޭވެހުމާ އެކު ގުގުރާނެ ކަމަށް ލަފާކޮށްފައިވެ އެވެ.
އަދި އެ ސަރަހައްދަށް 45 މޭލަށް ވައި ގަދަވެ ކަނޑުތައް ގަދަވާނެ ކަމަށް މެޓުން ލަފާކޮށްފައިވެ އެވެ.
ފާއިތުވި 24 ގަޑިއިރު މުޅި ރާއްޖެއަށްވެސް ވަރަށް މޫސުން ގޯހެވެ. ހުޅަނގު މޫސުމުގެ ވިއްސާރަ ބާރުގަދަވެފައިވާއިރު މި ފަހުން ކުރި ވިއްސާރާގައި 9 ވަރަށް ރަށުގައި ފެންބޮޑުވެ އެކި ގެއްލުންތައް ލިބުނުއިރު ވެރިރަށް މާލެއަށްވެސް ބޯކޮށް ވާރޭވެހުނެވެ.
މި ދުވަސްވަރު މޫސުން ގޯސްކޮށް އުޅޭތީ ދަތުރުފަތުރު ކުރުމުގައި ސަމާލުވުމަށް ކަމާއި ބެހޭ އިދާރާތްތަކުން އިލްތިމާސްކުރެ އެވެ.
